Dual Panel(Sambatni)
1Sipatubuh panrisaion do anggur, sibahen mabuk minuman koras, anjaha ise na sompat rebad-rebad ibahen, seng maruhur be.
2Songon paraum ni singa do ondam-ondam ni raja, barang ise na mamuhoi ringisni, na parseda dirini sandiri do.
3Hasangapon do ai bani dalahi mandaoh humbani paringoran, tapi halak na oto marosuh do martinggil.
4Halani borgoh ari, seng ra siparrayoh maninggala; sihol ma ia namin marpariama, hape aha pe lang adong.
5Songon bah bagas do uhur ni jolma ibagas, tapi halak na pentar tardodousi do ai.
6Buei do jolma patugah-tugahkon hadearonni, tapi halak hatengeran ni uhur, ija do jumpah ai?
7Marparlahou na pitah do halak parpintor; martuah do anakni i pudini.
8Raja na hundul bani hotak paruhuman, mamurpurhon sagala hajahaton marhitei pangkawahni.
9Ise ma na barani mangkatahon, “Domma hupaborsih uhurhu, pansing do ahu humbani dousangku?”
10Timbangan na palegan-legan, suhat-suhat na palegan-legan, haduasi do ai hagigi bani Jahowa.
11Age marhitei pambahenanni, tartanda do dakdanak, atap na borsih atap na pintor biakni.
12Pinggol na marpanangar pakon mata na marpangidah, Jahowa do na manjadihon ai haduasi.
13Ulang ma harosuhkon na modom-modom, ase ulang miskin ho; ungkab ma matamu, gabe sungkupan sipanganon ma ho.
14“Sambor do, sambor do,” nini sipamboli, hape dob misir ia, ipuji do dirini.
15Age adong omas, buei age mutiha, tapi arta siharganan ai ma bibir na marpambotoh.
16Buat ma hiouni, ai ijamini do halak na legan, gadeihon ma ai, halani iampuni halak sileban.
17Mantin do bani halak sipanganon na tinangko, hape dobni gabe gok ranggisgis do pamanganni.
18Saud do sura-sura marhitei panriahan, halani ai marhitei partimbangan ma dalankon porang.
19Halak na hujai-hujon pahata-hatahon, mambahen tarbotoh rusia, halani ai ulang ma marhuan pakon halak sihertep bibir.
20Halak na mamurai bapani atap inangni, sai na mintop do suluhni ibagas na golap marimpot-impot.
21Tean-teanan na tarolos-olos ipatumpu, dobni seng marpasu-pasu ai.
22Ulang hatahon, “Hubalaskon ma hajahaton ai!” Hatengerhon ma Jahowa, sai urupan-Ni do ho.
23Hagigi ni Jahowa do timbangan na palegan-legan, anjaha kilo palsu seng dear ai.
24Jahowa do na manontuhon langkah-langkah ni jolma; naha ma jolma boi mangarusi dalanni?
25Siding do ai bani jolma, mapodastu mangkatahon bagah-bagah; hape dob ibagahkon pe ase iuhurhon ai.
26Mapurpur do halak parjahat ibahen raja na pantas, anjaha galapang do ipadalan hun datas ni sidea.
27Suluh ni Jahowa do tonduy ni jolma, na mamareksa haganup lompit-lompit ni uhurni.
28Halayakon ampa hasintongan do na manramotkon raja; anjaha totap do paratasni marhitei uhur holong.
29Hamuliaon bani garama, ai ma gogohni, tapi ubanni do hasangapon bani na matua.
30Lonsing-lonsing na mardaroh padaoh hajahaton, anjaha bogbog-bogbog paborsih uhur parbagas.