Dual PanelHorja Pambangunan ampa Horja Rodi, na Binahen ni si Salomo
1Jadi dob salpu na dua puluh tahun ai, ai ma dokahni si Salomo pajongjong Rumah ni Jahowa pakon rumahni sandiri,
2(ipauli si Salomo do homa huta, na pinaulak ni si Hiram hubani si Salomo, anjaha isuruh halak Israel ijai marianan),
3laho ma si Salomo hu Hamat-Soba, anjaha italuhon ma ai.
4Ibatar-batari ma huta Tadmor, na i halimisan, pakon ganup huta parbohalan, na pinajongjongni i Hamat.
5Ibatar-batari ma homa Bethoron pardolog pakon Bethoron parbornoh, martembok, marhorbangan ampa marransang-ransang.
6Sonai homa Baalat pakon ganup huta parbohalan, na adong bani si Salomo, sonai age ganup sinurasurahonni sipajongjongonni i Jerusalem, i Libanon ampa bani ganup tanoh gomgomanni ai.
7Haganup halak, simasima ni halak Heti, Amori, Peresi ampa Jebusi, ai ma na so humbani halak Israel,
8ginompar ni sidea, na tading ipudi ni sidea i tanoh in, na so siniapkon ni halak Israel, sidea ma na marrodi ibahen si Salomo, anjaha sonai do ronsi sadari on.
9Tapi anggo humbani halak Israel seng adong age sahalak na hona rodi ibahen si Salomo; gabe halak siparporang do sidea ibahen, gabe kopala ni balani pakon kopala ni gareta porangni pakon siajak hudani.
10Lanjar sidea do juakjuak bolon ni si Salomo, na mamarentah bangsa ai, dua ratus lima puluh halak bueini.
11Dob ai iboan si Salomo ma tangkog boru ni Parao hun huta ni si Daud hu rumah na pinaulini ai bani, ai nini do, “Seng dear marianan parinangonku i rumah ni si Daud, raja ni Israel, ai pansing do ianan ai, halani ongga ijai poti ni Jahowa.”
12Ijai ma igalangkon si Salomo galangan situtungon hubani Jahowa i atas anjapanjap ni Jahowa, na pinajongjongni ai,
13ganup bani arini bei igalangkon romban hubani tonah ni si Musa, ai ma bani ari Sabat, bani poltak ni bulan pakon bani pesta sitolu hali satahun: Pesta ruti na so niigaran, pesta sisaminggu pakon pesta parlampolampoan.
14Romban hubani aturan, na binahen ni si Daud bapani ai, itontuhon raja ai ma parbagianan ni malim bani horjani bei, sonai homa horja ni halak Levi, ai ma mamuji pakon marugas mangurupi malim, songon na dob tinonahkon bani sidea ganup ari; sonai homa horja bani sijaga horbangan mangihutkon parbagianan bani ganup horbangan, ai sonai do parentah ni si Daud, halak ni Naibata ai.
15Seng manlembang sidea humbani na dob pinarentahkon ni raja ai hubani malim pakon halak Levi ai, pasal atap aha pe ronsi pasal arta-arta ai.
16Sonai ma pardob ni ganup horja ni si Salomo, singgan ni parjongjong ni onjolan ni Rumah ni Jahowa das hubani na dob rumah panumbahan ai marhitei si Salomo.
Parkapalon ni si Salomo
17Dob ai laho ma si Salomo hu Ezion-Geber pakon hu Elat, na i topi ni Laut Sigerger, i tanoh ni halak Edom.
18Itongos si Hiram do bani kapal marhitei juakjuakni pakon halak na somal marlayar i laut. Laho do sidea hu Opir rap pakon juakjuak ni si Salomo, anjaha iboan sidea do hunjai omas ompat ratus lima puluh talenta bueini, anjaha iboan ma ai bani raja Salomo.