Alkitab Mobile SABDA
[VER] : [SIMALUNGUN]     [PL]  [PB] 
 <<  Galatia 3 >> 

Haporsayaon do na Mamintori Jolma, Sedo na Mangkorjahon Titah

1E nasiam, halak Galatia na so maruhur! Ise do na mandormai nasiam? Ai domma pala targambar bani panonggor nasiam Jesus na tarsilang in.

2Pitah on sihol botohonku humbani nasiam, humbani horja titah do ijalo nasiam Tonduy in, atap humbani ambilan haporsayaon do?

3Sonin ma hape nasiam maoto? Ibagas Tonduy do ipungkah nasiam, hape sonari ibagas daging do pangujungini ibahen nasiam?

4Mintor soya ma panaronon nasiam na buei in? Eak, anggo tongon soya-soya.

5Ia, na mambere Tonduy in bani nasiam, anjaha na mangkorjahon hagogohon ibagas nasiam, ai sonaha, marhitei horja titah atap marhitei ambilan haporsayaon do in?

6Songon si Abraham, “Porsaya do ia bani Naibata, jadi ai do ihira bani gabe hapintoronni.”

7Ase botoh nasiam ma, halak na porsaya, ai do anak ni si Abraham.

8Surat in pe domma ibotoh hinan, paboa marhitei haporsayaon do pintoron ni Naibata sipajuh begu-begu, gabe ibaritahon do hubani si Abraham, “Marhitei ho do pasu-pasuon haganup bangsa.”

9Ase, halak na porsaya in do ipasu-pasu rap pakon si Abraham na porsaya in.

10Ai haganup halak, na sihol manggoluh humbani na mangkorjahon titah, ikuasai papa do, ai tarsurat do, “Hona papa do ganup, na so totap ibagas haganup na tarsurat ibagas buku titah in, ase ihorjahon ai.”

11Tapi torang do, paboa seng adong na pintor i lobei ni Naibata bahenon ni titah in, ai “Parpintor humbani haporsayaon do na manggoluh.”

12Tapi seng humbani haporsayaon anggo titah in, ai na mangkorjahonsi, ai do na manggoluh bahenonni in.

13Itobus Kristus do hita humbani papa ni titah in, marhitei na hona papa Ia mangkopkop hita, ai tarsurat do, “Hona papa do haganup na targantung bani hayu,

14ase ibagas Kristus Jesus sogop bani halak sipajuh begu-begu pasu-pasu na bani si Abraham, ase marhitei haporsayaon ijalo hita Tonduy na pinarbagah-bagah in.”

Seng Soya Bagah-bagah in Halani Titah, Tapi Siparorot do in Paima Roh Kristus

15Nasiam sanina, hasomalan na masa bani jolma ma huhatahon, “Parpadanan ni jolma, anggo domma totap ai, seng iosei ai, atap itambahi.”

16Ia bagah-bagah ai, hubani si Abraham ampa hubani ginomparni do ihatahon. Seng ihatahon, “Ampa bani sagala ginomparni,” songon hubani na buei, tapi hubani sada halak do, “Ampa hubani ginomparmu,” ai ma Kristus.

17On do na huhatahon ijai, “Ia padan, na dob pinatotap ni Naibata, seng boi sundat in bahenon ni titah, na roh ompat ratus tolu puluh tahun i pudini in, gabe lumei bagah-bagah in ibahen.”

18Ai anggo humbani titah do paneanon in, seng be humbani bagah-bagah in, tapi marhitei bagah-bagah do ibere Naibata in bani si Abraham.

19Ase bahen aha do titah in? Itambahkon do in halani panlanggaron, paima roh Ginompar, simada bagah-bagah in, iparentahkon marhitei malekat-malekat marparhiteian sada siholang.

20Ia siholang sedo na paturei-tureihon salopah tumang, tapi sada do anggo Naibata.

21Ase na mangimbang bagah-bagah ni Naibata do titah in? Lang ale! Ai ambit ibere titah na margogoh pagoluhkon, humbani titah in ma tongon hapintoron.

22Tapi itutup Surat in do haganup hubagas dousa, ase marhitei haporsayaon bani Jesus Kristus ibere bagah-bagah in bani na porsaya.

23Tapi paima roh haporsayaon, tartutup do hita ibagas kuasa ni titah, anjaha ikunsi managam haporsayaon, na sihol sipatalaron ope.

24Ase siparorot do titah in banta, paima roh Kristus, ase humbani haporsayaon hita ipintori.

25Tapi dob roh haporsayaon in, seng be ibagas kuasa ni siparorot in hita.

26Ai haganup do nasiam anak ni Naibata marhitei haporsayaon bani Kristus Jesus.

27Ai haganup nasiam, na tardidi hubagas Kristus, Kristus do iparhiouhon nasiam.

28Seng dong be ijai Jahudi barang Gorik, jabolon barang halak na mardeka, dalahi barang naboru, ai sada do nasiam haganup ibagas Kristus Jesus.

29Tapi anggo Kristus simada nasiam, ginompar ni si Abraham do nasiam, anjaha panean mangihutkon bagah-bagah in.


  Share Facebook  |  Share Twitter

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel