Dual Panel1Hapentaran ni naboru mambahen dear rumah tanggani, tapi na oto iparseda do marhitei tanganni sandiri.
2Halak na mardalan bani dalan na pintor, mabiar do ai bani Jahowa, tapi halak na geduk pardalanni, mapas do Ia bani.
3Pamangan ni halak na oto do lonsing-lonsing bani gurungni, tapi bibir ni halak na pentar ai do marramotkonsi.
4Anggo seng dong lombu na maninggala, lumei do tuangan, tapi buei do sipariamaan marhitei lombu jonggi na gogoh.
5Saksi na sintong seng ra marladung, tapi ladung do iluarhon saksi palsu.
6Halak sipanrisai mangindahi hapentaran, hape soya do; tapi halak na maruhur urah do dapotan habotohon.
7Simbili ma halak na bodoh, ai seng dong jumpah so hata hapentaran hun bani.
8Hapentaran ni siparuhur ai ma: ibotoh do dalanni; tapi haotoon ni halak na bodoh pakahouhon do.
9Mapas do uhur ni halak na oto bani galangan pardousaon, tapi marosuh do halak parpintor bani ai.
10Uhur ai do na mambotoh na maborit ibagas dirini, malas ni uhurni pe seng boi ahapkonon ni na legan.
11rumah ni halak parjahat maningon marumbak do, tapi mardohar do lampolampo ni halak parpintor.
12Adong do dalan, pintor do ai ninuhur ni halak, hape ujungni gabe dalan hamatean do.
13Ibagas tawa pe dong do pusok ni uhur, anjaha bani malas ni uhur mangihut horu ni uhur.
14Marhitei ulahni sihol ipabosur siparbalik uhurni, tapi sidear uhur marhitei pambahenanni na madear.
15Halak na bodoh porsaya do bani sagala sahap, tapi halak na maruhur itimbangi do langkah-langkahni.
16Marhabiaran do halak na maruhur anjaha isimbili do hajahaton, tapi halak na bodoh seng marrantei marparlahou anjaha raus.
17Halak parringis ihorjahon do habodohon, anjaha ihagigihon halak do partahi-tahi.
18Halak na oto marrupei bani haotoon, tapi habotohon do sortali ni siparuhur.
19Tunduk do halak na jahat bani sidear uhur, anjaha halak na jungkat mangindo-indo bani labah ni parpintor.
20Age sindohorni magigi do mangidah halak na masombuh, tapi buei do huan-kuan bani halak na bayak.
21Pardousa do halak na mangapasi hasomanni, tapi martuah do halak na marholong ni atei bani na madoyuk.
22Mintor lang ma kahou halak siuhurhon hajahaton? Tapi idop ni uhur ampa bujur ni uhur do rupei ni sipingkirhon na madear.
23Ibagas sagala hangaluton adong do untung, tapi sahap simarinjaja parohkon hahurangan.
24Sortali ni siparuhur, ai ma hapentaranni; tapi bani halak na oto haotoonni do jadi rudangni.
25Sipaluah hosah do saksi na sintong, tapi sipangagou do siluarhon ladung.
26Biar bani Jahowa do patubuh tenger ni uhur na toguh, anjaha bani anakni pe adong do haporusan.
27Biar mangidah Jahowa do bah tubuh hagoluhan, na mambahen tarsimbili siding ni hamatean.
28Hinabuei ni rayat do hamuliaon bani raja, tapi parsurut ni rayat hasedaon ni na markuasa do ai.
29Halak na nanget manringis ai ma sibuei partimbangan, tapi halak na urah manggila pabanggal haotoon.
30Sipahisar angkula do uhur na lamlam, tapi mangkarat bani holi-holi do uhur simburu.
31Siodoh-odoh halak na maetek, sipahiri na manompasi do ia ai; tapi na mangkaholongi halak na masombuh, ai ma na pasangapkon Naibata.
32Marhitei hajahatonni do maseda halak parjahat, tapi nalom do uhur ni parpintor age bani parmateini.
33Ibagas uhur ni halak na maruhur marianan do hapentaran, tapi seng dong jumpah ai ibagas uhur ni na bodoh.
34Habonaran do patimbul sada bangsa, tapi dousa do na mambahen maseda halak.
35Harosuh ni raja do juakjuak na pantas maruhur, tapi mangonai do ringisni bani sihorjahon na masambor.