Alkitab Mobile SABDA
[VER] : [SIMALUNGUN]     [PL]  [PB] 
 <<  2 Samuel 17 >> 

Pingkiran ni si Ahitopel Isundati si Husai

1Dob ai nini si Ahitopel ma dompak si Absalom, “Palopas ma ahu mamilih sapuluh dua ribu halak, ase bingkat ahu mardakdak si Daud borngin on,

2ase hudorab ia, sanggah loja anjaha dayuk-dayuk ope tanganni, ase bajoraon ia hubahen, gabe maporus ganup halak simbuei na rap pakonsi ai. Raja ai tumang pe hubunuh,

3dob ai huboan ma ganup bangsa ai mulak bamu, songon tunangan na roh hu rumah hu bani paramangonni. Ai sahalak do hansa sibunuhonmu, tapi seng sikahuaon anggo halak na mabuei ai ganup.”

4Jadi rosuh ma si Absalom bani hata ai, sonai homa uhur ni ganup pangintuai ni halak Israel.

5Tapi nini si Absalom ma, “Dilo ma homa si Husia, halak Arki ai, ase tangar hita atap naha do pangkatahonni pasal ai.”

6Dob roh si Husai hu bani si Absalom, nini si Absalom ma hu bani, “Sonon do hata ni si Ahitopel, dear do bahenonta songon na hinatahonni ai? Anggo lang, naha ma hatamu?”

7Jadi nini si Husai ma dompak si Absalom, “Seng dear aturan na niaturhon ni si Ahitopel anggo sahali on.”

8Ambah ni ai nini si Husai ma, “Itanda ham do bapamu pakon hasoman-hasomanni, puanglima do sidea; gilani songon gipul na i ladang na magouan anak. Anjaha halak na somal marporang do bapamu, halani ai seng tumaram rap marborngin ia pakon halak simbuei ai.

9Tonggor ma, tontu marponop do ia nuan bani sada liang barang bani sada ianan na legan. Anjaha anggo mintor bani mula ni on matei deba na hun banta, mintor hatahonon ni na mambogeisi ma, ʻDomma talu halak na mangirikkon si Absalom!ʼ

10Gabe mintor gobir holi halak na garang, na barani songon singa; ai ganup do halak Israel mambotoh puanglima do bapanta anjaha halak na borani do hasomanni ai.

11Halani ai anggo ahu marpandapot, maningon patumpuon do lobei hu lambungmu, ganup halak Israel olat ni Dan das hu Berseba, songon horsik na i topi ni laut bueini, anjaha maningon ham sandiri mambobahon sidea.

12Anggo jumpah hita ma ia bani sada ianan, barang ija pe jumpah hita ia, mintor dorab hita ma ia, songon pardabuh ni namur hu tanoh, anjaha tontu sahalak pe lang na manggoluh be, ia age halak na rapkonsi ai pe.

13Tapi porini surut ia hu bani sada huta, nahkonon ni haganup halak Israel ma tali hu huta ai, anjaha rintak hita ma ai das hu habungan, ronsi sada batu etek-etek pe lang jumpah ijai.”

14Dob ai nini si Absalom pakon ganup halak Israel ma, “Dearan do pandapot ni si Husai, halak Arki ai, ase pandapot ni si Ahitopel. Tapi Jahowa do na mangatur ai, laho manundati tahi ni si Ahitopel sidearan ai, ase tarparroh Jahowa hamagouan hu bani si Absalom.”

15Dob ai nini si Husai ma dompak Malim Sadok pakon dompak Malim Abyatar, “Sonon, sonon do iaturhon si Ahitopel hu bani si Absalom pakon hu bani pangintuai ni halak Israel, tapi sonon do huaturhon.

16On pe podas ma suruh nasiam halak laho patugahkon hu bani si Daud, ʻUlang ham marborngin bani pandiparan i halimisan, tapi podas ma ham mandipar, ase ulang hona bondut raja in pakon halak simbuei ai na rap pakonsi.ʼ”

17Tapi anggo si Jonatan pakon si Ahimas, jongjong do i lambung ni parigi Rogel paimahon. Dob ai laho ma sada jabolon naboru patugahkon ai bani sidea, ase sidea laho patugahkon ai hu bani Raja Daud; ai seng bulih taridah sidea masuk hu huta ai.

18Hape iidah sada na maposo do sidea ai, anjaha ipatugah ma ai hu bani si Absalom; dob ai podas ma sidea na dua ai laho, gabe das ma sidea hu rumah ni sada halak paramangon i Bahurim; adong do sada bani parigi i alamanni, jadi tuad ma sidea hubagas.

19Dob ai ibuat anjaha iherbangkon naboru ai ma apei i atas ni parigi ai, lanjar itirtirhon gandum ijai gabe seng dong be na mambotoh ai.

20Dob das juakjuak ni si Absalom hu bani naboru ai i rumah, nini sidea ma, “Ija do si Ahimas pakon si Jonatan?” Jadi nini naboru ai ma hu bani sidea, “Domma idipari sidea bah ai.” Jadi dob ipindahi sidea, hape lanjar seng jumpah, mulak ma sidea hu Jerusalem.

21Dob laho halak ai manaik ma sidea hun parigi ai, lanjar laho mamboan barita ai hu bani Raja Daud. Nini sidea ma hu bani Raja Daud, “Bingkat ma nasiam, podas ma dipari nasiam bah in, ai sonon do iaturhon si Ahitopel mangimbang nasiam.”

22Jadi bingkat ma si Daud pakon ganup halak simbuei na rap pakonsi ai, anjaha idipari sidea ma Bah Jordan ai; siangkonsi ari sahalak pe lang dong be na tading na so mandipari Bah Jordan ai.

23Tapi dob iidah si Ahitopel na so idalankon aturan ai, ipalanai ma halodeni, lanjar bingkat ma ia mulak hu rumahni, hu hutani. Dob ipatorsa ganup pasal rumahni ai, idoloskon ma dirini; matei ma ia anjaha itanom bani tanoman ni bapani.

Si Daud i Mahanaim

24Dob ai das ma si Daud hu Mahanaim. Si Absalom pe idipari ma Bah Jordan rap pakon ganup halak Israel.

25Si Amasa do ipabangkit si Absalom gabe pambobai ni bala ai, gantih ni si Joab. Ia si Amasa, ai ma anak ni sada paramangon, na margoran si Jitera, halak Ismael, na mambuat si Abigal, boru ni si Nahas, anggi ni si Seruya, inang ni si Joab.

26Dob ai marsaran ma halak Israel pakon si Absalom i tanoh Gilead.

27Jadi dob das si Daud hu Mahanaim, roh ma si Sobi, anak ni si Nahas, hun Rabba, huta ni halak Ammon pakon si Mahir, anak ni si Amiel hun Lodebar, ampa si Barsillai halak Gilead hun Rogelim,

28iboan sidea ma podoman, hudon pakon pinggan, gandum, omei, nitak, pinahpah, hasang, dali,

29manisan ni huramah, mantega, biri-biri pakon keju ni lombu bahen panganon ni si Daud pakon hasomanni ai, ai nini uhur ni sidea, ʻTontu domma loheian, latih anjaha horahan halak simbuei ai i halimisan.ʼ


  Share Facebook  |  Share Twitter

 <<  2 Samuel 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel