Dual PanelDilo-dilo ampa Hasaksian ni Hapentaran
1Ai lang dilo-dilo do hapentaran ai, anjaha hauhuron ai pamaling sorani?
2I atas, bani buntu-buntu, i lambung ni dalan, bani sirpang do ia jongjong,
3bani horbangan, bani dalan masuk hubagas huta, bani horbangan hudarat do ipamaling sorani, nini,
4“Bennima do, ale dalahi, dilo-dilo ahu, anjaha taur-taur bennima, ale anak ni jolma.
5Guruhon hanima ma habotohon, ale halak na bodoh, anjaha hanima, gabe halak na maruhur ma.
6Tangihon ma, ai sihol mansahapkon na maharga do ahu, sihol manluarhon hasintongan do bibirhu;
7ai hasintongan do sihol hatahonon ni pamanganku; tapi magigi do bibir hubani na masambor.
8Pintor do haganup sahap ni pamanganku; seng dong na geduk atap na lepak ijai.
9Haganupan ai sintong do bani siparuhur, anjaha bonar bani halak na marpambotoh.
10Jalo ma pangajaranku, rahanan humbani pirak, sonai homa habotohon, dearan humbani omas pitah.
11Harganan do hapentaran ase mutiha, anjaha haganup na hinarosuhkon ni halak seng taratasisi ai.
12Ahu, hapentaran ai, marianan do i lambung ni hapandeian, jumpahan habotohon pakon hapandeian do ahu.
13Biar bani Jahowa, magigi do ai bani na masambor, uhur hagijangon ampa pangenjengon, parlahou na masambor ampa parsahap na margoling-goling, magigi do ahu pasal ai.
14Ahu do simada panuturion pakon na pasaudkon ai, Ahu do simada hauhuron pakon hagogohon.
15Marhitei ahu do manggomgomi raja-raja, anjaha itotapkon siparkuasa hapintoron.
16Marhitei ahu do manrajai sipanggomgomi, sonai homa na sangap-sangap ampa haganup panguhum na pintor.
17Holong do uhur hubani sagala na mangkaholongi ahu, anjaha halak sipindahi ahu, sai jumpahsi do ahu.
18Bangku do habayakon pakon hamuliaon, arta na manotap pakon hapintoron.
19Dearan do buahku humbani omas, humbani omas pitah tene, sonai age pansarianku humbani pirak pilihan.
20Bani dalan hapintoron do ahu mardalan, bani dalan habonaran do langkahku,
21laho manlayak-layakkon parbagianan bani na mangkaholongi ahu, laho manggoki parartaan ni sidea.
22Jahowa do manompa ahu bani mungkah ni panompaon-Ni, gabe parmulaan ni horja-Ni bani na basaia.
23Bani panorang sapari ai do ahu iadongkon, bani mulani, paima adong tanoh on.
24Seng dong ope laut domma itubuhkon ahu, seng dong ope bah tubuh na marburlak-burlakkon bah,
25sanggah lape ipasuk sagala dolog, anjaha sanggah lape adong buntu-buntu, domma itubuhkon ahu;
26sanggah lape iadongkon tanoh on tene, ampa ladangni, sonai age orbuk na parlobei i tanoh on.
27Sanggah Ia pajongjongkon langit ai, ijai do ahu, sanggah na binolat-Ni ai hajangkajang i atas ni laut ai,
28sanggah ninahkon-Ni ai hombun i atas, sanggah pinaroh-Ni ai bah na marburlak-burlak hun toruh,
29sanggah na binahen-Ni ai parbolatan ni laut, ase ulang ilanggar bah ai parentah-Ni, sanggah na pinasuk-Ni ai onjolan ni tanoh on, ijai do ahu, anak hinaholongan-Ni,
30i lambung-Ni ijia, megah ni uhur-Ni ahu ganup ari, marguro-guro tongtong i lobei-Ni,
31marguro-guro do ahu i sab dunia on, anjaha malas do uhur hubani jolma manisia.
32Ai pe, ale anakku, tangihon ma ahu, martuah do halak siramotkon dalanku.
33Tangihon hanima ma pangajaranku, ase pentar hanima, sai ulang ma lansei pasal ai.
34Martuah ma halak sitangihon ahu, na marjaga ganup ari bani labahku, anjaha sipanramotkon bani horbanganku.
35Halak na jumpahan ahu, hagoluhan do jumpahsi anjaha gabe harosuh bani Jahowa.
36Tapi na so jumpahan ahu, dirini do pinarsedani, sagala na magigi bangku, hamatean do hinaholonganni ijai.”