Dual PanelSambatni
1Halak na mangkarosuhkon sipaingat, ai ma siharosuhkon habotohon, tapi na mangkagigihon pinsang-pinsang, ai ma jolma na bodoh.
2Halak sidear uhur gabe harosuh do bani Jahowa, tapi halak paruhur jahat hona uhum-Ni do.
3Seng anjai totap jolma sihorjahon hajahaton, tapi jonam do urat ni halak parpintor.
4Parinangon na madear sortali do ai bani paramangonni, tapi na sambor parlahouni gilok-gilok na harat-harat do ai ibagas holi-holini.
5Pingkiran ni halak parpintor sintong do ai, tapi riah ni halak parjahat ladung do.
6Riah ni halak parjahat sihol manduruskon daroh, tapi pamangan ni halak parpintor paluahkon do.
7Hona dabuhkon do halak parjahat gabe seng dong be, tapi totap do anggo rumah ni halak parpintor.
8Domu hubani hapentaranni do tarpuji sada dalahi, tapi parakal-akal hona apasan do.
9Dearan do gabe halak na maetek, na mannunuti horjani sandiri, humbani na pajuntul-juntulhon diri, hape hurangan sipanganon.
10Ibotoh halak parpintor do uhur ni pinahanni, tapi uhur ni halak parjahat kejam do.
11Halak sihorjaon jumani sungkupan do bani sipanganon, tapi halak na paihut-ihut na so marguna, halak na bodoh do.
12Sura-sura ni halak parjahat sihol mambahen hajahaton, tapi urat ni halak parpintor parohkon buah.
13Hona tangkap do halak parjahat marhitei lepak ni parsahapni, tapi sai maluah do halak parpintor humbani hasosakanni.
14Marhitei buah ni parsahapni do bosuran halak bani na madear, anjaha hinorjahon ni tanganni mulak hu bani.
15Dalan ni halak na bodoh, pintor do ai ninuhurni, tapi halak na manangihon sipaingat, ai ma na maruhur.
16Halak na bodoh mintor do ipataridahkon gilani, tapi halak na maruhur irungkub do apas-apas na hu bani.
17Saksi na sintong manluarhon na sintong, tapi saksi palsu mansahapkon ladung.
18Sahap ni halak sihampung parsahap songon paniham ni podang do, tapi songon tambat do dilah ni halak na maruhur.
19Bibir na sintong totap do lalab, tapi dilah sipaoto-oto tongkin do ai hansa.
20Akal-akal do marianan ibagas uhur ni halak partahi-tahi, tapi malas ni uhur do bani halak sisuan damei.
21Seng anjai mangonai hamagouan bani halak parpintor, tapi halak parjahat igoki hasunsahan do.
22Hagigi ni Jahowa do bibir siparladung, tapi marosuh do Ia bani sihorjahon hasintongan.
23Halak na pentar masip do ia pasal habotohonni, tapi halak na bodoh maningtingkon haotoonni.
24Tangan ni halak na ringgas do na marrajai, tapi halak parrayoh gabe sisuruh-suruhan.
25Holsoh ibagas uhur patunduk jolma, tapi parsahap na basar pahinsah uhur.
26Halak parpintor dapotan sampalan, tapi dalan ni halak parjahat mambahensi kahou.
27Halak parrayoh seng dapotan buruanni, tapi lambin bayak do anggo halak na ringgas.
28Bani dalan hapintoron do jumpah hagoluhan, tapi dalan na masambor manuju hu hamatean.