Alkitab Mobile SABDA
[VER] : [SIMALUNGUN]     [PL]  [PB] 
 <<  Galatia 4 >> 

Haluahon humbani Parjabolonan ni Titah Marhitei Kristus

1Tapi on do na huhatahon, “Sadokah danak ope panean in, seng dong leganni humbani jabolon, age pe ia tuan simada haganup,

2tapi i toruh ni kuasa ni sipanramoti ampa sijolom anakkunsi do ia, das bani panorang na tinontuhon ni bapani hinan.”

3Sonai do homa hita: Sadokah danak hita, iparjabolon kuasa ni unsur-unsur ni dunia on do hita.

4Tapi dob gok panorangni, isuruh Naibata ma Anak-Ni, tubuh humbani naboru, gabe ginomgoman ni titah,

5ase itobus na ginomgoman ni titah in, ase ijalo hita hak haanakon.

6Tapi halani anak nasiam, isuruh Naibata do hubagas uhurta Tonduy ni Anak-Ni in, na mandilohon, “Abba, Bapa!”

7Ase, seng be jabolon ham, tapi anak do. Tapi anggo anak, lanjar panean ma, marhitei Naibata.

Ulang be Ra Parjabolonon ni Titah

8Tapi ijia, sanggah lape itandai nasiam Naibata, ibalosi nasiam do naibata-naibata, na so Naibata mangihutkon hadirionni.

9Tapi sonari, domma itanda nasiam Naibata, atap sasintongni, Naibata do na mananda nasiam. Mase ma nasiam marbalik use, mulak hubani kuasa ni unsur-unsur na so margogoh anjaha na lumei, ase balosan nasiam ai use?

10Gabe siramotkon ari, bulan, panorang na tinontuhon pakon tahun do nasiam.

11Mabiar do uhurhu pasal nasiam, atap na soya do halojaonku mangkopkop nasiam.

12Nasiam sanina, hupindo ma bani nasiam, songon ahu ma nasiam, ai ahu pe songon nasiam do. Seng ongga na so pintor ibahen nasiam bangku.

13Tapi ibotoh nasiam do, ibagas hagalekon ni daging do huboan Ambilan Na Madear bani nasiam bani mulani ondi.

14Anjaha sanggah na tarlajou nasiam halani pardagingonku, seng magigi barang mapas uhur nasiam pasal ai, tapi songon malekat ni Naibata do ijalo nasiam ahu, songon Kristus Jesus do tene.

15Ija do nuan hatuahon nasiam in? Ai husaksihon ma bani nasiam, sihol buaton nasiam do ijia mata nasiam, laho mambere ai bangku, ambit na tarbahen.

16Ai na gabe imbang nasiam do ahu, halani huhatahon bani nasiam hasintongan?

17Seng pitah haringgason ni sidea ai bani nasiam, tapi sihol padaraton ni sidea do nasiam, ase ringgas nasiam mangkopkop sidea.

18Dear do tongtong marringgas ni uhur nasiam dompak na madear, anjaha ulang ma pitah sanggah i lambung nasiam ahu.

19Nasiam niombahku, na dob huarou use, paima manjadi rupa ni Kristus ibagas nasiam.

20Iparsinta uhurhu do, ase i tongah-tongah nasiam ahu sonari, anjaha tarpadear-dear ahu sorangku, ai jut do uhurhu pasal nasiam.

21Nasiam na marosuh gomgoman ni titah in, hatahon nasiam ma bangku, “Ai lang domma ibogei nasiam titah in?”

22Tarsurat do ijai, “Dua do anak ni si Abraham, sada humbani jabolonni naboru anjaha na sada nari humbani boru mardeka ai.”

23Tapi mangihutkon daging do partubuh ni na humbani boru jabolon ai, tapi humbani bagah-bagah do na humbani boru mardeka ai.

24Limbaga na mararti do in. Ai padan na dua in do sidea: Na sada hun Dolog Sinai, na manubuhkon anak gabe jabolon, ai ma si Hagar.

25Ai Hagar ai ma Dolog Sinai i tanoh Arab, anjaha usih ma ai bani Jerusalem sisonari, ai jabolon do ai rap pakon niombahni.

26Tapi Jerusalem na i atas ai, ai do boru mardeka ai, anjaha ai do inang banta.

27Ai tarsurat do, “Marmalas ni uhur ma ho na lambang, na so tubuhan tuah; marolob-olob ma ho anjaha marsora na gogoh, na so mangarou anak. Ai buei do niombah ni na punjung in, buenan humbani na marparamangon.”

28Tapi nasiam sanina, anak bagah-bagah do nasiam mangihutkon si Isak.

29Tapi ijia age sonari, iparburu na tinubuhkon mangihutkon daging do na tinubuhkon mangihutkon Tonduy.

30Tapi aha do nini Surat in? “Usir ma boru jabolon in rap pakon anakni, ai seng bulih anak ni boru jabolon in rap manean pakon anak ni boru mardeka in.”

31Ase, nasiam sanina, sedo anak ni boru jabolon hita, tapi anak ni boru mardeka do.


  Share Facebook  |  Share Twitter

 <<  Galatia 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran