Dual PanelPanonggoran na Parlobei: Balang
1Sonon do ipataridahkon Tuhan Jahowa bangku, “Tonggor ma, manjadihon balang do Ia bani mulani martumbor poyon-poyon, anjaha tonggor ma, sagak ni panabian ni raja in do ai.”
2Jadi dob bois igagati suan-suanan ni tanoh ai, ningku ma, “Ham Tuhan Jahowa, marpangulaki ma uhur-Mu! Sonaha ma partahan ni Jakob jongjong? Etek tumang do ia.”
3Jadi marpangulaki ma uhur ni Jahowa pasal ai. “Seng pala saud be in,” nini Jahowa.
Panonggoran na Paduahon: Apuy na Mangankon
4Sonon do ipataridahkon Jahowa bangku: Tonggor ma, idilo Tuhan Jahowa do apuy laho manguhum, domma pala iboiskon luhung bagas ai, anjaha ipangan homa tanoh ai.
5Jadi ningku ma, Ham Tuhan Jahowa, “Mahua parontihon Ham ma in! Sonaha ma partahan ni Jakob jongjong! Etek tumang do ia.”
6Jadi marpangulaki ma uhur ni Jahowa pasal ai. “On pe seng pala saud be,” nini Tuhan Naibata.
Panonggoran na Patoluhon
7Sonon do ipataridahkon Jahowa bangku: Tonggor ma, jongjong do Tuhan in i atas ni sada tembok, manjolom batu baragu ibagas tanganni.
8Dob ai nini Jahowa ma hu bangku, “Aha do na nididahmin Amos?” Ningku ma, “Sada batu baragu.” Dob ai nini Tuhan ma, “Tonggor ma, Hupagistang do batu baragu i tongah-tongah ni bangsang-Ku, Israel. Seng marpangulaki be uhur-Hu mangidahsi.
9Maningon tarulang ma paturuton tanoh dolog ni si Isak, anjaha sedaonkon rumah panumbahan ni Israel, anjaha Ahu jongjong mangimbang ginompar ni si Jerobeam marhitei podang.”
Hona Usir si Amos
10Jadi isuruh si Amasia, malim ni Betel ma suruhanni hu bani si Jerobeam, raja ni Israel, nini ma, “Martahi-tahi do si Amos dompak ham i tongah-tongah ni ginompar ni Israel, seng tartaron tanoh in hata-hatani ganup.
11Ai sonon do nini si Amos, ʻManingon matei si Jerobeam marhitei podang, anjaha maningon tarbuang Israel daoh hun tanohni.ʼ”
12Dob ai nini si Amasia ma dompak si Amos, “E, parpanonggoran, laho ma ho, maporus hu tanoh Juda, anjaha ijai ma ho mangan ruti, anjaha ijai ma ho manjahai!
13Ulang ma nunuti manjahai anggo i Betel, ai huta hapansingon ni raja in do in, anjaha rumah panumbahan harajaon.”
14Dob ai ibalosi si Amos ma si Amasia, “Seng nabi namin ahu barang anak ni nabi, tapi parmahan do ahu anjaha sipaturei-turei hayu ara.
15Tapi ibuat Jahowa do ahu humbani na mangalai biribiri, anjaha ihatahon Jahowa hu bangku, ʻLaho ne, manjahai dompak bangsang-Ku Israel!ʼ
16On pe, tangihon ma hata ni Jahowa. Nimu, ʻUlang ho manjahai dompak Israel, anjaha ulang hatahon hatamu dompak ginompar ni si Isak.ʼ
17Halani ai, sonon do hata ni Jahowa, ʻGabe boru jalang ma parinangonmu ibagas huta, anjaha anakmu pakon borumu rasei ma ibahen podang, anjaha bagion tanohmu marhitei tali sibar-sibar; anjaha ho sandiri matei i tanoh na mabutak, anjaha Israel maningon tarbuang daoh hun tanohni.ʼ”