Alkitab Mobile SABDA
[VER] : [SIMALUNGUN]     [PL]  [PB] 
 <<  Kejadian 31 >> 

Lintun si Jakob humbani si Laban

1Dob ai tarbogei si Jakob ma sahap-sahap ni anak ni si Laban, na mangkatahon, “Domma ibuat si Jakob ganup arta ni bapanta; marharorohan humbani haadongan ni bapanta do habayakonni ai ganup.

2Ambah ni ai iidah si Jakob do humbani bohi ni si Laban, seng be songon na saindokah ia hubani si Laban.

3Jadi marsahap ma Jahowa hubani si Jakob, “Mulak ma ho hu tanoh ni ompungmu pakon hu tanoh ni hade-hademu, Huhasomani pe ho.

4Isuruh si Jakob ma mandilo si Rahel pakon si Lea roh hu sampalan hu ianan ni biribirini.”

5Nini ma dompak sidea, “Domma huidah humbani bohi ni bapanta, seng be songon na saindokah ia hu bangku, tapi ihasomani Naibata ni bapa do ahu.

6Ibotoh nasiam do, humbani bois ni gogohku do ahu mangkorja bani bapanta.

7Tapi sai iguak-guaki bapanta ai do ahu anjaha sapuluh hali ma iubah upahku; tapi seng ilopas Naibata ia mangagou ahu.

8Anggo ihatahon na marrintik ma upahmu, jadi marrintik ma ipantubuhkon ganup biribiri ai. Tapi anggo ihatahon, ?Sijolang ma upahmu,? jadi sijolang ma ipantubuhkon ganup biribiri ai.

9Ase Naibata do mambuat pinahan ni bapanta, anjaha ibere ai hu bangku.

10Bani na sahali sanggah panorang hagarangon ni biribiri ai, mangkawah ma ahu gabe huidah ma bani nipingku tunggal na marrintik, sijolang pakon siganding marboru-borui biribiri ai.

11Ihatahon malekat ni Naibata ma hu bangku ibagas nipi ai, ?Jakob!? Balosku, ?Ijon do ahu.?

12Jadi nini ma, ?Mangkawah ma ho, anjaha tonggor ma, na marrintik, sijolang ampa siganding do sagala tunggal na marboru-borui biribiri ai, ai domma Huidah ganup na binahen ni si Laban bam.

13Ahu do Naibata na i Betel ondi sanggah na mininakanmu ijai batu, anjaha na marbagah-bagah ho Bangku. On pe, misir ma ho, bungkas hun tanoh on, mulak hu tanoh ni hade-hademu.?”

14Dob ai nini si Rahel pakon si Lea ma mambalosisi, “Ai adong ope rupei atap siteanon bennami i rumah ni bapanami?

15Ai lang halak na legan marga mando hanami parhiraanni? Ai domma ijual hanami, anjaha domma bois ipangan bolinami.

16Anjaha sagala habayakon na binuat ni Naibata humbani bapanami, hita pakon anakta hinan do simadasi. On pe, sagala na hinatahon ni Naibata hubam, bahen ma.”

17Jadi marugas ma si Jakob, ipahundul ma anakni pakon parinangonni hu atas unta.

18Iboban ma pakon pinahanni ganup ronsi sagala ugas-ugasni, na niombouni ai, ampa pinahan parbagiananni, na jumpahsi i Padang Aram, laho mangayaki si Isak, bapani ai, hu tanoh Kanaan.

19Ia si Laban domma laho manggusting imbulu ni biribirini; jadi itangko si Rahel ma tarapim ni bapani ai.

20Ase iakal-akali si Jakob do si Laban, halak Aram ai, ai seng ipatugah hubani na laho lintun ai ia.

21Sonin ma lintun ia ampa haganup na dong bani. Misir ma ia mandipari bah Eprat, laho mardalan dompak Dolog Gilead.

Pardamean ni si Jakob pakon si Laban

22Patolu-arihon tarbotoh si Laban ma, na dob lintun si Jakob ai.

23Iarahkon si Laban ma sanina-saninani mangayakisi; papitu-ariankon pe ase jumpahsi ia i Dolog Gilead.

24Tapi roh ma Naibata bornginni ai ibagas nipi hubani si Laban, halak Aram ai, nini ma hu bani, “Jaga ho, ulang das igilai ho si Jakob ai atap marhitei hata aha pe.”

25Jadi jumpah si Laban ma si Jakob. Ia si Jakob domma ipajongjong barung-barungni i dolog ai; si Laban pe ampa sanina-saninani domma ipajongjong barung-barungni i Dolog Gilead.

26Nini si Laban ma hubani si Jakob, “Aha do na binahenmu, ase iakal-akali ho ahu, anjaha iluahon ho borungku songon taban-taban na dapot podang?

27Mase ma marponop-ponop ho lintun anjaha iakal-akali ho ahu? Mase ma lang ipatugah ho hu bangku, ase hupaingkat honamin marhitei malas ni uhur ampa doding-doding, marhitei gonrang ampa husapi?

28Ambahni ai seng ipalopas ho ahu manummah pahompungku ampa borungku. Ase na lepak do pambahenanmin.

29Markuasa do namin ahu mambahen na masambor bam; tapi domma marsahap hu bangku Naibata ni bapamu na bodari, nini, ?Jaga ho, ulang das igilai ho si Jakob atap marhitei hata aha pe.?

30On pe, ia sihol laho ho namin, halani siholan ho hu rumah ni bapamu, mase ma itangko ho naibatangku?”

31Dob ai ibalosi si Jakob ma si Laban, nini ma, “Halani na mabiar do ahu, ai ninuhurhu, atap na rampasonmu do nasiborumu in humbangku.

32Tapi bani ise jumpah naibatamu in, marutang hosah ma ia. Pareksa ham ma i lobei ni hasomanta on ganup ugasmu na dong bangku, anjaha buat ham ma in.” Tapi lang ibotoh si Jakob na dob itangko si Rahel do ai hape.

33Jadi masuk ma si Laban hu barung-barung ni si Jakob, hu barung-barung ni si Lea, ampa hu barung-barung ni jabolon puang-puang na dua ai, tapi seng dong jumpahsi. Kaluar ma ia hun barung-barung ni si Lea, laho masuk hu barung-barung ni si Rahel.

34Tapi domma ibuat si Rahel hinan terapim ai, anjaha ibahen hu toruh ni palana ni unta, anjaha ihunduli. Iugei si Laban ma barung-barung ai ganup, hape seng dong jumpahsi.

35Nini si Rahel ma hubani bapani ai, “Ulang ma manringis tuanku, halani na so tarbahen ahu jongjong i lobeimu, ai masa do bangku hasomalan ni puang-puang.” Ase age pe ipindahi, lanjar do seng jumpahsi terapim ai.

36Jadi manringis ma si Jakob, igilai ma si Laban, nini ma mambalosi si Laban, “Aha ma panlanggaronku, aha ma dousangku, ase ipardakdak ham ahu?

37Domma iugei ham ugas-ugasku ganup, aha ma jumpah ham humbani ugas-ugas ni rumahmu? Tibalhon ham ma ai i lobei ni hasomanku ampa hasomanmu, ase sidea manguhumi hita na dua.

38Na dua puluh tahun on rap pakon ham do ahu; seng ongga tarposo biribirimu, anjaha seng ongga hupangan tunggal ni biribirimu.

39Seng ongga hutaruhkon bamu na sinoroh ni binatang, sai hugantihi do ai; sai itunggu ham do humbangku na tinangko ni halak arian atap borngin.

40Sonon do pangahapanku, arian milas ni ari mangankon ahu, borngin borgoh ni ari, anjaha dokahan lang modom do ahu.

41Na dua puluh tahun on i rumahmu do ahu; sapuluh ompat tahun hupangkorjahon ham halani borumu na dua in, onom tahun halani pinahanmu, anjaha sapuluh hali ma iubah ham upahku.

42Ambit lang ihasomani Naibata ni bapa, Naibata ni si Abraham anjaha na hinabiaran ni si Isak ahu, ra sonin tumang do palahoonmu ahu; tapi itatap Naibata do hasombuhonku ampa hangaluton ni tanganku, gabe ipaingat ham nabodari.”

43Jadi nini si Laban ma mambalosi si Jakob, “Borungku do boru in, anakku do anak in, pinahanku do pinahan in anjaha ganup na niidahmin, ahu do simadasi; mintor kahuaonku ma sadari on borungkon atap anak ni sidea na tinubuhkon ni sidea in?

44On pe, bahen hita ma padan, ahu pakon ho, ase in ma jadi saksi i tongah-tongahta.”

45Ibuat si Jakob ma sada batu, ipajongjong ma bahen tanda.

46Dob ai nini si Jakob ma hubani hasomanni ai, “Patumpu hanima ma batu!” Ipambuat sidea ma batu, lanjar ipagugun, lanjar mangan ma sidea i lambung ni gugunan ai.

47Ibahen si Laban ma goran ni ai Jegar-Sahaduta; tapi Galed do ibahen si Jakob goranni.

48Nini si Laban ma, “Gugunan batu on ma jadi saksinta sadari on.” Ai ma halani ase ibahen goran ni gugunan ai Galed

49ampa Mispa, ai nini do, “Jahowa ma na manatap hita anggo sirang bei ma hita.

50Anggo iarsik ho borungkin, barang mambuat boru use ho tambah ni borungkin, ingat ma, age pe seng dong halak i lambungta, tapi Naibata do na gabe saksi banta.”

51Ambah ni ai ihatahon si Laban ope hubani si Jakob, “Tonggor ma gugunan pakon tanda na hupajongjong on banta,

52gugunan on ma jadi saksi, ampa tanda on ma jadi saksi banta paboa na so bulih lopusanku gugunan on marayak ho, ho pe, seng malo lopusanmu gugunan pakon tanda on marayak ahu laho mangagou.

53Naibata ni si Abraham pakon Naibata ni si Nahor, Naibata ni bapa ni sidea ma na gabe panguhum i tongah-tongahta. Jadi marbulawan ma si Jakob hubani Na hinabiaran ni bapa ni si Isak.”

54Dob ai igalangkon si Jakob ma sada galangan i dolog ai, idilo ma hasomanni mangan sagu-sagu. Mangan ma sidea, lanjar marbongin i dolog ai.

55Patarni ai ipagirah si Laban ma puho, isummah ma pahompuni pakon boruni ai, anjaha ipasu-pasu ma sidea; dob ai misir ma ia mulak hu iananni hinan.


  Share Facebook  |  Share Twitter

 <<  Kejadian 31 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran