Dual PanelParporangan Dohorhon Horma
1Jadi dob ibogei si Arad, raja ni halak Kanaan, na marianan i tanoh dangsina, na dob roh halak Israel hun dalan na hun Atarim, gabe iporang ma halak Israel, pala itaban deba humbani sidea.
2Dob ai marbagah-bagah ma halak Israel hubani Jahowa, “Anggo iondoskon Ham bangsa on hubagas tanganku, sai siapkononku do sagala huta ni sidea ai.”
3Jadi ibalosi Jahowa ma sora ni halak Israel, iondoskon ma halak Kanaan ai hubani sidea, gabe isiapkon halak Israel ma sidea, ronsi huta ni sidea, anjaha ibaen ma goran ni huta ai Horma.
Ulog Tombaga
4Jadi bingkat ma sidea hun Dolog Hor, laho dompak Laut Sigerger, sihol manginggoti nagori ni halak Edom; gabe lang sabar be bangsa ai i tongah dalan.
5Dob ai marungut-ungut ma bangsa ai hubani Naibata pakon hubani si Musa, “Mase ma arahkonon-Mu hanami tangkog hun Masir, ase matei hanami i halimisan on? Ai seng dong ruti barang bah ijon, ai domma maginei-ginei uhurnami mangidah ruti na magoyak-goyak on.”
6Dob ai isuruh Jahowa ma hu tongah-tongah ni bangsa ai ulog darih, na mamaguti bangsa ai, gabe marmateian ma buei humbani halak Israel.
7Dob ai roh bei ma bangsa ai marayak si Musa anjaha nini ma, “Domma mardousa hanami dompak Jahowa pakon bamu, martonggo ma ham hubani Jahowa, ase ipadaoh hun bennami ulog darih on.” Jadi martonggo ma si Musa mangapiti bangsa ai.
8Dob ai nini Jahowa ma hubani si Musa, “Pauli ma sada ulog darih, anjaha nahkon ma ai bani sada tiang, jadi anggo adong barang ise na pinagut ni ulog ai anjaha mangkawah hujai, jadi manggoluh ma ia.”
9Dob ai ipauli si Musa ma sada ulog humbani tombaga, anjaha inahkon ma ai hubani sada tiang, jadi anggo adong barang ise na pinagut ni ulog ai, anjaha itonggor dompak ulog tombaga ai, jadi manggoluh ma ia.
Pardalanan Das hu Ladang ni Moab
10Dob ai bingkat ma halak Israel hunjai anjaha marsaran ma sidea i Obot.
11Dob ai bingkat ma use sidea hun Obot anjaha marsaran i Iye Abarim, i halimisan tontang ni Moab, hampit hapoltakan.
12Bingkat ma use sidea hunjai, anjaha marsaran ma sidea i habungan Sared.
13Bingkat ma use sidea hunjai anjaha marsaran ma i dipar ni Bah Arnon, na i halimisan, na marsumbul i nagori ni halak Amori, na gabe parbalogan ni Moab pakon Amori.
14Halani ai do ase tarsurat ibagas buku porang ni Jahowa, “Wahab i Supa pakon habungan ni Arnon,
15pakon raboyon ni habungan, na ampar ronsi ianan ni Ar, anjaha mangunsandei bani parbalogan ni Moab.”
16Bingkat ma use sidea hunjai hu Beer, ai ma parigi na hinatahon ni Jahowa hubani si Musa, “Patumpu ma bangsa in, ase Hubere bah inumon hubani sidea.
17Ijia ma idodingkon halak Israel doding on, ʻSirnip ma ho, alo parigi! Dodingkon ma in marsibalos-balosan!ʼ
18Parigi na hinurak ni sagala kopala, na pinungkor ni na sangap ni bangsa in marhitei tungkot ni sidea. Dob ai bingkat ma use sidea hun halimisan ai hu Matana,
19hun Matana hu Nahaliel, hun Nahaliel hu Bamot,
20hun Bamot hu habungan na i ladang ni Moab, na patontang pakon pakpak ni Pisga, panatapan hampit halimisan.”
Hamonangan Maralohon Raja Sihon
21Dob ai isuruh Israel ma suruhanni marayak si Sihon, raja ni halak Amori, nini ma,
22“Mahua palopas ham ma ahu mamontas hun tanohmu, lang pe manlembang hanami hu ladang barang hu pohon anggur; lang pe iinum hanami bah ni parigi, dalan na bolon in pe idalani hanami paima salpu ibontas hanami nagorimu.”
23Tapi seng ipalopas si Sihon halak Israel mamontas hun nagori ni sidea. Ipatumpu ma ganup bangsani, anjaha luar ma mangimbang Israel hu halimisan, anjaha dob das hu Jahas, iporang ma halak Israel.
24Tapi italuhon Israel do ia marhitei mata ni podang, anjaha isoluk ma nagorini singgan ni Arnon ronsi Jabok, das hubani halak Amon, ai toguh do parbalogan ni halak Amon.
25Italuhon Israel ma ganup huta ai, anjaha marianan ma Israel i huta ni halak Amori, i Hesbon pakon ganup dusunni inggot.
26Ai Hesbon do huta ni si Sihon, raja ni halak Amori, na dob mamorang raja ni halak Moab, anjaha na dob mangayob ganup tanohni hun tanganni das hu Arnon.
27Halani ai do ase ihatahon pandoding parumpasa, “Roh ma hu Hesbon, gabe pinauli anjaha pinatoguh ma huta ni si Sihon.
28Ai apuy do luar hun Hesbon, dilah ni apuy hun huta ni si Sihon. Ai ma na mamboiskon Ar i Moab, pangisi ni tanoh Dolog Arnon na i topini.
29Hona papa ma ho Moab! Magou ma ho, alo halak Kamos! Domma ibahen anakni gabe sidakdakan ni munsuh, anjaha boruni taban-taban bani si Sihon, raja ni halak Amori.
30Domma itembaki hanami sidea, magou do Hesbon das hu Dibon; domma iparseda hanami ai das hu Noya, pala ronsi Medeba marhitei apuy.”
Hamonangan Marimbang si Og, Raja ni Basan
31Jadi marianan ma halak Israel i tanoh ni halak Amori.
32Dob ai isuruh si Musa ma na mangkahapi Jaeser; ipatunduk sidea ma ai ampa sagala dusunni, anjaha iusir ma halak Amori na marianan ijai.
33Dob ai marhusor ma sidea anjaha tangkog mardalan hu Basan; jadi luar ma si Og, raja ni Basan, manjumpahkon sidea, mambobahon ganup bangsani laho marporang i Edrei.
34Nini Jahowa ma hubani si Musa, “Ulang ho mabiar mangidahsi, ai domma Huondoskon ia hubagas tanganmu pakon bangsani ronsi nagorini; bahen ma bani songon na dob binahenmu hubani si Sihon, raja ni halak Amori, na marianan i Hesbon.”
35Jadi ipatunduk sidea ma ia pakon anakni ampa ganup bangsani, sahalak pe lang dong tading bani, anjaha isoluk sidea ma tanoh ni ai.