Alkitab Mobile SABDA
[VER] : [SIMALUNGUN]     [PL]  [PB] 
 <<  2 Tawarikh 2 >> 

Parpadanan ni si Salomo pakon Raja Hiram

1Dob ai iparentahkon si Salomo ma pajongjongkon sada rumah bani goran ni Jahowa pakon sada rumah harajaon bani sandiri.

2Itotapkon si Salomo ma pitu puluh ribu halak sipanaruhi, ualuh puluh ribu halak sibarbar batu i atas dolog, anjaha tolu ribu onom ratus halak mandur bani sidea.

3Dob ai isuruh si Salomo ma suruhanni marayak si Hiram, raja hun Tirus, nini ma, “Songon na binahenmu hubani bapa, si Daud, ai ma na manongosi hayu ares bani, laho pajongjongkon sada rumah bahen iananni, sonai ma bahen ham hu bangku.

4Tonggor ma, sihol do pajongjongonku sada rumah bani goran ni Jahowa, Naibatangku, anjaha papansingkon Bani, laho mamboan hu lobei-Ni dahupa na misbou, ruti sigalangkonon na manotap, pakon galangan situtungon sogod ampa bodari bani ari Sabat, bani poltak ni bulan ampa bani pesta ni Jahowa, Naibatanami, songon na dob tinotapkon sadokah ni dokahni bani Israel.

5Anjaha rumah panumbahan sipajongjongonkai, maningon banggal do, ai banggalan do Naibatanami humbani sagala naibata na legan.

6Tapi tene ise ma na boi pajongjong sada rumah Bani, ai gari langit ni langitan seng tarhamkamsi Ia? Ise ma ahu, ase ahu pajongjong sada rumah Bani? Pitah laho manutung dahupa namin i lobei-Ni.

7On pe suruh ham ma bangku sada halak na pandei mangkorjahon omas, pirak, tombaga, bosi, hiou saholat sigerger pakon hiou saholat simahonda, sonai homa na pandei manguhir, laho mangkasomani siparhorja na pandei, na adong i lambungku i Juda pakon i Jerusalem, ai ma na pinabangkit ni bapa, si Daud.

8Tongoshon ham ma homa bangku hayu ares, sampinur pakon ingul hun Libanon, ai hubotoh, na pandei do juakjuakmu pauli hayu i Libanon. juakjuakku pe mangkasomani juakjuakmu,

9laho pasirsirhon parhayu bangku, buei tumang, ai rumah na sihol paulionkai, maningon banggal anjaha jombut do.

10Anjaha tonggor ma, bereonku do hubani juakjuakmu, ai ma sipanroboh hayu, na pauli parhayu ai, dua puluh ribu kor gandum, dua puluh ribu kor andolei, dua puluh ribu bat anggur ampa dua puluh ribu bat minak.”

11Dob ai nini si Hiram, raja hun Tirus ma ibagas surat na tinongoskonni ai hubani si Salomo, “Halani holong ni uhur ni Jahowa bani bangsa-Ni, ai do ase ipabangkit ham gabe raja manggomgomi sidea.”

12Ambah ni ai nini si Hiram do, “Pinuji ma Jahowa, Naibata ni Israel, na manompa langit pakon tanoh, na mamberehon bani raja Daud sada anak na pentar, na pantas maruhur anjaha na pandei martimbang, na marsura-sura pajongjong sada Rumah bani Jahowa ampa sada rumah harajaon bani sandiri.

13Halani ai, husuruh do sada halak na pentar, na pandei martimbang, ai ma si Huram-Abi,

14anak ni sada naboru, humbani ginompar ni si Dan, tapi anggo bapani halak Tirus do. Na pentar do ia mangkorjahon omas, pirak, tombaga, bosi, batu pakon hayu, hiou saholat na gerger, hiou saholat na mahonda, hiou silopak na alus ampa hiou na tinubar, na pandei manguhir ampa mamingkiri bagei-bagei ni horja na laingan na niondoskon hu bani, laho mangkasomani halak na pentar, na adong bamu ampa bani tuanku, bapanta si Daud.

15Antong itongoskon tuanku ma hubani juakjuakni gandum pakon andolei minak pakon anggur, na dob pinarbagahni ai;

16ase iroboh hanami hayu i Libanon barang sadiha na porlu bamu, hanami pe mamboan ai marrakit-rakit i laut hu Joppe, anjaha ham ma use mamboan ai tangkog hu Jerusalem.”

17Dob ai ibilang si Salomo ma ganup halak dagang na adong i tanoh Israel, mangihutkon pamilangon na binahen ni bapani, si Daud, bani sidea; jadi jumpah ma saratus lima puluh tolu ribu onom ratus halak bueini.

18Jadi ipapulig ma hunjai pitu puluh ribu halak sipanaruhi, ualuh puluh ribu halak sibarbar batu i dolog, anjaha tolu ribu onom ratus halak gabe mandur, na mangatur halak simbuei marhorja.


  Share Facebook  |  Share Twitter

 <<  2 Tawarikh 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel