Dual PanelTangis-tangis ni si Job
1Dob sonai ibuha si Job ma pamanganni anjaha iburai ma ari partubuhni.
2Nini ma mangkatahon,
3“Masab ma lah namin ari partubuhku, ampa borngin ai na mangkatahon, ʻDomma solat sada anak dalahi.ʼ
4Golap ma lah, ari ai! Ulang ma namin ipindahi Naibata na i babou ai, barang marsinalsal panondang bani.
5Sai idorab hagolapan ampa halotiron ma namin ai. Sai irungkub hombun mangitom, anjaha isonggoti samon arian.
6Borngin ai, sai halotiron ma namin manrampas ai! Ulang ma namin marmalas ni uhur ai i tongah-tongah ni ari ni tahun, ulang ma namin masuk hira hubagas bilangan ni bulan.
7Borngin ai, borngin na lang martuah ma namin ai; ulang ma namin tarbogei sora olob-olob ijai.
8Sai hona papa ma namin ai ibahen sipapai ari, na mambotoh mamuhoi naga.
9Sai sogop ma namin bintang buha siang arini; tarpaima-ima namin bani na siang, tapi lang jumpahan, anjaha ulang ma namin ongga ididah sibalik huning,
10halani lang itutup labah ni partapaan bangku, anjaha lang iponopkon sitaronon hun matangku.
11Mase ma lang matei ahu tubuhkonsi, rotap namin mintor hosahku mandaratkonsi hun partapaan?
12Mase ma mintor sirsir abingan manjalo ahu, ampa adop gabe boi ahu minum?
13Ambit lang sonai namin, tibal ma ahu sonari marsaran, modom ahu marsonang-sonang,
14rapkon raja-raja ampa parkuasa ni dunia on, sipauli tugu bani dirini sidea,
15barang rapkon halak na sangap sibuei omas, na manggoki rumahni bani pirak.
16Barang mase ma lang ahu namin songon anak na lang gokan umur, na tinanomkon, songon na etek-etek na lang ongga mangidah na siang?
17Ijai maronti ma halak parjahat oga-oga, ijai marsaran ma halak na bois gogohni.
18Ijai sonang ma halak na tartutup, lang tangaronni be sora ni mandur.
19Ijai sarupa do halak na etek pakon na banggal, anjaha mardeka do jabolon humbani tuanni.
20Mase ma ibere na siang bani halak na masombuh, pakon hagoluhan bani halak na marhoru?
21Na siholan bani hamatean, tapi lang roh, na mangindahi ai lobih humbani halak sipindahi ponopan;
22halak na marmalas uhur, na marolob-olob tene, porini jumpahsi tanoman,
23mase ma ibere na siang bani halak na ponop dalanni, na dob hona rungga ibahen Jahowa?
24Ai hoih-hoih do sipanganon siap ari bangku, anjaha tangis-tangisku mabaor songon bah.
25Ai na huhabiari, ai do sogop bangku, anjaha na huharusakkon, ai do mangonai bangku.
26Seng dong bangku damei, lang homa sonang ahu; seng dong parsaranan bangku, marrohan tong hasunsahan.”