Alkitab Mobile SABDA
[VER] : [SIMALUNGUN]     [PL]  [PB] 
 <<  Amsal 25 >> 

Upah ni Hapentaran

1On pe podah ni Raja Salomo, ai ma na pinahumpul ni juakjuak ni si Hiskia, raja ni Juda.

2Hamuliaon ni Naibata do ai mangadongkon rusia, tapi hamuliaon ni raja, ai ma na manulimati.

3Gijang ni langit, bagas ni tanoh ampa pingkiran ni raja-raja seng tardodou ai.

4Iambukkon ma humbani pirak, jadi boi ma ai topaon ni tukang gabe parugas.

5Padaoh ma halak parjahat hun lobei-lobei ni raja, gabe totap ma paratasni marhitei hapintoron.

6Ulang ma pabanggal-banggal dirimu i lobei ni raja, atap hundul ho bani ianan ni halak na sangap-sangap;

7ai rahanan do hatahonon ni halak bam, “Hu luluan ma ham!” Humbani na ipatoruh halak ho i lobei ni na sangap.

8Na nididah ni matamu, ulang aduhon ai mapodastu, ai sonaha ma holi ho, anggo bador ho ibahen hasomanmu?

9Parkarahon parkaramu dompak hasomanmu, tapi ulang patugah rusia ni halak na legan,

10ase ulang bador ho ibahen halak na manangar ai, gabe sambor baritamu lalab.

11Doskon jambu omas na i atas ni pinggan pirak do, hata na niluarhon topat bani panorangni.

12Doskon tintin omas atap ugas-ugas omas do, halak siparpodah na pentar bani halak na ra manangihon.

13Songon bah tubuh na patorsukkon bani musim sabion, sonai do suruhan hatengeran ni uhur bani na marsuruhsi, ipahisar do uhur ni tuanni.

14Songon hombun pakon logou na so marhasoman udan, sonai do halak na marbagah sibere-bere, hape seng ipasaud.

15Marhitei hasabaron do dapot uhur ni na markuasa, anjaha hata na lamlam mamonggolhon holi-holi.

16Anggo jumpah ho manisan, pangan ma ansa na porlu bam. ase ulang mabosurtu ho, gabe iutahkon ho ai.

17Ulang magatitu ho martandang hu rumah ni hasomanmu, ase ulang sobalan ia bam, gabe hagigini ho.

18Songon ompong-ompong, podang atap panah na marot, sonai do halak na manaksihon ladung dompak hasomanni.

19Songon ipon na mulluk-ulluk atap nahei na tarlandit, sonai do halak na so hatengeran bani panorang hasosakan.

20Songon halak na mananggali bajuni bani musim borgoh, anjaha songon na migar na mangonai bani ugah, sonai do halak na mandodingkon doding bani halak paruhur na seda.

21Anggo loheian munsuhmu, bere ia mangan, anggo horahan ia, bere ia minum;

22ai na pajunjun narnar do ho bani uluni marhitei ai, anjaha Jahowa ma na mambalaskon ai bam.

23Logou na hun utara paroh udan, tapi hata tundal mambahen bohi manringis.

24Rahanan do marianan i suhi-suhi ni tayub, ase rap sajabu pakon parinangon partinggil-tinggil.

25Songon bah na torsuk hubani halak na horahan, sonai do barita na madear hun tanoh na madaoh.

26Songon pansur na gombur atap bah tubuh na binutakan, sonai do halak parpintor, na mambahen parsangsian i lobei ni halak parjahat.

27Seng dear panganon manisan mabueitu, halani ai asok ma mambere puji-pujian.

28Songon huta na mareong, na so martembok be, sonai do halak na so boi manrajai dirini.


  Share Facebook  |  Share Twitter

 <<  Amsal 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel