Dual PanelApuy ni Jahowa
1Dob ai marungut-ungut ma bangsa ai, pala ibogei Jahowa pasal hasosakan ni sidea. Jadi dob ibogei Jahowa ai, nahit ma ringis-Ni, anjaha gara ma apuy ni Jahowa i tongah-tongah ni sidea, pala mosog deba bagian pardarat ni parsaranan ai.
2Jadi mandoruhi ma bangsa ai hubani si Musa, anjaha martonggo ma si Musa hubani Jahowa, gabe mintop ma apuy ai.
3Ibahen ma goran ni ianan ai Tabera, halani na dob gara ai apuy ni Jahowa i tongah-tongah ni sidea.
Hisap ni Bangsa Israel
4Dob ai manomboh ma hisap ni halak na jahil na i tongah-tongah ni sidea; anjaha dihut do halak Israel tangis-tangis use anjaha nini sidea ma, “Ise ma na mambere gulei panganonnami?
5Idingat hanami do dengke na pinangannami i tanoh Masir, lang pala marboli, sonai age ansimun, hondi, lowoh, bawang sigerger pakon hosaya-hosaya;
6tapi anggo nuan horah do pangahapnami, seng dong ididah matanami sobali manna.
7Ia manna ai songon batu ni hatumbar do, anjaha rupani songon bedellion.”
8Dob ai mulak-ulak ma bangsa ai mardalan patumpuhon manna, anjaha iduda ma ai ibagas losung atap igiling ibagas panggilingan, anjaha ilompah ma ai ibagas hudon laho mambaen kuei hunjai; anjaha daini songon dai ni kuei ginoreng bani minak do.
9Anggo madabuh namur borngin hu parontian ai, madabuh ma pakon manna ai hu atasni.
10Ibogei si Musa ma tangis bangsa ai mar sasaompung, ganup i lobei ni lampolampo; gabe gajag ma ringis ni Naibata, anjaha sogam uhur ni si Musa.
11Nini si Musa ma hubani Jahowa, “Mase ma bajan pambahenan-Mu bani jabolon-Mu? Anjaha mase ma lang jumpahan idop ni uhur ahu i lobei-Mu, mambahen iampeihon Ham siusungon ni ganup bangsa on bangku?
12Ai solat hu bangku do ganup bangsa on? Ai ahu do manubuhkon sidea, mambahen hatahonon-Mu bangku, ʻBahen ma sidea bani tontonmu, songon pangombah ni parorot bani na etek-etek, das hu tanoh na dob binijahon-Mu hubani ompung ni sidea?ʼ
13Hunja ma buatonku gulei siberehononku bani ganup bangsa on? Tangis-tangis do sidea i lobeihu anjaha ihatahon, ʻBere bennami gulei panganonnami!ʼ
14Seng tarusung ahu sandiri be ganup bangsa on, maborattu do in bangku.
15Anggo sonai do bahenon-Mu bangku, rahanan ma ahu bunuh Ham, anggo jumpahan idop ni uhur do ahu i lobei-Mu, ase ulang be hupaidah-idah hadoyukonku.”
Pangintuai Sipitupuluh Halak
16Dob ai nini Jahowa ma hubani si Musa, “Patumpu ma Bangku pitu puluh halak humbani pangintuai ni halak Israel na tangkas tinandamu, paboa pangintuai anjaha panuturi ni bangsa ai do sidea, hu lampolampo partumpuan ai, anjaha pajongjongon ma sidea ijai rap pakon ho.
17Jadi tuad ma Ahu anjaha marsahap pakon ho ijai; anjaha buaton-Ku ma deba humbani tonduy na sogop bam, anjaha nahkonon-Ku ma ai bani sidea; sidea ma hasomanmu mangusung siusungon ni bangsa in, ase ulang pitah ho sandiri mangusung ai.
18Anjaha hatahon ma bani bangsa in, ʻManguras ma nasiam hubani patar, ase mangan gulei nasiam; ai domma das doruh-doruh nasiam ai bani panangar ni Jahowa, na mangkatahon: Ise ma na mambere gulei panganonnami? Marsonang-sonang hinan do hanami i tanoh Masir. Halani ai bereon ni Jahowa ma bani nasiam gulei, anjaha mangan ma nasiam.ʼ
19Seng pitah sadari mangan nasiam hunjai, barang dua ari, barang lima ari, barang sapuluh ari, barang dua puluh ari,
20tapi girtip sabulan dokahni, das hubani na luar ai humbani igung nasiam, anjaha sobalan nasiam, halani na dob mahiri ibahen nasiam Jahowa, na i tongah-tongah nasiam, anjaha pala tangis-tangis nasiam i lobei ni, mangkatahon, ʻMase ma luar hita hun tanoh Masir?ʼ”
21Tapi nini si Musa ma, “Pala do onom ratus ribu halak na mardalan nahei buei ni bangsa na i lambungkon, anjaha ihatahon Ham, ʻBereonku ma gulei bani sidea, anjaha sungkup panganon ni sidea girtip sabulan dokahni.ʼ
22Maningon sayaton ma ganup biribiri pakon lombu, ase sungkup bani sidea? Barang maningon patumpuon ma ganup dengke hun laut, ase sungkup bani sidea?”
23Jadi nini Jahowa ma hubani si Musa, “Na pondoktu do, nini uhurmu, tangan ni Jahowa? Idahonmu do sonari barang na tongon hatang-Ku bam barang lang.”
24Dob ai luar ma si Musa, anjaha ipadas ma hubani bangsa ai hata ni Jahowa, ipatumpu ma pitu puluh humbani pangintuani ni bangsa ai anjaha ipajongjong ma sidea inggot lampolampo ai.
25Dob ai tuad ma Jahowa ibagas hombun ai, anjaha marsahap ma Ia hu bani, anjaha ibuat ma deba humbani Tonduy na sogop bani, anjaha ibere hubani pangintuai na pitu puluh halak ai; sogopkonsi Tonduy ai bani sidea, manjahai ma sidea, tapi dob ai lang be.
26Tapi tading do dua halak humbani sidea i parsaranan ai, goran ni na sada si Eldad anjaha goran ni na sada nari si Medad; jadi marsaran ma homa Tonduy ai i atasni sidea ai, masuk do sidea hubani na tarsurat ai, tapi seng dihut sidea hu lampolampo ai, jadi i parsaranan ai do sidea manjahai.
27Marlintun ma sada garama anjaha nini ma hubani si Musa, “Manjahai do si Eldad pakon si Medad ibagas parsaranan ai.”
28Dob ai roh ma balos ni si Josua, anak ni si Nun, juakjuak ni si Musa, humbani haposoonni nari, nini ma, ʻHam tuannami Musa, pandang ma sidea!ʼ
29Tapi nini si Musa ma hu bani, “Mintor simburu ma ho halani ahu? Gabe nabi ma namin ganup bangsa ni Naibata, anjaha ilayak-layakkon Jahowa ma Tonduy-Ni sogop hubani sidea.”
30Dob ai mulak ma si Musa pakon pangintuai ni halak Israel, hu parsaranan ai.
Parroh ni Leto na Marhulan-hulan. Tanoman ni na Hisapon
31Dob ai roh ma logou ibahen Jahowa, mamboban leto hun laut, anjaha ipandabuhkon ma hu parsaranan ai, hira-hira sadari mardalan daohni hunjon anjaha sadari mardalan daohni hujai, inggot parsaranan ai, hira-hira dua asta gijangni hun tanoh.
32Jadi laho ma bangsa ai patumpuhon leto ai, layur sadarini ai ampa layur sadari patarni ai; siotikanni humbani sidea patumpuhon sapuluh homer, jadi ijomur sidea ma ai inggot parsaranan ai.
33Hape sanggah ihilhili sidea ope gulei ai, sanggah lape ope ibonduti, gajak ma ringis ni Jahowa hubani bangsa ai, ibogbog Jahowa ma sidea marhitei panaronon na parah.
34Jadi ibahen sidea ma goran ni ianan ai Kibrot-Hattaawa (tanoman ni na hisapan), halani ijai do itanom sidea simbuei na hisapon ai.
35Hun Kibrot-Hattaawa laho ma bangsa ai hu Haserot, jadi marsaran ma sidea i Haserot.