Dual PanelGalangan Pardousaon
1Dob ai nini Jahowa ma hubani si Musa,
2“Hatahon ma hubani halak Israel, anggo adong barang ise na mardousa ibagas na so tinuntunni dompak sada titah ni Jahowa, gabe ihorjahon barang aha na so bulih horjaonkonni namin:
3Anggo malim na dob mininakan do na mardousa ai, gabe iparroh hasalahan hubani bangsa ai, maningon galangkononni do halani dousani na dob hinorjahonni ai sada anak ni lombu na so martikas hubani Jahowa bahen galangan pardousaon.
4Maningon boanonni ma lombu ai hu labah ni lampolampo partumpuan ai, hu lobei ni Jahowa, anjaha tampeihononni ma tanganni hu ulu ni lombu ai, anjaha sayatonni ma lombu ai i lobei ni Jahowa.
5Dob ai buaton ni malim na dob mininakan ai ma humbani daroh ni lombu ai anjaha iboan ma ai hubagas lampolampo partumpuan ai.
6Sornobkonon ni malim ai ma jari-jarini hubagas daroh ai, anjaha pispiskononni ma humbani daroh ai pitu hali i lobei ni Jahowa i lobei ni tirei ni ianan na mapansing ai.
7Maningon lapuhonon ni malim ai homa humbani daroh ai hubani tanduk ni anjapanjap panutungan ni dahupa na misbou ai i lobei ni Jahowa, na ibagas lampolampo partumpuan ai, dob ai ganup daroh na teba ai humbani lombu ai, maningon useihononni do ai hu dasor ni anjapanjap panggalangan ni galangan situtungon na i labah ni lampolampo partumpuan ai.
8Maningon buatonni do ganup taboh-taboh ni lombu galangan pardousaon ai, sonai age taboh-taboh na manrongkob bituhani ronsi ganup taboh-taboh na i atas ni bituhani ai;
9sonai homa piah-piahni na dua ai pakon taboh-taboh na longkot hujai na bani binongeini, sonai homa bongbong daroh na dalngop bani atei-atei ai, rap pakon piah-piah ma buatonni ai,
10dos songon na binuatni ai humbani lombu galangan pardameian, anjaha maningon galangkonon ni malim ma ai i atas ni anjapanjap panggalangan ni galangan situtungon.
11Tapi anggo bobak ni lombu ai rap pakon ganup dagingni, uluni, naheini, bituhani pakon ginagatni,
12ganup lombu ai tene maningon boanonni hu darat ni parsaranan ai, hubani sada ianan na pansing, hubani pandurusan ni abuan, anjaha maningon tutungonni do ai i atas soban ibagas apuy, maningon i atas pandurusan ni abuan do tutungonni ai.
13Anggo ganup tumpuan ni Israel do na mardousa ai halani na so tinuntunni, anjaha ponop ai humbani pangidah ni tumpuan ai, gabe ihorjahon sidea na manlanggar dompak sada titah ni Jahowa, na so bulih namin horjahononkon, gabe salah sidea,
14hape talar use hubani tumpuan ai dousa na hinorjahon ni sidea ai, maningon galangonkon ni tumpuan ai do sada anak ni lombu bahen galangan pardousaon, anjaha maningon boanonni do ai hu lobei ni lampolampo partumpuan ai.
15Tampeihonon ni pangintuai ni tumpuan ai ma tangan ni sidea bani ulu ni lombu ai i lobei ni Jahowa, anjaha sayatonni ma lombu ai i lobei ni Jahowa.
16Dob ai boanon ni malim na dob mininakan ai ma deba humbani daroh ni lombu ai hu lampolampo partumpuan ai,
17anjaha sornobkonon ni malim ai ma jari-jarini hubagas daroh ai, anjaha pispiskononni ma ai pitu hali i lobei ni Jahowa hampit lobei ni tirei ai.
18Maningon lapuhononni homa humbani daroh ai hubani tanduk ni anjapanjap, na i lobei ni Jahowa, na ibagas lampolampo partumpuan ai, anjaha ganup daroh na teba ai maningon useihononni do ai hu dasor ni anjapanjap panggalangan ni galangan situtungon, na i labah ni lampolampo partumpuan ai.
19Tapi ganup taboh-taboh ai maningon buatonni do hunjai anjaha tutungonni i atas ni anjapanjap ai.
20Maningon bahenonni do hubani lombu ai, usih songon na binahenni hubani lombu pardousaon ai, maningon sonai do bahenonni ai. Sonai ma bahenon ni malim ai pardearan bani sidea, gabe dapotan hasasapan ni dousa sidea.
21Anjaha maningon boanonni do lombu ai hu darat ni parsaranan ai, anjaha tutungonni ma ai songon na dob tinutungni lombu na parlobei ai, ai ma gabe galangan pardousaon bani tumpuan ai.
22Anggo mardousa sada raja humbani na so tinuntunni gabe ihorjahon na so bulih namin horjaonkonni, mangihutkon titah ni Jahowa Naibatani, gabe marsalah ia marhitei ai;
23anggo domma talar bani dousani na hinorjahonni ai, maningon boanonni do sada hambing tunggal na so martikas bahen galanganni.
24Tampeihononni ma tanganni hubani ulu ni hambing tunggal ai, lanjar sayatonni ma ai bani ianan panayatan ni galangan situtungon i lobei ni Jahowa, ai ma gabe galangan pardousaon.
25Dob ai buaton ni malim ai ma deba humbani daroh ni galangan pardousaon ai marhitei jari-jarini, anjaha lapuhononni ma ai hubani tanduk ni anjapanjap panggalangan ni galangan situtungon ai; ia daroh na teba ai useihononni ma ai hu dasor ni anjapanjap panggalangan ni galangan situtungon ai.
26Tapi anggo taboh-tabohni ai ganup, maningon tutungonni do ai bani anjapanjap, usih songon taboh-taboh ni galangan pardameian. Sonai ma pardearan halani dousani bahenon ni malim ai, gabe dapotan hasasapan ni dousa ma ia.
27Anggo mardousa sahalak simbuei pangisi ni nagori in halani na so tinuntunni, marhiteihon na manlanggar sada humbani titah ni Jahowa, gabe marsalah ia;
28jadi anggo domma talar bani dousani na hinorjahonni ai, maningon boanonni sada hambing boru-boru na so martikas bahen galangan halani dousani na dob hinorjahonni ai.
29Tampeihononni ma tanganni bani ulu ni galangan pardousaon ai, lanjar sayatonni ma ai bani ianan ni galangan situtungon.
30Dob ai buaton ni malim ma deba humbani darohni ai marhitei jari-jarini, anjaha lapuhononni ma ai bani tanduk ni anjapanjap panggalangan ni galangan situtungon ai, anjaha darohni na teba ai useihononni ma hu dasor ni anjapanjap ai.
31Tapi ganup taboh-tabohni ai maningon buatonni do ai, songon pambuatni bani taboh-taboh ni galangan pardameian, anjaha tutungon ni malim ai ma ai bani anjapanjap ai, bahen uap na misbou bani Jahowa. Sonai ma pardearan bahenon ni malim ai bani, jadi dapotan hasasapan ni dousa ma ia.
32Anggo anak ni biribiri iboban bahen galangan pardousaonni maningon boru-boru na so martikas do boanonni.
33Anjaha tampeihononni ma tanganni bani ulu ni galangan pardousaon ai, lanjar sayatonni ma ai bahen galangan pardousaon bani ianan panayatan ni galangan situtungon ai.
34Dob ai buaton ni malim ma deba humbani darohni ai marhitei jari-jarini, anjaha lapuhononni ma ai bani tanduk ni anjapanjap panggalangan ni galangan situtungon ai, anjaha darohni na teba ai useihononni ma hu dasor ni anjapanjap ai.
35Tapi taboh-tabohni ai ganup maningon do ai, songon pambuatni bani taboh-taboh ni anak ni biribiri humbani galangan pardameian, anjaha maningon tutungon ni malim ma ai bani anjapanjap ai bahen galangan apuy bani Jahowa. Sonai ma pardearan bahenon ni malim ai bani halani dousa na hinorjahonni ai, jadi dapotan hasasapan ni dousa ma ia.”