Dual PanelAturan Parugasonkon pakon Parbagi ni Halak Levi ampa Malim
1Jadi dob matua si Daud anjaha sobalan uhurni bani hagoluhan on, ipabangkit ma anakni, si Salomo, manggomgomi Israel.
2Ipatumpu si Daud ma ganup kopala ni Israel, malim pakon halak Levi.
3Ibilangi ma halak Levi singgan ni na marumur tolu puluh tahun pakon i atasni ai, tumpu tolu puluh ualuh ribu halak bueini.
4Dua puluh ompat ribu halak hunjai mandalankon horja i rumah ni Jahowa, onom ribu gamot-gamot ampa panguhum.
5ompat ribu halak sijaga horbangan, anjaha ompat ribu halak use pandoding, sibere puji-pujian hubani Jahowa, marhasoman parugas na dob pinauli laho mamuji-muji.
6Anjaha iranggi si Daud do sidea marhorin-horin mangihutkon anak ni si Levi, ai ma si Gersom, si Kahat pakon si Merari.
7Na masuk hubani si Gersom: Si Laedan pakon si Simei.
8Anak ni si Laedan: Si Jehiel, kopala ai, si Setam pakon si Joel, tolu halak.
9Anak ni si Simei: Si Selomit, si Hasiel, pakon si Haran, tolu halak. Ai ma kopala humbani si Laedan mar sasaompung.
10Anjaha anak ni si Simei: si Jahat, si Sisa, si Jeus pakon si Beria; halak ai ma anak ni si Simei, ompat halak.
11Si Jahat do kopala, si Sisa paduahon; tapi si Jeus pakon si Beria seng buei anakni, halani ai gabe sisada ompung anjaha sisada horin do sidea.
12Anak ni si Kahat: Si Amram, si Jisehar, si Hebron pakon si Usiel, ompat halak.
13Anak ni si Amram: Si Aron pakon si Musa. Ipapulig hinan do anggo si Aron, laho marugas ibagas na pansing sahalian, ase ia pakon anakni ma tongtong na manutung dahupa i lobei ni Jahowa, marugas bani Jahowa, anjaha mamasu-masu ibagas goran-Ni sadokah ni dokahni.
14Ia anak ni si Musa, halak ni Naibata ai, ietong do sidea hubani marga Levi.
15Anak ni si Musa: Si Gersom pakon si Elieser.
16Anak ni si Gersom: Si Subael, kopala.
17Anak ni si Elieser: Si Rehabya, kopala; seng dong anak ni si Elieser na legan, tapi buei tumang do anak ni si Rehabya.
18Anak ni si Jisehar: Si Selomit, kopala.
19Anak ni si Hebron: Si Jeria, kopala, si Amarya paidua, si Usiel paitolu pakon si Jakmeam paiompat.
20Anak ni si Usiel: Si Mika, kopala, anjaha si Jisia paidua.
21Anak ni si Merari: Si Mahli pakon si Musi; anak ni si Mahli: Si Eleasar pakon si Kis.
22Sanggah matei si Eleasar, seng dong anak itadingkon, pitah boru do, anjaha anak ni si Kis, botou ni sidea do na mambuat sidea.
23Anak ni si Musi: Si Mahli, si Eder pakon si Jeremot, tolu halak.
24Ai ma ginompar ni si Levi mar sasaompung, kopala ni mar sasaompung ai, songon na tarsurat mangihutkon bilangan ni goran ni na marumur dua puluh tahun pakon i atasni, na mandalankon horja parugason i Rumah ni Jahowa.
25Nini si Daud do, “Ai domma ibere Jahowa, Naibata ni Israel damei bani bangsa-Ni, anjaha marianan Ia i Jerusalem ronsi sadokah ni dokahni.
26Halani ai seng pala be pausung-usungon ni halak Levi lampolampo ai pakon sagala parugasni.
27Ai mangihutkon parentah ni si Daud na parpudi, ia sibilangan humbani halak Levi, ai ma singgan na marumur dua puluh tahun pakon i atasni ai.
28Horjani, ai ma mangurupi ginompar ni si Aron mandalankon horja i Rumah ni Jahowa, manjagai alamanni kamar-kamar, pangurasion ni haganup parugas na mapansing pakon sagala horja parugason ibagas Rumah ni Naibata.
29Ambahni ai mangkoseihon ruti sigalangkonon, nitak na lumat bahen galangan sipanganon, ruti na so niigaran, galangan sigorengon, galangan na maragu minak, sonai homa sagala sitimbangon pakon sisuhaton.
30Anjaha maningon jongjong do sidea ganup sogod, mangkatahon tarima kasih pakon mamuji Jahowa, sonai homa bodari.
31Ambahni ai sanggah manggalangkon galangan situtungon hubani Jahowa, bani ari Sabat, bani poltak ni bulan pakon bani ari raya, na dob binuhul hinan bueini, mangihutkon hasomalan ni sidea tongtong i lobei ni Jahowa.
32Maningon dalankonon ni sidea do horja bani lampolampo partumpuan pakon horja bani ianan na mapansing ai, anjaha maningon hasomanan ni sidea do anak ni si Aron, hasoman samorga ni sidea ai, marugas i Rumah ni Jahowa.”