Dual PanelSi Rehabeam Ilanglangi Nabi Semaya Marmunsuh dompak Israel
1Jadi dob das si Rehabeam i Jerusalem, ipatumpu ma ganup ginompar ni Juda pakon Benjamin, saratus ualuh puluh ribu halak siparmunsuh na pinilih, sihol marmunsuh dompak Israel, laho pasuangkon harajaon ai bani si Rehabeam.
2Tapi roh ma hata ni Jahowa hubani si Semaya, halak ni Naibata ai, sonon,
3“Hatahon ma hubani si Rehabeam, anak ni si Salomo, raja ni Juda pakon hubani ganup Israel, na i Juda ampa na i Benjamin.
4Sonon do hata ni Jahowa, ʻSeng bulih nasiam tangkog, laho marporang dompak sanina nasiam. Mulak ma nasiam ganup hu rumahni bei, ai hun Bangku do harorohan ni ai.ʼ” Itangihon sidea do hata ni Jahowa, mulak ma sidea, seng saud laho sidea manjumpahkon si Jerobeam.
Panrajaion ni si Rehabeam
5Marianan i Jerusalem do si Rehabeam. Jadi ipauli ma huta i Juda bahen partahanan,
6ai ma Betlehem, Etam, Tekoa,
7Bet-Sur, Soko, Adullam,
8Gat, Maresa, Sip,
9Adoraim, Lakis, Aseka,
10Sorea, Ayalon ampa Hebron; ai ma huta na marbatar-batar i Juda pakon i Benjamin.
11Ipatoguh do sagala benteng ai, anjaha inahkon hujai puanglima, ambahni ai bohal, minak pakon anggur.
12Inahkon do homa hubagas ganup huta ai gantar pakon tanja, anjaha toguh tumang do sagala huta ai ibahen. Ase mambalosi hubani do Juda pakon Benjamin.
Maporus Malim pakon Halak Levi hu Jerusalem
13Dob ai martumpu ma malim pakon halak Levi na i sab Israel, humbani ganup ianan, na niiankon ni sidea, laho marayak si Rehabeam.
14Ai itadingkon halak Levi do tanoh ni sidea ampa ugas-ugas ni sidea, gabe laho ma sidea hu Juda pakon Jerusalem. Ai ipabali si Jerobeam ampa anakni ai do sidea hun jabatan hamalimon i lobei ni Jahowa,
15anjaha ipabangkit ma malimni, i rumah panumbahan na i buntu-buntu, bani begu-begu juma pakon bani lombu na pinaulini ai.
16Mangihut do homa hubani halak Levi humbani ganup marga ni halak Israel, halak na mangindahi Jahowa, Naibata ni Israel, humbani gok ni uhur ni sidea; roh do sidea hu Jerusalem manggalang hubani Jahowa, Naibata ni ompung ni sidea.
17Ipatoguh sidea ma harajaon ni Juda anjaha ipatotap sidea ma panrajaion ni si Rehabeam, anak ni si Salomo, tolu tahun dokahni; ai tolu tahun do sidea mardalan bani dalan ni si Daud ampa si Salomo.
Parinangon ampa Anak ni si Rehabeam
18Dob ai ibuat si Rehabeam ma si Mahalat, boru ni si Jerimot, anak ni si Daud, tinubuhkon ni si Abihail, boru ni si Eliab, anak ni si Isai, gabe parinangonni.
19Jadi itubuhkon ma bani anak: Si Jehus, si Semarya pakon si Saham.
20Dob ai ibuat use ma si Maeka, boru ni si Absalom, na manubuhkon bani: Si Abia, si Atai, si Sisa pakon si Selomit.
21Tapi holongan do uhur ni si Rehabeam mangidah si Maeka, boru ni si Absalom ase mangidah haganup parinangonni pakon binuatni na legan, ai adong do sapuluh ualuh parinangonni anjaha onom puluh binuatni na legan anjaha itubuhkon ma bani dua puluh ualuh anak pakon onom puluh boru.
22Ipabangkit si Rehabeam do si Abia, anak ni si Maeka, gabe pambobai anjaha kopala i tongah-tongah ni saninani, ai ia do sihol pabangkitonni gabe raja.
23Anjaha pantas do pambahenanni, marhitei na nierapni deba humbani anakni hu sab tanoh Juda pakon Benjamin ibagas ganup huta na binatar-bataranni ai, anjaha ibere do bani sidea sipanganon marlobih-lobih anjaha iririd do bani sidea parinangon.