Dual PanelSi Hosea Raja ni Israel
1Pasapuluh-duatahunkon dob gabe raja i Juda si Ahas, bangkit raja ma si Hosea, anak ni si Ela manggomgom Israel i Samaria, siah tahun dokahni.
2Ihorjahon do sogam ni uhur ni Jahowa, tapi seng songon raja-raja ni Israel na parlobei hun bani.
3Tangkog ma si Salmanasar, raja ni Assur mangimbangsi; tapi ipaunduk ma dirini mambalosisi anjaha igalar ma bani sohei.
4Tapi dob tardapot Raja Assur si Hosea mambahen partahi-tahian (ai isuruh do suruhanni marayak Raja So, raja ni Masir, anjaha seng be ibere sohei hu bani Raja Assur, songon na somal ganup tahun ibahen), isuruh ma na manangkapsi, anjaha irantei ma ia ibagas tutupan.
5Dob ai iporang Raja Assur ma ganup tanoh ai, anjaha das ma ia hu Samaria, anjaha ihubu ma huta ai tolu tahun dokahni.
6Pasiahtahunkon dob raja si Hosea, italuhon Raja Assur ma Samaria, anjaha ibuangkon ma halak Israel hu Assur; ihatahon ma sidea marianan i Halah pakon i topi ni Bah Habor, ai ma bah na i tanoh Gosan ampa i huta-huta ni halak Madai.
Sababni ase Magou Harajaon ni Israel
7Masa pe sonai, halani na dob mardousa do halak Israel dompak Jahowa, Naibata ni sidea, na mangarahkon sidea tangkog hun tanoh Masir, hun bani kuasa ni Parao, raja ni Masir, anjaha marsombah sidea hu bani naibata na legan;
8anjaha iirikkon sidea do adat ni halak sipajuh begu-begu, na dob pinabali ni Jahowa hun lobei ni halak Israel, pakon hasomalan na tinombei ni raja-raja ni Israel.
9Marponop-ponop do halak Israel mambahen na so talup i lobei ni Jahowa, Naibata ni sidea. Ipauli sidea do panumbahan i atas buntu-buntu, ibagas ganup huta ni sidea, singgan ni manara parjagaan ronsi huta na binatar-bataran.
10Ipajongjong sidea do bani sidea tiang sisombah-sombahon pakon Ashera bani ganup buntu-buntu na gijang pakon i toruh ni ganup hayu na tabun.
11Manutung dahupa do sidea ijai i atas ni ganup buntu-buntu, usih songon pambahenan ni bangsa sipajuh begu-begu, na dob pinabali ni Jahowa hun lobei ni sidea. Ihorjahon sidea do horja hajahaton, laho mamuhoi ringis ni Jahowa;
12marsombah do sidea hu bani gana-gana, age domma ilumbahon Jahowa pasal ai bani sidea, “Seng bulih horjahononnima na sonin!”
13Domma ipalumba Jahowa homa Israel pakon Juda marhitei sagala nabi-Ni pakon sagala halak na marpanonggoran, nini, “Paubah hanima ma uhurnima hun bani dalannima na bajan in, anjaha ramotkon hanima ma tonah-Ku romban hu bani ganup titah, na dob Hutitahkon hu bani ompungnima, anjaha na dob Hutongoskon bannima marhitei hun bani juakjuak-Ku, nabi-nabi in.”
14Tapi seng ra sidea manangihon, lambin ipahengkeng sidea do uhurni usih songon hengkeng ni uhur ni ompung ni sidea, na so porsaya bani Jahowa Naibata ni sidea.
15Anjaha iteoskon uhur ni sidea do titah-Ni pakon padan na binahen-Ni ai hu bani ompung ni sidea, pakon lumba-lumba na nilumbahon-Ni hu bani sidea. Iirikkon sidea do gana-gana na so margagan, gabe ihorjahon homa na so margagan, anjaha itiru sidea do homa parlahou ni bangsa inggot ni sidea, age pe domma iparentahkon Jahowa hu bani sidea, ase ulang songon sidea marparlahou sidea.
16Tapi itadingkon uhur ni sidea do ganup tonah ni Jahowa, Naibata ni sidea, anjaha ibahen sidea do bani sidea dua gana-gana lombu na tinuang; ipauli sidea do sada Ashera, anjaha isombah sidea do ganup bala na i langit, sonai homa ibalosi sidea do baal.
17Itutung sidea do anakni pakon boru ni sidea bahen galangan, ihorjahon sidea do panjahaion pakon partondungon, anjaha ijualhon sidea do dirini mangkorjahon sogam ni uhur ni Jahowa, laho mamuhoi ringis ni Jahowa.
18Jadi manringis tumang ma Jahowa mangidah Israel, gabe ipadaoh ma sidea hun lobei-Ni; seng dong na tading sobali marga Juda tumang.
19Halak Juda pe homa seng iramotkon sidea tonah ni Jahowa Naibata ni sidea, tapi iirikkon sidea do hasomalan na tinombei ni halak Israel sandiri.
20Halani ai iambukkon Jahowa ma ganup ginompar ni Israel, ipatoruh ma sidea anjaha iondoskon hubagas tangan ni panrampok, paima iambukkon sidea ganup hun lobei ni.
21Ai dob isirangkon Israel dirini hun bani ginompar ni si Daud, anjaha irajahon sidea si Jerobeam, anak ni si Nebat, gabe marbalik ma Israel hun bani Jahowa ibahen si Jerobeam, anjaha iojur sidea mambahen dousa banggal.
22Jadi ihorjahon halak Israel ma ganup dousa ni si Jerobeam, na binahenni ai, anjaha seng ipasurut sidea dirini hunjai,
23paima ipadaoh Jahowa Israel hun lobei ni, songon na dob nilumbahon-Ni marhitei juakjuak-Ni, ai ma nabi-nabi-Ni. Sonai ma parbuang ni halak Israel hun tanohni hu Assur ronsi sadari on.
Halak Samaria
24Dob ai iboan Raja Assur ma halak hun Babel, Kutah, Awa, Hamat, pakon Separwaim, gabe ihatahon ma sidea marianan i huta Samaria gantih ni halak Israel, isoluk sidea ma Samaria anjaha marianan ibagas huta-huta ai.
25Tapi bani mungkahni marianan ma sidea ijai, seng marhabiaran sidea, bani Jahowa, gabe itongos Jahowa ma singa hu tongah-tongah ni sidea, na mambunuhi deba hun bani sidea.
26Dob ai nini sidea ma hu bani raja ni Assur, “Bangsa sipajuh begu-begu, na binoan anjaha nisolukkonmu in marianan ibagas huta na i Samaria, seng ibotoh sidea titah ni Naibata ni tanoh ia, halani ai itongos do singa hu tongah-tongah ni sidea, anjaha tonggor ma, domma ibunuhi sidea, halani na so binotoh ni sidea titah ni Naibata ni tanoh in.”
27Dob ai iparentahkon raja ni Assur ma, “Arahkon nasiam ma hujai sada halak hun bani malim, na dob binuangkon nasiam hunjai, ase laho ia marianan hujai, anjaha iajarhon titah ni Naibata ni tanoh ai.”
28Jadi roh ma sada halak hun bani malim na binuangkon ai hun Samaria, anjaha marianan ma ia i Betel, anjaha iajarhon ma bani sidea naha marhabiaran hu bani Jahowa.
29Tapi ganup bangsa ai marsibahen naibatani, anjaha ipannahkon ma ai hubagas rumah panumbahan na i atas buntu-buntu, na pinauli ni halak Samaria, ganup bangsa ibagas huta na niianan ni sidea bei.
30Halak Babel paulihon Sukot-Benot, halak Kut paulihon Nergal, halak Hamat paulihon Asima,
31halak Awa paulihon Nibhas pakon Tartak; anjaha halak Separwaim manutungi anakni ibagas apuy hu bani Adrammelek pakon hu bani Anamelek, ai ma naibata ni halak Separwaim.
32Ihabiari sidea do homa Jahowa, gabe ipabangkit sidea ma hun tongah-tongah ni sidea sahalak gabe malim bani rumah panumbahan na i atas ni buntu-buntu, na manggalang bani sidea i rumah panumbahan na i atas buntu-buntu ai.
33Marhabiaran do sidea bani Jahowa, tapi ibalosi sidea do homa naibata ni sidea, romban hu bani hasomalan ni ganup bangsa sipajuh begu-begu, harorohan ni sidea ai.
34Ronsi sadari on ibahen sidea romban hu bani hasomalan ni sidea sapari. Seng marhabiaran sidea hu bani Jahowa, anjaha seng iirikkon sidea ruhut barang aturan barang titah atap parentah, na pinarentahkon ni Jahowa hu bani ginompar ni si Jakob, na ginoranan-Ni Israel.
35Ibahen Jahowa do padan bani sidea, anjaha iparentahkon bani sidea, “Seng bulih marhabiaran hanima bani naibata na legan, barang marsombah hanima hujai barang balosannima ai barang manggalang hanima hujai,
36tapi maningon marhabiaran do hanima bani Jahowa, na mangarahkon hanima luar hun tanoh Masir marhitei hagogohon bolon pakon tangan na gostong, maningon hu bani do hanima manggalang.
37Anjaha aturan-Ni pakon uhum-Ni pakon titah-Ni ampa parentah-Ni, na sinuratkon-Ni bannima, maningon tulimat do hanima tongtong mangkorjahon ai. Seng bulih hanima marhabiaran bani naibata na legan,
38anjaha seng bulih halupahononnima padan na Hubahen in bannima. Seng bulih hanima marhabiaran bani naibata na legan,
39tapi maningon habiarannima do Jahowa Naibatanima, ase Ia paluahkon hanima hun bani tangan ni ganup munsuhnima.”
40Tapi age pe sonai, seng ra sidea manangihon, sai ihorjahon sidea do romban hu bani hasomalan ni sidea sapari.
41Ase marhabiaran do bangsa on bani Jahowa, tapi isombah sidea do homa gana-gana ni sidea; sonai homa anak ni sidea pakon pahompu ni sidea, songon na binahen ni bapa ni sidea, sonai do ibahen sidea ronsi sadari on.