Alkitab Mobile SABDA
[VER] : [SIMALUNGUN]     [PL]  [PB] 
 <<  Amsal 3 >> 

Ojur-ojur Marparlahouhon Hadaulaton

1Ale anakku, ulang ma ho lupa bani podahku, sai paruhurhon ma parentahku,

2ai tambahkononni do bam ari na madear, umur na ganjang ampa hadoharon na gok.

3Holong ampa hasintongan ulang ma laho humbam, parsinongkok ma ai anjaha suratkon ma bani atei-ateimu.

4Jadi dapotan idop ni uhur ma ho ampa na madear i lobei ni Naibata ampa jolma.

5Tenger ma uhurmu bani Jahowa humbani gok ni uhurmu, ulang ma ho marpangunsandeian bani pingkiranmu sandiri.

6Bani haganup dalanmu ingat ma Ia, jadi Ia ma papintor dalanmu.

7Ulang na dob maruhur ho ninuhurmu, habiari ma Jahowa, anjaha padaoh dirimu humbani hajahaton.

8Gabe tambar ma ai bani dagingmu, anjaha hahisaron bani holi-holimu.

9Pasangap ma Jahowa marhitei habayakonmu ampa marhitei limbuah ni sagala pansarianmu;

10jadi gok ma tuanganmu bani gandum, anjaha sampur kilangmu ibahen anggur.

11Ale anakku, ulang ma mapas uhurmu bani pangajarion ni Jahowa, anjaha ulang sogam uhurmu bani uhuman-Ni.

12Ai hinaholongan-Ni do ipinsang Jahowa songon bapa dompak anak, na hinarosuhkon ni uhur-Ni.

Seng dong na Mangatasi Hapentaran

13Martuah do jolma na dapotan hapentaran, ampa jolma na jumpahan pangarusion,

14ai na mandapot ai dearan do ai humbani na mandapot pirak, harganan do ai humbani omas.

15Harganan do ai ase mutiha, anjaha sagala na hinarosuhkonmu seng taratasisi ai.

16Umur na ganjang do bani tangan siamunni, bani tangan sambilouni habayakon pakon hamuliaon.

17Dalanni, ai ma dalan harosuh, anjaha damei do sagala nilangkahkonni.

18Hayu hagoluhan do ai bani halak na jumpahan ai, anjaha martuah do halak, na manjolomsi.

19Jahowa do na pajonam dunia on marhitei hapentaran; langit ai marhitei uhur panimbangion.

20Marhitei habotohonni mapultak luhung ni laut, anjaha hombun manektekkon namur.

21Ale anakku, ulang magou ai humbani panonggormu; ramotkon ma hauhuron ampa partimbangon,

22ase gabe hagoluhan ai bani tonduymu, anjaha hajagaron bani borgokmu.

23Gabe sonang ma ho bani dalanmu, anjaha naheimu seng anjai tarantuk.

24Bani na hundul ho seng anjai songgotan, anggo ipatibal ho dirimu, sonang do parpodommu.

25Ulang pala rusak ho halani songgot-songgot na sompong parrohni, atap halani hamagouan na mangonai bani halak parjahat;

26ai Jahowa do hatengeran ni uhur bam, ramotkonon-Ni do naheimu humbani jarot.

Hata Golpa-golpa ampa Lumba-lumba

27Ulang ma ho manjua mambahen na madear bani halak na hurangan, anggo tuk do gogohmu mandalankon ai.

28Ulang ma hatahon bani hasomanmu, “Laho ma, sahali nari ma ho roh, patar pe hubere, hape adong do bam.”

29Ulang ma uhurhon na jahat dompak hasomanmu, na marianan martenger ni uhur rap pakon ho.

30Ulang ho marsalisih dompak halak seng marhala, anggo seng dong ibahen na jahat bam.

31Ulang ma ho simburu bani halak sipangodoh-odoh anjaha ulang ma ihutkon dalanni;

32ai hagigi do halak sipanlawan bani Jahowa, tapi saor do Ia bani halak parpintor.

33Papa ni Jahowa do mangonai bani rumah ni parjahat, tapi ianan ni parpintor ipasu-pasu-Si do.

34Halak na pahiri-hirihon ipahiri do, tapi maidop do uhur-Ni bani halak sitoruh uhur.

35Hamuliaon do siteanon bani halak siparuhur, tapi habadoron do parbagianan ni halak na oto.


  Share Facebook  |  Share Twitter

 <<  Amsal 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel