Dual PanelMarsahap si Sopar; Ipaunduk si Job ma namin Dirini i Lobei ni Naibata Sibotoh Haganup
1Dob ai nini si Sopar, halak Naama ai ma mambalosi,
2“Mintor lang ma balosan halak sibuei sahap, anjaha tumaram ma pintor halak sihertep bibir?
3Mintor boi ma sahap-sahapmin pasip halak, anjaha manrehei hape seng dong na pabador ho?
4Nim do, ʻPitah do podahku, anjaha bujur do ahu i lobei-lobei-Mu.ʼ
5Tapi tene, ambit marsahap ma namin Naibata, ibuha namin pamangan-Ni dompak ho,
6anjaha ipatugah bam rusia ni hapentaran-Ni, ai ipaganda ai do pangarusion. Botoh ma, na marpangulaki ope uhur ni Naibata bam pasal hajahatonmu.
7Mintor tardadap ho ma rusia ni Naibata? Mintor tararusi ho ma hagokdearon ni Pargogoh Na So Tarimbang in?
8Gijangan do ai ase langit, aha ma boi ibahen ho? Bagasan do ai ase nagori toruh, aha ma ibotoh ho?
9Ganjangan do sibar-sibar-Ni humbani tanoh on, anjaha bolagan humbani laut.
10Anggo montas Ia laho manrantei, anjaha idilo hu paruhuman, ise ma na boi manlanglangi-Si?
11Ai itandai do halak sipakulah-kulah, ididah hajahaton, seng pala lobei ipareksa.
12Ai boi do halak na lontong dapotan uhur, atap anak ni halode salih gabe jolma?
13Anggo ipasirsir ho uhurmu, anjaha ipaherbang ho tanganmu dompak-Si
14(anggo adong hajahaton ibagas tanganmu, padaoh ma ai, anjaha ulang paturut hagedukon marianan ibagas lampolampomu),
15ijai ma tarbahen ho padirgak bohimu, seng pala bador; totap ma uhurmu, anjaha seng marhabiaran.
16Lupa ma ho bani sitarononmu; songon bah na dob salpu mabaor, pardingatmu ijai.
17Jadi siangan ma goluhmu humbani tongah ari, hagolapanni ai, songon golap sogod-sogod hansa.
18Martenger ni uhur ma ho, ai adong do pangarapanmu; dob mangkawah ho inggot, sonang ma ho modom.
19Patibalonmu ma dirimu, seng dong na mambibiari; anjaha buei ma halak na mangindahi holong ni atei bam.
20Tapi horlom do mata ni halak parjahat, seng dong haporusanni; sada mando pangarapanni, ai ma rotap ni hosahni.