Dual PanelNipi ni si Josep
1Tapi anggo si Jakob marianan do i tanoh panginsolatan ni bapani hinan, i tanoh Kanaan.
2On ma barita ni ginompar ni si Jakob. Dob marumur sapuluh pitu tahun si Josep, ase poso ope ia, marmahan pinahan ma ia rap pakon abangni, anak ni si Bilha pakon si Zilpa, parinangon ni bapa ni sidua halak ai. Sai ipadas si Josep do barita ni sidea na bajan bani bapa ni sidea.
3Tapi holongan do uhur ni si Israel mangidah si Josep humbani ganup anakni ai, halani ia ma anakni na tubuh bani, sanggah matua ia; jadi ipadear ma bani sada baju ganjang na jenges tumang.
4Dob iidah abangni ai, na holongan do uhur ni bapa ni sidea bani humbani ganup abangni ai, jadi sogam ma uhur ni sidea mangidahsi, anjaha seng be basar parsahap ni sidea bani.
5Marnipi ma si Josep, anjaha ipatugah ma nipini ai hubani abangni ai; jadi lambin sogam ma uhur ni sidea mangidahsi.
6Nini ma dompak sidea: Tangar nasiam ma nipi na hunipi on.
7Tonggor ma, manrahuti radean do hita i tongah juma; dirgak ma jongjong radeanku, jadi roh ma maringgot radean nasiam marsombah hubani radeanku.
8Jadi nini abangni ai ma hu bani: Mintor ho ma manrajai hanami? Anjaha mintor ho ma markuasa hu bennami? Jadi lambin sogamni ma uhur ni sidea mangidahsi halani nipi ampa hatani ai.
9Dob ai marnipi ma ia use, ipatugah ma ai hubani abangni, nini ma, “Tonggor ma, marnipi do ahu use, mata ni ari, bulan ampa sapuluh sada bintang marsombah hu bangku.”
10Dob ipatugah ai hubani bapani pakon hubani saninani, hona hata ni bapani ma ia, nini ma dompaksi: Nipi aha ma nipimai, mintor ahu, pakon inangmu ampa abangmu ma roh manrogop, marsombah hubam?
11Jadi subil ma uhur ni abangni ai mangidahsi, tapi isimpan bapani ai do hata ai ibagas uhurni.
Tarjual si Josep hu Tanoh Masir
12Bani na sahali laho ma abangni marmahan biribiri ni bapani dohorhon Sikem.
13Nini si Israel ma hubani si Josep, “Ai lang dohorhon Sikem do abangmu marmahan? Roh ma ho, ase husuruh ho marayak sidea.” Jadi nini si Josep ma, “Ijon do ahu.”
14Ihatahon ma hu bani, “Laho ma ho manorih atap na horas do abangmu ampa pinahan ai; dob ai mulak ma ho hu bangku mamboan barita.” Jadi isuruh ma si Josep hun habungan Hebron, das ma ia hu Sikem.
15Jumpah sada dalahi ma ia kahou i talun ai; isungkun halak ai ma ia, “Aha do na pinindahanmu?”
16Nini ma, “Abang do na hupindahi. Tolong ham ma patugahkon bangku atap ija do sidea marmahan.”
17Jadi nini dalahi ai ma, “Domma laho sidea hunjon, ai hubogei do sidea marsahap, ʻLaho ma hita hu Dotan.ʼ” Gabe iirikkon si Josep ma abangni ai, jumpahsi ma sidea i Dotan.
18Iidah sidea ma ia humbani na daoh, jadi paima das ia hubani sidea, manriah ma sidea laho mamunuhsi.
19Marsahap ma sidea samah sidea, “Tonggor ma, domma roh siparnipi ai!
20On pe, eta ma, bunuh hita ma ia, anjaha dabuhkon hita ma ia hubagas sada humbani godung ai; jadi hatahon hita ma, na dob ipangan binatang panoroh do ia, ase naidah, atap sonaha do holi arti ni nipini ai.”
21Dob ibogei si Ruben ai, sihol ma paluahonni ia humbani tangan ni sidea, nini ma, “Ulang ma bunuh hita ia.”
22Nini si Ruben ope bani sidea, “Ulang ma duruskon hanima daroh; dabuh hanima ma ia hubagas godung na i halimisan in, tapi ulang mangonai tangan hanima hu bani,” ai sihol do paluahonni ia humbani tangan ni sidea, laho mamboansi mulak hubani bapani.
23Jadi dob das si Josep bani abangni ai, itanggali sidea ma bajuni, baju ganjang na jenges tumang, na pinakeini ai.
24Itangkap sidea ma ia, anjaha idabuhkon hubagas sada godung, tapi lumei do godung ai, seng marisi bah.
25Dob ai hundul ma sidea laho mangan. Sanggah na manatap-natap sidea, gabe iidah sidea ma sada kafilah ni halak Ismael roh hun Gilead rap pakon unta ni sidea, na mamboan na misbou-misbou, minak morum pakon hamonan bani pardalanan ni sidea mamboan barang-barang ai hu tanoh Masir.
26Jadi nini si Juda ma hubani saninani ai, “Aha ma untungta anggo ibunuh hita angginta ai anjaha iponopkon hita darohni?
27Eta, jual hita ma ia hubani halak Ismael an, ase ulang mangonai tangan hita hu bani, ai angginta anjaha dagingta do ia.” Jadi itangihon saninani ai ma ia.
28Sanggah na mamontas partiga-tiga, halak Midian ai, itarik sidea ma si Josep hun godung ai hu atas, dob ai ijual sidea ma ia hubani halak Ismael ai, harga dua puluh rupiah; jadi iboan sidea ma si Josep hu tanoh Masir.
29Mulak ma si Ruben hu godung ai hape lang be i godung ai si Josep jumpahsi, jadi irigati ma bajuni.
30Mulak ma ia hubani saninani, nini ma, “Lang be ijai ambia ai, huja ma laho ahu?”
Pusok ni Uhur ni si Jakob
31Jadi ibuat sidea ma baju ni si Josep ai, isayat sidea ma sada hambing tunggal, dob ai iguluhon ma baju ai hu daroh ai.
32Itongoskon sidea ma baju ganjang na jenges tumang ai hubani bapa ni sidea, anjaha martonah: Na jumpah hanami do on, tandai ma, atap baju ni anakmu do on, atap lang.
33Itandai si Jakob ma ai, jadi nini ma, “Baju ni anakku do on; domma ipangan binatang panoroh ia, domma tongon isoroh si Josep.”
34Dob ai irigati si Jakob ma hiouni, inahkon ma hiou guni hu binongeini, anjaha dokah ma ia marhoru, halani anakni si Josep ai.
35Jadi laho ma anakni pakon boruni mangapohisi, tapi seng ra ia apohon ni sidea nini ma, “Lang, na laho ma ahu marayak anakku hu nagori toruh halani pusok ni uhurhu.” Jadi sai itangisi bapani ma si Josep ai.
36Tapi ijual halak Midian ai ma si Josep hu tanoh Masir, hubani si Potipar, pagawai istana ni Parao, kopala pangawal ni raja.