Dual PanelSi Amasia, Raja ni Juda
1Paduatahunkon dob manrajai i Israel si Joas, anak ni si Joahas, bangkit raja ma si Amasia, anak ni si Joas manggomgom Juda.
2Marumur dua puluh lima tahun do ia sanggah na bangkit raja ai, anjaha dua puluh siah tahun do ia dokahni manrajai i Jerusalem; ia goran ni inangni, si Joaddin do, hun Jerusalem.
3Ihorjahon do na pintor bani uhur ni Jahowa, tapi seng songon si Daud ompungni ai; usih songon pambahen ni si Joas, bapani ai do ganup pambahenanni.
4Tapi seng iparseda panumbahan na i atas buntu-buntu; sai manggalang anjaha manutung dahupa ope halak simbuei i atas ni panumbahan na i atas buntu-buntu.
5Dob lambin totap harajaonni ai ibagas tanganni, ibunuh ma juakjuakni, na mambunuh raja ondi, ai ma bapani.
6Tapi seng ibunuh anggo anak ni sipamunuh ai, romban hu bani parentah ni Jahowa, na tarsurat ibagas buku titah ni si Musa, na mangkatahon, ʻSeng bulih matei bunuhon bapa halani anakni, barang anak bunuhon halani bapani; tapi ganup halak maningon bunuhon do halani dousani sandiri.ʼ
7Isiapkon do halak Edom i habungan garam, salaksa bueini; idorab anjaha isoluk do Sela, anjaha ibahen ma goranni Joktel, sonai do goranni ronsi sadari on.
Italuhon si Joas si Amasia
8Isuruh si Amasia ma ijia suruhanni marayak si Joas, anak ni si Joahas, anak ni si Jehu, raja ni Israel, nini ma hu bani, “Barah, marsiujian ma hita!”
9Tapi isuruh si Joas, raja ni Israel ma suruhanni marayak si Amasia, raja ni Juda, nini ma, “Isuruh hayu na marsuga na i Libanon ma sipanririt marayak hayu ares na i Libanon, nini ma, ʻMahua bere ma borumu bahen parinangon ni anakku, hape mamontas ma binatang na i Libanon gabe idogei-dogei ma hayu na marsuga ai.ʼ
10Domma tongon italuhon ham halak Edom, gabe ipagijang ham uhurmu. Hamalaskon ham ma hamurmuronmu! Mase ma jombaonmu hamagouan, gabe dabuh ham rap pakon halak Juda?”
11Tapi seng ra si Amasia manangihon ai. Jadi tangkog ma si Joas raja ni Israel, jadi marsiujian ma sidea, ia pakon si Amasia, raja ni Juda i lambung ni Betsemes na i tanoh Juda.
12Tapi talu ma Juda ibahen Israel, gabe maporus ma sidea ganup hu rumahni bei.
13Homa tartangkap do i Bet-Semes si Amasia, raja ni Juda, anak ni si Joas, anak ni si Ahasya ibahen si Joas, raja ni Israel, anjaha iboan ma ia hu Jerusalem. Dob ai iparreong ma tembok ni Jerusalem singgan ni horbangan parsuhi Efraim das hu horbangan parsuhi-suhi, ompat ratus asta ganjangni.
14Anjaha ibuat ma ganup omas pakon pirak ronsi ganup parugas na jumpah ibagas Rumah ni Jahowa pakon na ibagas kamar parartaan, na i rumah ni raja ai, sonai homa jolma gabe jaminan, dob ai mulak ma ia hu Samaria.
15Barita na legan ai ope pasal si Joas, pakon haganup na binahenni ampa hagarangonni sanggah marmunsuh ia dompak si Amasia, raja hun Juda, ai lang tarsurat do ai ibagas buku barita ni raja-raja ni Israel?
16Dob ai modom ma si Joas rap pakon ompungni, anjaha tartanom ma ia i Samaria rap pakon raja-raja ni Israel. Jadi si Jerobeam anakni ai ma bangkit raja manggantihsi.
17Tapi anggo si Amasia, anak ni si Joas, raja ni Juda, manggoluh ope sapuluh lima tahun nari dob matei si Joas, anak ni si Joahas, raja ni Israel.
18Barita na legan ai ope pasal si Amasia, ai lang tarsurat do ai ibagas buku Barita ni Raja-raja ni Juda?
19Dob ai ibahen halak ma partahi-tahian mangimbangsi i Jerusalem, gabe maporus ma ia hu Lakis. Tapi isuruh sidea ma halak na mangirikkonsi hu Lakis, anjaha ibunuh sidea ma ia ijai.
20Dob ai iboan sidea ma ia i atas ni huda, gabe itanom ma ia i Jerusalem, i lambung ni ompungni, i huta ni si Daud.
21Dob ai ibuat halak Juda ma si Asarya, na marumur sapuluh onom tahun ope, jadi ipabangkit ma ia gabe raja gantih ni si Amasia bapani ai.
22Ia do na patoguhkon Elat, anjaha na pasuangkon ai mulak hu bani Juda, dob modom raja ai pakon ompungni.
Jerobeam na Paduahon na hun Israel
23Pasapuluh-limatahunkon dob bangkit raja i Juda si Amasia, anak ni si Joas, bangkit raja ma si Jerobeam, anak ni si Joas, manggomgom Israel i Samaria, ompat puluh sada tahun dokahni.
24Tapi ihorjahon do sogam ni uhur ni Jahowa, seng ipadaoh uhurni hun bani dousa ni si Jerobeam, anak ni si Nebat, na mambahen Israel mardousa.
25Ipasuang do parbalogan ni Israel, singgan ni Hamat das hu Laut Araba, romban hu bani hata ni Jahowa, Naibata ni Israel, na dob pinarbagah-Ni hinan marhitei hun bani juakjuak-Ni si Jona, anak ni si Amitai, ai ma nabi na hun huta Gad-Hefer.
26Ai domma itatap Jahowa hasombuhan ni Israel na parngit sahalian ai, ai domma siap na maposo sonai homa na magodang, anjaha seng dong be sipangurupi bani Israel.
27Tapi seng ongga ilumbahon Jahowa, paboa sihol siapkonon-Ni do goran ni Israel hun toruh ni langit, halani ai iurupi do sidea marhitei tangan ni si Jerobeam, anak ni si Joas ai.
28Barita na tading ope pasal si Jerobeam pakon haganup na hinorjahonni ampa hagarangonni, naha parporangonni, naha pambahenni laho pasuangkon bani Israel huta Damaskus pakon Hamat, na masuk hu Juda hinan, ai lang tarsurat do ai ibagas buku barita ni raja-raja ni Israel?
29Dob ai modom ma si Jerobeam rap pakon ompungni, raja-raja ni Israel, jadi si Sakarya, anak ni ai ma bangkit raja manggantihsi.