Alkitab Mobile SABDA
[VER] : [SIMALUNGUN]     [PL]  [PB] 
 <<  2 Samuel 22 >> 

Doding Puji-pujian ni si Daud

1Dob ai ihatahon si Daud ma hu bani Jahowa hata ni doding on, bani ari sanggah na pinaluah ni Jahowa ia hun bani tangan ni ganup munsuhni pakon hun bani tangan ni si Saul.

2Nini ma, “Jahowa do batu gingging bangku, batar-batarhu pakon na paluahkon ahu.

3Naibatangku, batu ginggingku, hatengeran ni uhur bangku, gantarhu pakon tanduk ni haluahonku, paronding-ondinganku pakon haporusanku, pangurupi bangku, na mangurupi ahu hun bani odoh-odoh.

4Sai dilo-dilo do ahu bani Jahowa, na talup sipujion in, gabe maluah ma ahu hun bani munsuhku.

5Iinggoti gilumbang ni hamateian do ahu, isonggoti bah hajahaton.

6Isangkut rantei ni nagori toruh do ahu, siding hamateian tagang dompak ahu.

7Hudilo ma Jahowa bani hasosakankai; Naibata do hudilo. Gabe itangihon do sorangku hun rumah-Ni, anjaha das do doruhku hu pinggol-Ni.

8Jadi dugur ma tanoh on, onjolan ni langit pe hitir, anjaha murdug do halani marah-Ni.

9Luar ma timus hun igung-Ni, pakon apuy na mangankon hun bani pamangan-Ni; narnar na gara marjimbur hun bani.

10Iondun ma langit, tuad ma Ia; golap marimpot-impot do i toruh ni nahei-Ni.

11Mangajak herub do Ia, anjaha habang mayab-ayab bani habong ni logou.

12Ibahen do hagolapan bahen lampo-lampo-Ni inggot Bani, bah na mamirong pakon hombun na mahapal.

13Marjimbur do gara ni apuy hun bani haliharon na i lobei-Ni.

14Ipahata Jahowa do longgur hun langit, anjaha ipabogeihon sigijangan ai do sora-Ni.

15Ipanahkon do panah-Ni ase mambur merap sidea, ibahen do mardejeb-dejeb hilap mardakdak sidea.

16Gabe taridah ma holbung ni laut, anjaha talag onjolan ni dunia on, halani pangasupi ni Jahowa, halani pangunsong ni hosah ni igung-Ni.

17Idurdurhon do tangan-Ni hun datas laho manangkap ahu, irintak do ahu hun bah marbanggal.

18Ipaluah do ahu hun bani munsuhku na gogoh, hun bani na marsogam ni uhur bangku, na gogohan hun bangku.

19Idorab sidea do ahu bani ari hasunsahanku; tapi Jahowa do arihanku.

20Itogu do ahu bani ianan na lumbang; ipaluah do ahu, halani rosuh do uhur-Ni mangidah ahu.

21Ibalaskon Jahowa do hu bangku romban hu bani hapintoranku, romban hu bani haborsihon ni tanganku ipasuang bangku.

22Ai huirikkon do dalan ni Jahowa, anjaha lang manjahati ahu, marbalik hun bani Naibata.

23Ai tongtong do i lobeihu sagala uhum-Ni, anjaha titah-Ni seng hupadaoh hun bangku.

24Bujur do ahu i lobei-Ni, anjaha hujaga do diringku dompak hajahaton.

25Jadi ibalaskon Jahowa ma hu bangku romban hu bani hapintoranku, romban hu bani hapansingonku, niidah-Ni ai.

26Bani halak na bonar, bonar do Ham; bani halak na bujur, bujur do Ham.

27Ipatuduhkon Ham do hapansingon-Mu bani halak na pansing, tapi gila do uhur-Mu bani halak pargeduk.

28Ipaluah Ham do bangsa na toruh maruhur, tapi ipatoruh Ham do paruhur na gijang.

29Ai Ham do alo Jahowa, palita bangku, anjaha ipalihar Ham do hagolapanku.

30Ai marhasomankon Ham tardorab ahu do bala ni munsuh, anjaha mangunsagahkon Naibatangku tarlumpati ahu tembok.

31Gokan dear do dalan ni Naibatangku, pitah do hata ni Jahowa; Ia do gantar ni ganup halak, na martenger ni uhur Bani.

32Ai ise ma Naibata, sobali Jahowa? Anjaha ise ma batar-batar sobali Naibatanta?

33Naibata do haporusanku na toguh, anjaha ipajorei do dalanku.

34Ia do mambahen naheihu songon nahei ni ursa tini, anjaha ipajongjong do ahu jorgit i atas buntu-buntu.

35Ia do mangajari tanganku marmunsuh gabe pandei tanganku manintak panah tombaga.

36Ibere Ham do bangku gantar ni haluahon-Mu, anjaha halayakon-Mu do patimbulhon ahu.

37Ipalumbang Ham do ianan panlangkahanku, anjaha seng tarlandit naheihu.

38Sai hupardakdak do munsuhku anjaha siap sidea hubahen, anjaha seng mulak ahu, paima rasei sidea.

39Huropuki anjaha husiapkon do sidea, radag do sidea i toruh ni naheihu.

40Igonditkon Ham do bangku hagogohon mangkorjahon hamunsuhon, ipaunduk Ham do munsuhku bangku i toruhku.

41Ipamundur Ham do munsuhku i lobeihu, gabe siap hubahen na marsogam ni uhur bangku.

42Sai mangkawah do sidea, tapi seng dong na paluahkon; doruh-doruh do sidea bani Jahowa, tapi seng itangihon sidea.

43Jadi hulumati ma sidea songon orbuk ni tanoh, hulotloti sidea songon hubang i alaman.

44Domma ipaluah Ham ahu hun bani partinggilan dompak bangsangku; ipabangkit Ham do ahu gabe kopala ni bangsa sipajuh begu-begu; bangsa na so hutanda pe ibalosi do ahu.

45Roh do bangsa na legan marsombah bangku; ijin ibogei sidea pasal ahu, mintor ibalosi sidea do ahu.

46Mandatei do iahap bangsa na legan, gobir do sidea luar hun batar-batarni.

47Manggoluh do Jahowa; sai tarpuji ma batu ginggingkin, anjaha sai timbul ma Naibatangku, batu gingging ni hatuahonku.

48Naibata do na mambere pambalason bangku, anjaha na patundukkon bangsa-bangsa bangku,

49Ham do na paluahkon ahu hun bani munsuhku; Ham do tongon na patimbulhon ahu mangimbang sipanlawan dompak ahu; Ham do na paluahkon ahu hun bani jolma sibahen gogoh.

50Halani ai pujionku ma Ham, alo Jahowa, i tongah-tongah ni bangsa sipajuh begu-begu, anjaha dodingkononku ma goran-Mu.

51Ia do sibere hatuahon hu bani raja-Ni, anjaha ipatuduhkon do idop ni uhur-Ni hu bani na mininakan-Ni, hu bani si Daud pakon hu bani ginomparni ronsi sadokah ni dokahni.”


  Share Facebook  |  Share Twitter

 <<  2 Samuel 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel