Dual PanelIpatidak Apostel Paulus Paruhuron ni Imbang-imbangni na Hurang Dear ai
1Sai ra ma nasiam otik manganju habodohonku! Nai ma tene, anju nasiam ma ahu!
2Ringis ni Naibata do na adong bangku mangkopkop nasiam; ai domma hupatunangankon nasiam bani sada dalahi, anjaha hupasirsir nasiam bani Kristus songon sada anak boru na so haliaban.
3Tapi biar do uhurhu songon si Hawa nasiam, na pinaoto-oto marhitei akal-akal ni ulog, gabe seda pingkiran nasiam, anjaha manirpang humbani bulus ni uhur dompak Kristus.
4Halani ihadearhon nasiam do, anggo adong na roh mangambilankon Kristus legan humbani na iambilankon hanami, anjaha ijalo nasiam do tonduy na legan, na so jinalo nasiam hinan, barang ambilan na madear na legan, na so jinalo nasiam hinan.
5Tapi ninuhurhu, seng etekan ahu marimbang apostel na banggal in.
6Tapi anggo hurang pandei pe ahu bani hata, tapi lang anggo bani habotohon; tongtong do ipataridahkon hanami ai bani nasiam ibagas haganup.
7Atap na mardousa do ahu, halani hupatoruh diringku, ase ipagijang nasiam, ai ma, halani huambilankon Ambilan Na Madear na humbani Naibata bani nasiam, seng pala mangindo upah?
8Hun bani kuria na legan do hubuati, hujalo upah humbani sidea, laho marhorja bani nasiam.
9Anjaha ia hurangan pe ahu i tongah-tongah nasiam, seng husunsahi age ise; ai sanina na roh hun Makedonia, ai do patukkon na hurang bangku. Tongtong do hujaga diringku, ase ulang husunsahi nasiam, sonai do homa hu lobeian on.
10Halani hasintongan ni Kristus na ibagas ahu, puji-pujian on seng bulih langlangon bangku i nagori Akaya.
11Halani aha? Halani na so holong do uhur hubani nasiam? Naibata do mambotohsi.
12Tapi na hubahen nuan, age hu lobeian on pe bahenonku do, laho manlanglangi paruhuran ni halak do, na marsura-surahon ase dos hanami pakon sidea bani pamujion in.
13Ia sidea, apostel parladung do, parhorja sipakulah-kulah, na pausih-usihkon dirini bani apostel ni Kristus.
14Seng pala longang uhur ijai, ai age sibolis ipausih-usih do dirini bani malekat haliharon.
15Seng pala ganjil ai, anggo juakjuakni pausih-usihkon dirini bani juakjuak ni hapintoron. Domu hubani horjani do ujung ni sidea bei.
Ipatugah si Paulus Hasurunganni Halani Munsuhni
16Huulaki ma mangkatahon, ulang ma adong na mangagan na bodoh ahu. Tapi anggo sonai do, jalo nasiam ma ahu songon na bodoh, ase tarpuji-puji ahu diringku otik.
17Ia na huhatahon on, seng huhatahon in mangihutkon pingkiran ni Tuhan in, tapi songon na bodoh do, domu hubani pambahen ni na mamuji-muji diri.
18Halani buei na mamuji-muji diri mangihutkon pardagingon, dihut ma ahu mamuji-muji diri.
19Ai lang malas do uhur nasiam manganju halak na bodoh, halani pentar nasiam?
20Tongon sabar do nasiam, anggo iparjabolon halak nasiam, anggo ionsop daroh nasiam, anggo ibuati parbagianan nasiam, anggo adong na pagijang-gijang dirini, anggo ipastap nasiam.
21Hamelaon do namin hatangkon, ra na galek do hanami ijai. Tapi, anggo adong barang ise na pag mangunsagahkon atap aha pe, ahu pe barani do mangunsagah. Haotoon do namin hatangkon.
22Halak Heber do sidea? Ahu pe homa. Halak Israel do sidea? Ahu pe homa. Ginompar ni si Abraham do sidea? Ahu pe homa.
23Juakjuak ni Kristus do sidea? Haotoon do hatangkon, lobihan do ahu. Lobihan manaron torik ni horja, gati tartutup, gati hona bogbog, gati ibagas parmaraan hamatean.
24Lima hali ma ahu ilonsingi halak Jahudi, ompat puluh pukul hurang sada.
25Tolu hali ma ahu ibogbogi, sahali ipargijig bani batu, tolu hali harom, sadari saborngin mumbang-umbang i laut bolag,
26gati i pardalanan anjaha marmara i bah banggal, marmara ibahen panrampok, marmara humbani bangsangku sandiri, marmara humbani bangsa sipajuh begu-begu, marmara ibagas huta, marmara i halimisan, marmara i laut, marmara i tongah-tongah ni sanina sipakulah-kulah.
27Loja do ahu anjaha sunsah, gati mangkar matangku, loheian anjaha horahan, gati marpuasa, marborgoh anjaha hurangan hiou.
28Sobali ai, adong ope na mandondon ahu ari-ari, ai ma na mansarihon haganup kuria in.
29Ise na galek, seng dihut ahu galek? Ise na gabe sangsi ibahen halak, seng dihut milas uhurhu?
30Anggo maningon mamuji diri ahu, hagalekonkin ma hupapuji-puji.
31Ia Naibata, Bapa ni Tuhan Jesus, na tarpuji ronsi sadokah ni dokahni, ibotoh do na so marladung ahu.
32I Damaskus, ijagai wakil ni raja Aretas do huta Damaskus, laho manangkap ahu.
33Jadi ibagas karanjang ma ahu itantan humbani jandela hu darat ni tembok, gabe maluah humbani tanganni.