Alkitab Mobile SABDA
[VER] : [SIMALUNGUN]     [PL]  [PB] 
 <<  Kejadian 28 >> 

Parporus ni si Jakob hu Haran

1Dob ai idilo si Isak ma si Jakob, ipasu-pasu ma ia, anjaha nini ma marsahap bani, “Ulang buat humbani boru Kanaan parinangonmu.

2Marugas ma ho, misir ma ho hu Padang Aram, hu rumah ni si Betuel, bapa ni inangmu, hunjai ma buat parinangonmu, humbani boru ni si Laban, botou ni inangmu.

3Sai ipasu-pasu Naibata Pargogoh na so halompouan in ma ho, marginompari anjaha ipabuei ma ho, ase buei bangsa marompung hubam.

4Sai ibere ma hubam pasu-pasu na hubani si Abraham, hubam pakon hubani ginomparmu rap pakon ho, ase ho manean tanoh panginsolatanmin, na binere ni Naibata hubani si Abraham.”

5Jadi ipaingkat si Isak ma si Jakob, laho hu Padang Aram, hubani si Laban, anak ni si Betuel, halak Aram ai, botou ni si Rebekka, inang ni si Jakob pakon si Esau.

Ibuat si Esau Boru ni si Ismael bahen Parinangonni

6Jadi dob iidah si Esau, na dob ipasu-pasu si Isak si Jakob anjaha ipaingkat ia hu Padang Aram, laho mambuat boru bani hunjai, anjaha pinandangni ai ia sanggah na ipasu-pasu ia, “Ulang buat parinangonmu humbani boru Kanaan,”

7anjaha na dob itangihon si Jakob hata ni bapani pakon inangni ai anjaha laho ia hu Padang Aram,

8anjaha dob iidah si Esau, na sogam do uhur ni si Isak bapani ai, mangidah boru Kanaan ai,

9laho ma ia marayak si Ismael, ibuat ma si Mahalat, boru ni si Ismael, anak ni si Abraham, botou ni si Nebayot bahen parinangonni, tambah ni parinangonni hinan.

Nipi ni si Jakob i Betel

10Jadi misir ma si Jakob hun Berseba laho hu Haran.

11Das ma ia hubani sada ianan, jadi marborngin ma ia ijai, halani na dob sundut mata ni ari. Ibuat ma sada batu na ijai ai bahen halang uluni, lanjar ipapodom ma ijai.

12Dob ai marnipi ma ia, iidah ma sada andar na pinajongjong hu tanoh anjaha ujungni das ronsi langit; jadi tonggor ma, marhuatas hu toruh do malekat ni Naibata ijai.

13Jongjong do Jahowa i babouni, anjaha nini ma, “Ahu do Jahowa, Naibata ni ompungmu si Abraham pakon Naibata ni si Isak; ia tanoh na pinodomanmon, berehonon-Ku do in hubam pakon hubani ginomparmu.

14Anjaha doskon orbuk ni tanoh on do magira buei ni ginomparmu, anjaha manrarat ma ho hu hasundutan pakon hu hapoltakan, hu utara pakon hu dangsina; anjaha dapotan pasu-pasu do sagala marga na i tanoh on marhitei ho pakon ginomparmu.

15Tonggor ma, sai hasomanan-Ku anjaha ramotan-Ku do ho barang huja pe ho laho, anjaha bahenon-Ku do ho mulak hu tanoh on; tonggor, seng anjai tadingkonon-Ku ho, anggo seng ope Hupasaud na Hubagahkon bam.”

16Dob ai tarpuho ma si Jakob humbani na modom ai, jadi nini ma, “Tongon tumang, bani ianan on do Jahowa, tapi seng hubotoh hinan.”

17Jadi mabiar ma ia, nini ma, “Na jombut tumang do ianan on, seng anjai lang rumah ni Naibata do on, anjaha horbangan ni nagori atas do on.”

18Dob ai girah sogod puho ma si Jakob, ibuat ma batu na pinarbantalni ai, ipajongjong ma ai bahen tanda, anjaha iuseihon ma minak hu atasni.

19Ibahen ma goran ni ianan ai Betel; Lus do goran ni huta ai na sain dokah.

20Marbagah-bagah ma si Jakob, nini ma, “Anggo ihasomani anjaha iramoti Naibata do ahu bani dalan sidalananku, anjaha ibere bangku ruti sipanganon ampa hiou sipakeion,

21anjaha mardamei-damei ahu mulak ibobahon hu rumah ni bapa, jadi Jahowa ma Naibatangku bahenonku.

22Anjaha batu na hupajongjong on bahen tanda, gabe rumah ni Naibata ma on; anjaha haganup na binere-Mu hu bangku, parsapuluhonku ma in Bamu tongon-tongon.”


  Share Facebook  |  Share Twitter

 <<  Kejadian 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel