Dual PanelJesus Lobihan humbani si Musa
1Halani ai, nasiam sanina na mapansing, siparrupei bani pandiloon na hun nagori atas, tonggor nasiam ma Apostel anjaha Sintua ni Malim in, na sinaksihonta in, ai ma Jesus.
2Hatengeran ni uhur do Ia bani na pabangkitkon-Si, songon si Musa ibagas ganup rumahni ai.
3Tapi bueian do hasangapon ibere Bani ase hubani si Musa, domu hubani surung ni hasangapon bani na pajongjong rumah marimbang rumah na pinajongjong ni ai.
4Ai ganup rumah, adong do na paulihonsi, tapi Naibata do na mangadongkon haganup.
5Ia si Musa tongon, haposan do ia i rumah ni Naibata, songon siparugas, laho manaksihon na sihol sisahapkononkon ope use,
6tapi anggo Kristus haposan do songon Anak, na manggomgomi rumah ni Naibata, anjaha hita do rumah-Ni ai, anggo poltik ijolom hita ronsi ujungni hinsah ni uhur ampa tenger ni uhur bani na niarapkon ai.
Lumba-lumba dompak Uhur na So Porsaya ampa na Marbalik
7Halani ai, songon na hinatahon ni Tonduy Na Pansing, “Sadari on, sanggah na binogei nasiam sora-Ni,
8ulang ma pamapir nasiam uhur nasiam, songon sanggah ari parlawanon ai, sanggah ari parlajouan ai i halimisan.
9Ijai ilajou anjaha isuba ompung nasiam do Ahu, age pe ididah sidea na Huhorjahon ompat puluh tahun dokahni.
10Halani ai manggila do Ahu bani na sasundut ai anjaha Huhatahon, ʻTongtong do kahou uhur ni sidea, seng itanda sidea dalan-Ku,ʼ
11pala marbija Ahu ibagas ringis-Hu, sabonar seng bulih masuk sidea hu parsaranan-Ku.
12Nasiam sanina, jaga ma nasiam, ase ulang adong paruhur na jahat, na so porsaya humbani nasiam, na manundali Naibata na manggoluh in.
13Tapi marsipagolpaan ma nasiam ganup ari, sadokah hata ʻSadari onʼ marlaku ope, ase ulang adong humbani nasiam, na gabe mapir uhurni halani dousa na paoto-otohon in.
14Ai domma parrupei hita bani Kristus, anggo poltik ijolom hita tenger ni uhur, na dob adong banta bani mulani ronsi ujungni.
15On do na hinatahon ni Surat in, ʻSadari on, sanggah na binogei nasiam sora-Ni, ulang ma pamapir nasiam uhur nasiam, songon sanggah ari parlawanon ai.ʼ
16Ise do sipanlawan ai, age pe ibogei sora-Ni? Ai lang haganup do sidea, na mandarat hun Masir, binobahon ni si Musa?
17Ise do na ginilaan-Ni ai pala ompat puluh tahun dokahni? Ai lang sidea na mardousa ai do? Radag do bangkei ni sidea i halimisan ai.
18Dompak ise do Ia marbija, paboa na so bulih sidea masuk hu parsaranan-Ni ai? Ai lang dompak sidea na so sipambalosi ai do?
19Jadi ididah hita ma, halani na so porsaya do sidea ase lang tarbahen sidea masuk.”