Dual PanelSi Joahas Raja ni Israel
1Paduapuluh-tolutahunkon dob manrajai si Joas, anak ni si Ahasya i Juda, bangkit raja ma si Joahas, anak ni si Jehu, manggomgom Israel i Samaria, sapuluh pitu tahun dokahni.
2Ihorjahon do sogam ni uhur ni Jahowa, ai iirikkon do dousa ni si Jerobeam, anak ni si Nebat, na mambahen Israel mardousa, seng ipasurut dirini mangkorjahon ai.
3Halani ai gajag ma ringis ni Jahowa mangidah Israel, anjaha iondoskon ma sidea hubagas tangan ni si Hasael, raja hun Aram, pakon hubagas tangan ni si Benhadad, anak ni si Hasael, sadokah panorang ai.
4Jadi ielek-elek si Joahas ma idop ni uhur ni Jahowa, anjaha itangihon Jahowa ma ia, ai itatap uhur-Ni do harajaon ni Israel, naha pangarsik-arsik ni Raja Aram bani sidea.
5Halani ai ibere Jahowa ma sada sipaluah hu bani Israel, gabe maluah ma sidea hun bani tangan ni halak Aram, gabe marianan ma halak Israel ibagas lampolamponi bei songon na saindokah.
6Tapi age pe sonai, seng surut sidea hun bani dousa ni ginompar ni si Jerobeam, mardalan ibagas ai do sidea; sonai homa sisumbahon Ashera ipaturut sidea do jongjong i Samaria.
7Ai seng dong be bala ni si Joahas itebai Jahowa bani, sobali ni lima puluh halak bala siparhuda, sapuluh gareta porang, pakon sapuluh ribu bala na mardalan nahei, ai domma siap sidea ibahen raja ni Aram, anjaha domma iluntak-luntak sidea songon orbuk.
8Barita na legan ai ope pasal si Joahas pakon ganup na binahenni ampa hagarangonni, ai lang tarsurat do ai ibagas buku barita ni Raja-raja ni Israel?
9Dob ai modom ma si Joahas rap pakon ompungni, anjaha itanom sidea ma ia i Samaria; anjaha si Joas, anak ni ai ma bangkit raja manggantihsi.
Si Joas Raja ni Israel
10Patolupuluh-pitutahunkon dob manrajai si Joas i Juda, bangkit raja ma si Joas, anak ni si Joahas manggomgom Israel, i Samaria, sapuluh onom tahun dokahni.
11Ihorjahon do homa sogam ni uhur ni Jahowa; seng ipasurut dirini hun bani ganup dousa ni si Jerobeam, anak ni si Nebat, na mambahen Israel mardousa, sai mardalan do ia ibagas ai.
12Barita na legan ai pasal si Joas, ronsi haganup horjani ampa hagarangonni sanggah na marporang ai ia dompak si Amasia, raja ni Juda, ai lang tarsurat do ai ibagas buku barita ni Raja-raja ni Israel?
13Jadi modom ma si Joas rap pakon ompungni, anjaha si Jerobeam ma hundul bani paratas ni; anjaha itanom ma si Joas i Samaria i lambung ni raja-raja ni Israel.
Panjahaion ni si Elisa Sanggah Laho Matei Ia; Halongangan na Masa bani Tanomanni
14Sanggah boritan si Elisa, ai ma naborit na mamboansi matei, roh ma si Joas raja ni si Israel, manonggorsi, anjaha tangis ma ia i lobei ni, nini ma, “O bapa, bapa! Gareta porang pakon bala ni Israel!”
15Nini si Elisa ma hu bani, “Buat ma sada panah pakon lingkit!” Jadi ibuat ma sada panah pakon lingkit.
16Dob ai nini si Elisa ma hu bani raja ni Israel, “Tarik ma panah in!” Gabe itarik ma ai. Dob ai itampeihon si Elisa ma tanganni hu atas ni tangan ni raja ai.
17Anjaha nini ma, “Buha ma jandela hampit hapoltakan!” Jadi ibuha ma ai. Dob ai nini ma, “Panahkon ma!” Jadi ipanahkon ma. Dob ai nini si Elisa ma, “In ma panah hamonangan hun bani Jahowa pakon panah hamonangan dompak halak Aram! Ai taluhononmu do halak Aram i Afek, anjaha siap do sidea bahenonmu.”
18Dob ai nini ma use, “Buat ma lingkit in!” Dob ai ibuat ma ai. Nini ma hu bani raja ni Israel, “Libaskon ma in hu tanoh!” Jadi ilibaskon ma ai tolu hali, dob ai maronti ma ia.
19Dob ai manringis ma halak ni Naibata mangidahsi, nini ma, “Lima barang onom hali namin, ilibaskon ham ai, ase bois namin italuhon ham halak Aram. Tapi sonari tolu hali hansa taluhononmu halak Aram.”
20Dob ai matei ma si Elisa anjaha itanom ma ia. Jadi roh ma garambolan ni halak Moab hu nagori ai siap bona ni tahun.
21Sanggah mananom sada halak na matei sidea, tonggor ma, iidah sidea ma roh garambolan, gabe tarolos ma sidea mandanggurhon na matei ai hubagas tanoman ni si Elisa, hape dob dais halak ai bani holi-holi ni si Elisa, mulak manggoluh ma ia lanjar jongjong ma.
Hamonangan ni si Joas Mangimbang Halak Aram
22Sai isosak-sosak si Hasael, raja ni Aram do halak Israel sadokah manggoluh si Joahas.
23Tapi marpangulaki ma uhur ni Jahowa mangidah sidea, anjaha idop do uhur-Ni mangidah sidea, marpanatap do uhur-Ni mangidah sidea, halani padan na binahen-Ni ai hu bani si Abraham, si Isak pakon si Jakob, anjaha seng marosuh Ia mangidah hamagouan ni sidea, barang mangambukkon sidea hun lobei-lobei ni ronsi panorang ai.
24Dob ai matei ma si Hasael, raja ni Aram, gabe si Benhadad, anakni ai ma bangkit raja manggantihsi.
25Jadi irampas si Joas, anak ni si Joahas ma use hun bani si Benhadad, anak ni si Hasael, sagala huta na binuatni ai hinan hun bani si Joahas, bapani ai marhitei porang; pala tolu hali italuhon si Joas ia, gabe mulak ma huta ai hu bani Israel ibahen.