Dual PanelIrampok Halak Dan Gana-gana Sisombahon ni si Mika ai
1Bani panorang ai seng dong raja bani halak Israel; anjaha bani ari ai mangindahi parbagiananni do halak Dan bahen iananni, ai das hubani ari ai seng dapotan parbagianan ope sidea i tongah-tongah ni halak Israel.
2Dob ai ipabangkit halak Dan ma lima halak na bisang humbani haganup tumpuan ni sidea, na marasal hun Zora pakon Estaol, laho mangkahapi tanoh ai pakon mantulimatisi, anjaha nini ma dompak sidea, “Laho ma nasiam mamareksai tanoh in!” Jadi dob das sidea hu Dolog Efraim, hu rumah ni si Mika, marborngin ma sidea ijai.
3Dohorhonsi sidea hu rumah ni si Mika ai, itanda sidea ma sora ni halak Levi na maposo ai, lanjar tuluy ma sidea hujai anjaha nini hu bani, “Ise do na mamboan ham hujon? Aha do horjamu ijon anjaha mangaha do ham hujon?
4Nini ma dompak sidea, ʻSonon-sonon do ibahen si Mika hu bangku; iupahi do ahu gabe malim bani.ʼ
5Dob ai nini sidea ma hu bani, ʻMahua sungkun ma hubani Naibata, ase ibotoh hanami barang na manjadi do na idalankon hanami on?ʼ
6Nini malim ai ma dompak sidea, ʻLaho ma nasiam ibagas damei!ʼ Dear do dalan na nilangkahkon nasiam on bani pangidah ni Jahowa.”
7Dob ai laho ma na lima halak ai, gabe das ma sidea hu Lais. ididah sidea ma mardamei-damei do rayat na marianan ijai ai, mangirikkon adat ni halak Sidon, sonang anjaha damei, seng hurangan atap bani aha pe na adong i tanoh on, bayak tumang do sidea; daoh do sidea humbani halak Sidon, anjaha seng dong parsaoran ni sidea pakon halak na legan.
8Jadi dob mulak na lima halak ai hubani sanina ni sidea i Zora pakon i Estaol, nini saninani ai ma dompak sidea, “Aha do barita nasiam?
9Nini sidea ma mambalosi, ʻBingkat ma hita mandorab sidea, ai domma ididah hanami tanoh ai, anjaha tonggor ma, dear tumang do tanoh ai. Sai soh soh ope nasiam? Ulang ma marlambat-lambat nasiam manoluk tanoh ai bahen parbagianan nasiam.ʼ
10Anggo das ma nasiam hujai, jumpah nasiam ma ijai sada bangsa na marsonang-sonang. Lumbang do tanoh ai hu siamun sambilou, tongon, domma ibere Naibata tanoh ai hubagas tangan nasiam, ai ma sada tanoh na so hurangan pasal aha pe na adong i tanoh on.”
11Jadi bingkat ma hunjai, hun Zora pakon Estaol, onom ratus halak humbani halak Dan, na marsinjata bei laho hu parporangan.
12Dob ai tangkog ma sidea lanjar marsaran i Kiriat-Jearim i Juda; halani ai do ase margoran ianan ai parsaranan Dan ronsi sadari on, tibalni hampit hasundutan ni Kiriat-Jearim.
13Hunjai mardalan ma sidea torus hu Dolog Efraim, gabe das ma sidea hu rumah ni si Mika.
14Dob ai nini silima halak na dob mangkahapi tanoh ai ma dompak sanina-sanina ni sidea ai ma, “Ibotoh nasiam do, paboa na adong do i rumah on baju efod, terapim, gana-gana na niuhir pakon gana-gana na tinuang? On pe timbang nasiam ma barang aha do sibahenon nasiam.”
15Jadi tuluy ma sidea hujai, gabe das ma sidea hu rumah ni halak Levi na maposo ai, hu rumah ni si Mika, anjaha isungkun sidea ma barang na sonang do ia.
16Ia sionom ratus halak na humbani halak Dan ai, na marsinjata porang ai, jongjong do i lambung ni horbangan.
17Tapi silima halak, na dob mangkahapi tanoh ai, masuk ma hubagas, ipambuat ma gana-gana na niuhir, baju efod, terapim pakon gana-gana na tinuang ai. Jongjong do anggo malim ai i horbangan rap pakon sionom ratus halak, na marsinjata porang ai.
18Jadi dob masuk sidea hu rumah ni si Mika, anjaha dob ibuat gana-gana na niuhir, baju efod, terapim pakon gana-gana na tinuang ai nini malim ai ma dompak sidea, “Aha do na binahen nasiam in?
19Jadi nini sidea ma hu bani, ʻSip ham, songom ham pamanganmu, irikkon ham ma hanami, ham ma jadi bapa pakon malim bennami; ija do dearan bamu, gabe malim i rumah ni sada halak, barang malim ham bani sada pangku ampa marga ni Israel?ʼ”
20Jadi malas ma uhur ni malim ai, ibuat ma baju efod, terapim pakon gana-gana na niuhir ai, lanjar laho ma ia hu tongah-tongah ni na mabuei ai.
21Dob ai marhusor ma sidea lanjar bingkat, ibahen sidea ma hu lobei ni sidea sagala dakdanak, pinahan pakon ugas-ugas na maharga.
22Dobkonsi tardaoh sidea hun rumah ni si Mika, martumpu ma dalahi parlambung rumah ni si Mika, lanjar iayaki sidea ma halak Dan ai.
23Idiloi sidea ma halak Dan ai. Marhusor ma halak Dan ai, lanjar nini ma dompak si Mika, “Aha sihol bam, ase iarahkon ho halak in?
24Nini ma mambalosi, ʻIbuat nasiam do naibatangku, na hupadear in rap pakon malim in, lanjar bingkat nasiam. Aha mando na tading bangku? Aha do homa na hinatahon nasiam bangku: Aha sihol bam?ʼ
25Nini halak Dan ai ma mambalosi, ʻUlang be tarbogei soramu bennami, holi adong halak na mandorab ho halani borit ni uhurni, gabe rotap hosahmu pakon hosah ni parrumahmu.ʼ”
26Jadi, dob ai itoruskon halak Dan ma pardalanan ni sidea. Jadi dob ididah si Mika gogohan do sidea hun bani, marhusor ma ia lanjar mulak hu rumahni.
27Ia halak Dan, na mamboan ugas-ugas, na pinauli ni si Mika ai, sonai homa malimni, irohi sidea ma Lais, ai ma bangsa na marsonang-sonang anjaha na mardamei ai, lanjar italuhon ma sidea marhitei podang anjaha itutung sidea ma hutani.
28Seng dong na paluahkon sidea, ai holang do huta ai hun Sidon, anjaha seng dong parsaoran ni sidea pakon halak na legan, ambahni ai bani habungan do huta ai dohorhon Bet-Rehob. Ipauli sidea ma use huta ai lanjar marianan ijai.
29Anjaha ibahen sidea ma goran ni huta ai Dan, mangihutkon goran ni si Dan, ompung ni sidea ai, anak ni si Israel; Lais do goran ni huta ai sapari.
30Ipajongjong halak Dan ai ma gana-gana na niuhir ai bani sidea, anjaha si Jonatan, anak ni si Gersom, anak ni si Musa, ia do gabe malim bani marga Dan pakon bani ginomparni, ronsi ari na tarbuang pangisi ni nagori ai.
31Jadi ipajongjong sidea ma i tongah-tongah ni sidea gana-gana na binahen ni si Mika ai, anjaha ijai do gana-gana ai sadokah adong lampolampo ni Naibata i Silo.