Dual PanelParsombahon ni si Mika bani Gana-gana
1Adong ma sada dalahi hun Dolog Efraim, na margoran si Mika.
2Nini ma hubani inangni, “Sisaribu saratus pirak ai, na binuat ni halak hun bamu pala mamurai ham halani ai, anjaha hubogei do homa ai ihatahon ham, tonggor ma, bangku do duit ai, ai ahu do mambuatsi. Jadi nini inangni ai ma, ʻSai ipasu-pasu Jahowa ma ho anakku.ʼ
3Dob ai ipaulak ma duit pirak sisaribu saratus ai hu bani inangni. Tapi nini inangni ai ma, ʻDomma hupapansing hinan duit on bani Jahowa marhitei tanganku bani anakku, ase ipauli hunjin sada gana-gana na niuhir pakon sada gana-gana na tinuang; on pe hupaulak ma in bam.ʼ”
4Dob ai ipaulak ma duit ai hubani inangni; ibuat naboru ai ma dua ratus duit pirak anjaha ibere ma ai hubani tukang pirak, gabe ipauli ma hunjai sada gana-gana na niuhir pakon sada gana-gana na tinuang; lanjar i rumah ni si Mika do ai inahkon.
5Adong do rumah panumbahan ni naibata na legan bani si Mika; ipauli ma sada baju efod pakon terapim anjaha ipabangkit ma sada humbani anakni gabe malimni.
6Bani panorang ia seng dong raja bani halak Israel, ganup do marsisombah rosuh ni uhurni bei.
7Adong ma sada parana hun Betlehem na i Juda, humbani marga Juda; sada halak Levi do ia anjaha na manginsolat do ia ijai.
8Jadi laho ma halak ai hun huta Betlehem na i Juda, laho manginsolat atap ija ia holi boi sangkot; bani pardalananni ai das ma ia hu Dolog Efraim hu rumah ni si Mika.
9Isungkun si Mika ma ia, “Roh hunja do ham? Nini ma mambalosi ʻHalak Levi do ahu hun Betlehem na i Juda, anjaha na laho manginsolat do ahu, atap ija holi ahu boi sangkot.ʼ
10Dob ai nini si Mika ma hu bani, ʻTading i lambungku ma ham, gabe bapa pakon malim bangku; hubere pe bamu sapuluh duit pirak satahun, sapasang pakean pakon bohalmu.ʼ Jadi ibalosi halak Levi ai ma rap pakonsi.”
11Rosuh do uhur ni halak Levi ai marianan i lambung ni dalahi ai, anjaha usih hubani anakni sandiri do ibahen hubani anak parana ai.
12Ipabangkit si Mika ma halak Levi ai; gabe malimni ma anak parana ai anjaha marianan i rumah ni si Mika.
13Jadi nini si Mika ma, “Sonari hubotoh ma, sai tumpakon ni Jahowa do ahu, halani na dob dong halak Levi gabe malim bangku.”