Dual PanelIparsirsir na Porlu laho Pajongjong Rumah Panumbahan
1Dob ai nini si Daud ma, “Maningon ijon do hajongjongan ni Rumah ni Naibata Jahowa ampa anjap-anjap bahen panggalangan ni galangan situtungon bani Israel.”
2Dob ai ihatahon si Daud ma use martumpu ganup halak panginsolat na i tanoh Israel, anjaha idilo ma sibarbar batu na mambarbar batu, laho pajongjongkon Rumah ni Naibata.
3Iparsirsir si Daud do homa buei tumang bosi bahen paku ni labah horbangan pakon bahen panghapit, sonai homa tombaga buei tumang, pala seng tartimbang boratni;
4sonai homa hayu ares, seng tarbilangi bueini, ai buei tumang do hayu ares iboan halak Sidon pakon Tirus hubani si Daud.
5Ai nini uhur ni si Daud do, “Ia anakku si Salomo poso anjaha seng marpangalaman ope, tapi anggo rumah sipaulion ai bani Jahowa maningon banggal tumang do, gabe hatimbulon ampa hamuliaon i sab tanoh on; halani ai maningon bahenon tagang-tagang hinan hujai. Jadi buei tumang do na itagang si Daud sanggah lape matei ia.”
6Dob ai idilo ma si Salomo anakni ai, anjaha iparentahkon ma bani pajongjongkon sada rumah bani Jahowa, Naibata ni Israel.
7Nini si Daud ma dompak si Salomo, “Alo anakku, iparsinta uhurhu do namin sihol pajongjongkon sada rumah bani goran ni Jahowa, Naibatangku.”
8Tapi roh ma hata ni Jahowa mangkatahon hu bangku, “Domma buei daroh iduruskon ho, anjaha idalankon ho do parporangan banggal; halani ai seng bulih ho pajongjongkon sada rumah bani goran-Ku, ai domma buei daroh iduruskon ho hu tanoh i lobei-Hu.
9Tonggor ma, tubuh do bam sada anak, sada halak pardamei do ia. Maningon mardamei do ia bahenonku dompak haganup munsuhni inggot; maningon si Salomo do goranni bahenon, ai hadameian pakon hasonangan do bereon-Ku bani Israel, sadokah goluhni.
10Maningon ia do pajongjong sada rumah bani goran-Ku. Ia do gabe anak Bangku, anjaha Ahu gabe Bapa bani, anjaha pajonamon-Ku do paratas ni harajaonni i Israel ronsi sadokah ni dokahni.
11On pe, anakku, sai hasomanan ni Jahowa do ho, ase saud jongjong Rumah ni Jahowa Naibatamu bahenonmu, songon na dob pinarbagah-Ni hinan pasal ho.
12Anjaha sai ibere Jahowa ma bam hapentaran pakon hauhuron, ase anggo ipabangkit ma ho manggomgom Israel, ase boi idalankon ho titah ni Jahowa, Naibata.
13Tongon, sai mardohar do ho, anggo ihaporluhon uhurmu mangkorjahon titah pakon uhum, na tinonahkon ni Jahowa marhitei si Musa hubani halak Israel. Tenger ma uhurmu anjaha marsijoloman, ulang mabiar anjaha gobir!
14Tonggor ma, age ibagas hasunsahan ahu na sain dokah, domma hupasirsir hinan bani Rumah ni Jahowa saratus ribu talenta omas pakon sajuta talenta pirak, anjaha tombaga pakon bosi seng tarbilangi halani bueini; parhayu pakon batu pe domma hupasirsir. Maningon tambahanmu ope ai.
15Ambahni ai maningon buei do siparhorja porlu bam: Sibarbar batu, tukang batu, tukang hayu, pakon buei tumang halak na pandei pasal horja na marbagei-bagei ai,
16ai ma mangkorjahon omas, pirak, tombaga pakon bosi, seng tarbilangi bueini. Marugas ma ho, anjaha horjahon ma. Sai hasomanan ni Jahowa do ho!”
17Iparentahkon si Daud do homa ganup kopala ni halak Israel, laho mangurupi si Salomo anakni ai, nini do,
18“Ai lang Jahowa Naibata nasiam do mangkasomani nasiam? Ai lang Ia mambahen mardamei nasiam inggot? Ai iondoskon do pangisi ni tanoh on hubagas tanganku; anjaha domma tunduk tanoh in i lobei ni Jahowa pakon i lobei ni bangsa-Ni.
19Halani ai pasirsir nasiam ma pingkiran nasiam pakon uhur nasiam mangindahi Jahowa, Naibata nasiam! Marugas ma nasiam, pauli nasiam ma ianan na mapansing ni Jahowa, Naibata, ase boi boanon poti parpadanan ni Jahowa, pakon parugas na mapansing ni Naibata hu rumah sipaulion bani goran ni Jahowa.”