Dual PanelPanlawanon ni Halak Jahudi Dompak Munsuh ni Sidea
1Bani bulan sapuluh dua, ai ma bulan Adar, bani ari sapuluh tolu bulan ai, bani ari pandalankonon bani hata ampa parentah ni raja ai, bani ari na niarapkon ni munsuh ni halak Jahudi manaluhon sidea (tapi balik gabe halak Jahudi manaluhon halak na magigi bani sidea), bani ari ai,
2martumpu-tumpu ma halak Jahudi ibagas huta ni sidea i sab nagori ni Raja Ahasveros, laho mardastangan bani halak na sihol mangagou sidea. Anjaha ise pe lang na tahan jongjong i lobei ni sidea, ai sogop do biar mangidah sidea bani haganup bangsa.
3Haganup kopala ni nagori-nagori ai ampa panrajai pakon haganup gamot ni harajaon ai mangurupi halak Jahudi, ai sogop do bani sidea biar dompak si Mordahai.
4Ai timbul do si Mordahai i rumah ni raja ai, anjaha sar do baritani bani haganup nagori ai, ai lambin dokah, lambin timbul do si Mordahai.
5Jadi italuhon halak Jahudi ma ganup munsuh ni sidea ai marhitei podang, ibunuhi anjaha iagou ma sidea, sabonar rosuh ni uhurni do ibahen sidea hubani halak na mandomdomi sidea.
6I huta Pamatang Susan pe ibunuh anjaha iagou halak Jahudi do lima ratus dalahi;
7ibunuh sidea do homa si Parsandata, si Dalpon, si Aspata,
8si Porata, si Adalia, si Aridata,
9si Parmasta, si Arisai, si Aridai pakon si Wayesata,
10ai ma na sapuluh anak ni si Haman, anak ni si Hamedata, munsuh ni halak Jahudi ai, tapi seng ikahua anggo ugas-ugas ni sidea.
11Lanjar bani ari na sasada ai das ma bilangan ni jolma na binunuh ibagas huta Susan hubani raja ai.
12Dob ai nini raja ai ma dompak Puangbolon Ester, “Domma ibunuh halak Jahudi i huta Pamatang Susan lima ratus dalahi, sonai homa anak ni si Haman na sapuluh ai. Aha gakni ibahen sidea i tanoh ni raja na legan in? Aha ope pangindoanmu? Maningon bereon do ai bam. Anjaha aha ope sihol ni uhurmu? Maningon pasaudon do ai!”
13Dob ai nini si Ester ma, “Anggo dear ninuhur ni raja in, sai ipalopas raja in ma age patar halak Jahudi na i huta Susan, mandalankon romban hubani parentah sisadari on. Nalopas ma ase igantungkon anak ni si Haman na sapuluh ai bani hayu.”
14Jadi ihatahon raja ai ma, ase ibahen sonai; ipadalan ma parentah i Susan, gabe igantungkon ma anak ni si Haman na sapuluh ai.
15Age bani ari sapuluh ompat bulan Adar martumpu-tumpu do halak Jahudi na i huta Susan, anjaha ibunuhi sidea ma tolu ratus halak i Susan; tapi seng dais anggo tangan ni sidea bani ugas-ugas ni sidea.
16Ia halak Jahudi na legan ai, na i nagori ni raja ai, martumpu-tumpu do pagoluhkon hosah ni sidea, gabe seng tarkahua munsuh sidea; ibunuhi sidea ma pitu puluh lima ribu halak na mangkagigihon sidea, tapi seng dais anggo tangan ni sidea bani ugas-ugas ni sidea.
17Ai ma na masa bani ari sapuluh tolu bulan Adar, anjaha bani ari sapuluh ompat marsaran ma sidea, gabe ibahen sidea ma ai ari marpesta-pesta ampa marmalas ni uhur.
Parmulaan ni Pesta Purim
18Tapi anggo halak Jahudi na i Susan martumpu-tumpu do ari sapuluh tolu ampa ari sapuluh ompat, anjaha marsaran ma bani ari sapuluh lima, gabe ibahen sidea ma ari ai ari marpesta-pesta ampa marmalas ni uhur.
19Halani ai anggo halak Jahudi na marianan i dusun-dusun, ari sapuluh ompat bulan Adar do ibahen sidea ari malas ni uhur, ari marpesta-pesta ampa ari bosar anjaha marsipiring-piringan do sidea bani ari ai samah sidea.
20Dob ai isuratkon si Mordahai ma na masa ai anjaha itongoskon ma surat-surat hubani halak Jahudi, na marianan bani haganup nagori ni Raja Ahasveros, na dohor sonai homa na daoh,
21laho mamarentahkon bani sidea, ase marpesta sidea ganup bani ari sapuluh ompat ampa ari sapuluh lima bulan Adar,
22bahen ari pardingatan pasal hamonangan ni halak Jahudi marimbang munsuh ni sidea; ai bani ari ai do martukar pusok ni uhur gabe malas ni uhur ampa partangison gabe ari bosar; maningon bahenon ni sidea ma ari ai gabe ari marpesta-pesta ampa malas ni uhur, anjaha maningon marsipiring-piringan ma sidea samah sidea anjaha marsibere-bere bani halak na musil.
23Jadi iundukkon halak Jahudi ma mandalankon songon na dob pinungkah ni sidea ai, ampa songon na sinuratkon ni si Mordahai ai bani sidea.
24Ai domma pala itahihon si Haman, anak ni si Hamedata, halak Agagi ai, munsuh ni ganup halak Jahudi ai, na sihol mangagou sidea; domma pala ipadalan tondung, ai ma Pur, sihol mamboiskon ampa manraseihon sidea;
25ai sanggah na masuk si Ester hu lobei ni raja ai, ibere raja ai ma surat parentah, ase tahi-tahi hamagouan, na pinadalanni dompak halak Jahudi, itulak ai mulak mangonai bani sidea sandiri, gabe igantung ma ia pakon anakni bani hayu.
26Halani ai do ase ibahen sidea goran ni ari ai Purim, mangihutkon goran Pur. Halani ai, domu hubani ganup na tarsurat ibagas surat ai, ampa na nididah ni sidea ibagas na masa ai, ampa na mangonai hubani sidea.
27Itotapkon anjaha iundukkon halak Jahudi ma sada aturan, bani sidea pakon ginompar ni sidea ampa halak na pasadahon dirini bani sidea, paboa na so bulih langgaron ni sidea ai, maningon marari bosar sidea sidua ari ai ganup tahun romban hubani hata ni surat ai ampa panorang na dob binuhul hinan.
28Anjaha maningon dingaton anjaha bosarhononkon ari ai bani ganup sundut, bani ganup rumah tangga, bani ganup nagori ampa huta, anjaha na so bulih do masab ari Purim on hun tongah-tongah ni halak Jahudi, anjaha na so bulih do maronti pardingatan bani ari on humbani ginompar ni sidea.
29Anjaha Puangbolon Ester pe, boru ni si Abigail, ibahen ma surat kuasa rap pakon si Mordahai, halak Jahudi ai, laho patoguhkon surat na paduahon ai pasal pesta Purim ai.
30Ipantongoskon ma surat ai hubani haganup halak Jahudi, na marianan bani sisaratus dua puluh pitu propinsi ni nagori gomgoman ni Raja Ahasveros ai, marhasoman hata damei ampa hasintongan,
31ase ibosarhon sidea ari Purim on bani panorang na dob binuhul hinan, songon na dob tinitahkon ni si Mordahai, halak Jahudi ai ampa Puangbolon Ester bani sidea, anjaha songon na dob tinontuhon ni sidea bani sidea sandiri ampa bani ginompar ni sidea, pasal parpuasaon ampa partangison ni sidea ai.
32Parentah ni Puangbolon Ester patotapkon aturan-aturan ni pesta Purim on, anjaha isuratkon ma ai ibagas sada buku.