Dual Panel1Jadi dob masuk iboan sidea poti ni Naibata, ipajongjong ma ai i tongah-tongah ni lampolampo, na dob pinajongjong ni si Daud ai. Dob ai igalangkon sidea ma galangan situtungon pakon galangan pardameian i lobei ni Jahowa.
2Dob salpu igalangkon si Daud galangan situtungon pakon galangan pardameian ai, ipasu-pasu raja ai ma bangsa ai marhitei goran ni Jahowa,
3anjaha ibere ma bani ganup halak Israel, dalahi pakon naboru, sada bei ruti, santoktok gulei pakon sada kuei na maragu manisan.
4Ambahni ai ipabangkit raja ai ma siparugas i lobei ni poti ni Jahowa humbani deba halak Levi, laho mamuji-muji, mangkatahon tarima kasih ampa pasangapkon Jahowa, Naibata ni Israel.
5Si Asap do kopala, si Sakarya na paduahon, dob ai si Jegiel, si Semiramot, si Jehiel, si Matitya, si Eliab, si Benaya, si Obed-Edom pakon si Jegiel, ai ma sijolom parugas na laingan, husapi pakon arbab; si Asap do sipahata ogung;
6anjaha Malim Benaya ampa Jahasiel do sisompul tarompet tongtong i lobei ni poti parpadanan ni Naibata.
7Bani ari ai do parlobei sahali iparentahkon si Daud si Asap ampa saninani, mandodingkon doding puji-pujian bani Jahowa.
Doding Puji-pujian ni si Daud
8Puji nasiam ma Jahowa, dilo ma goran-Ni, pabotohkon nasiam ma pambahenan-Ni i tongah-tongah ni sagala bangsa!
9Dodingkon ma Ia, dodingkon ma puji-pujian, patugah ma ganup horja halongangan-Ni ai!
10Pasangap ma goran-Ni na mapansing in, sai marmalas ni uhur ma sagala sipindahi Jahowa!
11Pindahi nasiam ma Jahowa pakon hagogohan-Ni, tongtong ma pindahi nasiam bohi-Ni!
12Paingat-ingat nasiam ma halongangan na binahen-Ni ai, tanda halongangan-Ni pakon uhum na luar hun pamangan-Ni,
13nasiam ginompar ni Israel, jabolon-Ni, nasiam anak ni si Jakob, na pinilih-Ni!
14Ia Jahowa, Ia do Naibatanta, sab do uhum-Ni i dunia on.
15Sai idingat do tongtong padan-Ni ai, hata, na hinatahon-Ni bani marribu-ribu sundut,
16padan na binahen-Ni hubani si Abraham, pakon bulawan na binulawankon-Ni hubani si Isak.
17Ipajongjong do ai bani si Jakob gabe uhum, bani Israel gabe padan sisadokah ni dokahni.
18Nini do, “Hubam do berehonon-Ku tanoh Kanaan, gabe tanoh parbagianan bam.”
19Sanggah otik ope bilangan ni sidea, hulanan na etek-etek anjaha manginsolat ijai,
20minsah-insah hun bangsa hu bangsa, humbani sada harajaon hu harajaon na legan,
21seng ilopas age sahalak mangarsik sidea, ipapai do raja tene marhalanihon ni sidea.
22“Ulang kahua hanima halak na mininakan-Ku, anjaha ulang bahen na masambor bani nabing-Ku!”
23Dodingkon ma Jahowa, nasiam ganup tanoh, ambilankon ma haluahon-Ni ganup ari!
24Baritahon ma hamuliaon-Ni ai i tongah-tongah ni halak sipajuh begu-begu, anjaha halongangan-Ni ai i tongah-tongah ni sagala bangsa.
25Ai banggal do Jahowa, talup tumang pujion, Ia do sihabiaran, na mangatasi sagala naibata na legan.
26Ai gana-gana do naibata ni sagala bangsa sipajuh begu-begu; tapi Jahowa do na manjadihon langit.
27Hajombuton pakon hamuliaon do i lobei-Ni; hagogohon pakon malas ni uhur bani ianan-Ni.
28Bere ma bani Jahowa, nasiam marga humbani sagala bangsa, bere nasiam ma bani Jahowa hamuliaon pakon hagogohon!
29Bere ma bani Jahowa hamuliaon ni goran-Ni, boan ma galangan, anjaha roh ma nasiam hu lobei-Ni! Sombah ma Jahowa marpakeian na mapansing!
30Hitir ma i lobei-Ni, ganup tanoh on! Jonam ma tongon dunia on, seng anjai dugur.
31Marmalas ni uhur ma langit, anjaha marolob-olob tanoh on; patugah ma i tongah-tongah ni halak sipajuh begu-begu: Jahowa do Raja!
32Marhasak ma laut pakon ganup isini, marolob-olob ma ladang pakon ganup na ibagas ai.
33Jadi marolob-olob ma hayu na i harangan i lobei ni Jahowa, ai roh do Ia manguhum tanoh on.
34Puji nasiam ma Jahowa, ai layak do Ia; ronsi sadokah ni dokahni do idop ni uhur-Ni.
35Anjaha hatahon ma, “Urupi hanami, Ham Naibata Siurupi hanami, patumpu anjaha paluah ma hanami humbani bangsa sipajuh begu-begu, ase ipuji hanami goran-Mu na mapansing in, anjaha marmegah-megah hanami, ibagas pamujinami Bamu.
36Pinuji ma Jahowa, Naibata ni Israel, humbani sadokah ni dokahni ronsi sadokah ni dokahni! Anjaha ganup ma bangsa mangakatahon: Amen. Puji-pujian ma bani Jahowa.”
37Jadi itotapkon si Daud ma si Asap pakon saninani ai ijai, i lobei ni poti parpadanan ni Jahowa, laho marugas tongtong i lobei ni poti ai, na patut sihoseionkon ari-ari;
38sonai homa si Obed-Edom pakon saninani onom puluh ualuh halak bueini. Ia si Obed-Edom, anak ni si Jedutun pakon si Hosa, rap sijaga horbangan do.
39Anjaha itotapkon ma Malim Sadok rap pakon saninani, malim-malim ai, i lobei ni Rumah ni Jahowa, na i dolog-dolog ai, i Gibeon,
40laho manggalangkon galangan situtungon hubani Jahowa, bani anjap-anjap ni galangan situtungon ai, siap sogod pakon bodari, romban hubani na tarsurat bani titah ni Jahowa, na pinarentahkon-Ni hubani Israel.
41Hasoman ni sidea si Heman pakon si Jedutun, pakon na tading humbani na pinilih-Ni ai, na torang tarsurat goranni, laho padaskon puji-pujian bani Jahowa, ai totap do ronsi sadokah ni dokahni idop ni uhur-Ni ai.
42Adong do homa tarompet pakon husapi bani sidea bahen parangguan ni musik ampa parugas na laingan, laho mandodingkon doding, bahen hasangapon bani Jahowa. Ia anak ni si Jedutun, sijaga horbangan do.
43Dob ai mulak ma ganup halak na mabuei ai hu rumahni bei, anjaha si Daud pe mulak ma, laho mamasu-masu parrumahni.