Dual PanelIsuruh Naibata do Nabi Natan Manguhum si Daud
1Dob ai isuruh Jahowa ma si Natan hu bani si Daud. Dob das ia, nini ma hu bani, “Adong ma dua halak bani sada huta, na sada bayak, na sada nari masombuh.
2Buei tumang do biri-biri pakon lombu ni na bayak ai.
3Tapi na masombuh ai seng dong bani sobali sada anak ni biri-biri na binolini, ipainum do ai, jadi gabe banggal ma ai rapkon anakni; somal do ai mangan hun pangananni, minum hun panginumanni anjaha modom i abinganni, usih songon boruni do ai ibahen.
4Dob ai roh ma sada halak hu bani na bayak ai. Halani rugi iahap na bayak ai mambuat sada hun bani biri-birini barang lombuni ai bahen ambangan ni halak pardalan-dalan na roh marayaksi ai, gabe ibuat ma anak ni biri-biri ni halak na masombuh ai, anjaha ihoseihon ma ai bani halak na roh marayaksi ai.”
5Jadi gajag tumang ma ringis ni si Daud mangidah dalahi ai, nini ma dompak si Natan, “Songon sintongni manggoluh Jahowa maningon marutang hosah do dalahi, na mangkorjahon na sonai ai;
6anjaha maningon ompat hali lompit do pasuangonni biri-biri ai, halani sonai pambahenni, anjaha halani seng dong idop ni uhurni.”
7Dob ai nini si Natan ma dompak si Daud, “Ham do halak ai! Sonon do hata ni Jahowa, Naibata ni halak Israel, ʻAhu do na mamminaki ho gabe raja manggomgom halak Israel, anjaha Ahu do na paluahkon ho hun bani tangan ni si Saul;
8domma Hubere bam rumah ni tuanmu, pakon parinangon ni tuanmu hubagas abinganmu, anjaha domma Huberehon bam ginompar ni Israel pakon Juda; anjaha anggo porini maotiktu do ai, sihol tambahan-Ku ope namin bam barang sadiha nari.
9Mase ma mapas uhurmu bani hata ni Jahowa, laho mangkorjahon sogam ni uhur-Ni? Ibunuh ho do si Uria, halak Heti ai marhitei podang, ibuat ho do parinangonni ai bahen parinangonmu, anjaha ibunuh ho do ia marhitei podang ni halak Ammon.
10On pe seng be mosor podang hun rumahmu sadokah ni dokahni, halani na dob niapasanmai Ahu, anjaha ibuat ho parinangon ni si Uria, halak Heti ai bahen parinangonmu.ʼ
11Sonon do hata ni Jahowa, ʻTonggor ma, Ahu sandiri parrohkon bam hamagouan hun bani ginomparmu sandiri, anjaha buaton-Ku do parinangonmu hun lobei ni matamu, anjaha Hubere hu bani halak na legan, ase ihasomani parinangonmai modom i lobei ni mata ni ari.
12Ai na hinorjahonmai bani na ponop, patalaron-Ku ma ia i lobei ni ganup halak Israel pakon i lobei ni mata ni ari.ʼ”
13Dob ai nini si Daud ma dompak si Natan, “Domma mardousa ahu hu bani Jahowa!” Jadi nini si Natan ma dompak si Daud, “Antong, domma isasap Jahowa dousamu ai, seng be matei anggo ham.
14Tapi tene, halani na dob manrisai munsuh ni Jahowa marhitei pambahenanmu on, maningon matei do anak na sihol tubuh bamu ai.”
15Dob ai mulak ma si Natan hu rumahni. Tapi ilonsing Jahowa ma na etek-etek ai, na tinubuhkon ni parinangon ni si Uria bani si Daud, gabe boritan ma ia.
16Dob ai iparayak si Daud ma Naibata halani dakdanak ai; marpuasa ma ia, mulakkonsi ia, marbaju guni ma ia lanjar tibal bani tanoh layur bornginni ai.
17Dob ai roh ma pangintuai ni rumahni ai marayaksi, ielek-elek ma ia ase jongjong hun tanoh ai, tapi seng ra ia, anjaha seng ra ia mangan rap pakon sidea.
18Papituarihon matei ma dakdanak ai, tapi mabiar do juakjuak ni si Daud patugahkon na dob matei na etek-etek ai, ai nini uhur ni sidea do, “Tonggor ma, sanggah manggoluh ope dakdanak ai, iparsahapkon hanami do ia, hape seng itangihon soranami; ai lang bahenonni ma ra na masambor bani anggo na hatahon bani, domma matei na etek-etek ai?”
19Jadi dob iidah si Daud marsihusipan juakjuakni ai, ibotoh ma na dob matei na etek-etek ai, gabe nini si Daud ma dompak juakjuak ai, “Atene, domma matei na etek-etek ai?” Nini sidea na mambalosi, “Domma matei tongon.”
20Dob ai jongjong ma si Daud hun tanoh ai, marsuhap anjaha iminaki ma dirini, igantihi ma pakeianni, dob ai masuk ma ia hu Rumah ni Jahowa laho martonggo; jadi dob mulak ia hu rumahni, ihatahon ma na pasirsirhon sipanganon bani, lanjar mangan ma ia.
21Jadi nini juakjuakni ai ma hu bani, “Aha do na binahenmu on? Sanggah manggoluh ope na etek-etek ai, marpuasa do ham anjaha tangis, tapi dob matei na etek-etek ai jongjong do ham anjaha mangan.”
22Nini ma mambalosi, “Sanggah manggoluh ope na etek-etek ai, marpuasa do ahu anjaha tangis, ai nini uhurhu, ise mambotoh atap marpangulaki uhur ni Jahowa mangidah ahu, andohar manggoluh na etek-etek ai.
23Tapi nuan domma matei ia, mase marpuasa ope ahu? Ai tarbahen ahu be paulakkonsi? Ahu mando marayaksi, tapi anggo ia seng tumaram be mulak hu bangku.”
24Jadi dob iapohi si Daud uhur ni si Batseba parinangonni ai, iparayak ma ia, anjaha modom rap pakonsi. Jadi tubuhan anak ma ia, anjaha ibahen ma goran ni si Salomo. Holong do uhur ni Jahowa mangidahsi.
25Iondoskon ma ia bani Nabi Natan; igoran ma ia si Jedidia (artini na hinaholongan ni Jahowa) marhalanihon ni Jahowa.
Hamonangan ni si Daud Mangimbang Halak Ammon
26Sai iporangi si Joab do Rabba huta ni halak Ammon, gabe dapotsi ma huta pamatang ai.
27Dob ai isuruh si Joab ma suruhanni hu bani si Daud, nini ma, “Domma huporang Rabba anjaha domma hutaban homa huta na bani bah ai.
28Antong patumpu ma teba-teba ni bala in, anjaha hubu ham ma huta ai lanjar taluhon ham, ase ulang ahu manaban ai anjaha goranku tarambilan ijai.”
29Dob ai ipatumpu si Daud ma ganup bala ai anjaha bingkat ma ia hu Rabba mamorang huta ai lanjar ipatunduk.
30Ibuat ma sortali ni raja ni sidea hun bani uluni; ia boratni sada talenta omas do, anjaha adong do sada mata intan ijai; anjaha inahkon ma ai bani ulu ni si Daud. Iboan do homa taban-taban buei hun huta ai.
31Tapi iboan ma halak simbuei na ibagas huta ai, ipahorjahon ma sidea manjolom gargaji, pangongkal bosi, baliung, pakon manuang batu; sonai ma ibahen hu bani haganup huta ni halak Ammon. Dob ai mulak ma si Daud pakon ganup bala ai hu huta Jerusalem.