Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 25 >> 

Guguan Padearhon Sada Rumah na Pansing

1Nini Jahowa ma dompak si Musa,

2“Hatahon ma hubani Israel ase iboban sidea Bangku tumpak bahen galangan, humbani ganup halak niojur ni uhurni jaloonnima tumpak ai Bangku.

3Anjaha on ma tumpak sijaloonnima humbani sidea: Omas, pirak, tombaga,

4bonang na mahonda, sigerger ampa na gerger tumang, kain linnen alus na niangkup, ambulu ni hambing,

5bobak ni biribiri tunggal na tinubar, bobak ni hambing, hayu nangka,

6minak bani lampu, rompah-rompah pakeion mamminaki pakon manutung dahupa,

7mata intan unam pakon mata intan sitatahkonon hubani baju epod pakon tutup tonton.

8Anjaha maningon bahenon ni sidea Bangku sada ianan na pansing, ase marianan Ahu i tongah-tongah ni sidea.

9Romban hubani haganup na Hupatuduhkon in bam, rumang ni rumah ai pakon parugasni haganup, maningon sonai do bahenonnima.”

Poti Parpadanan

10“Maningon paulion ni sidea ma sada poti humbani hayu nangka, tongah tolu asta ganjangni, tongah dua asta bolagni anjaha dua asta gijangni.

11Maningon lampisonmu do ai pakon omas pitah, humbagas pakon hun darat lampisonmu ai, anjaha maningon bahenonmu do bibirni marlais-lais omas inggot.

12Maningon tuangonmu do hujin ompat pinggol-pinggol omas, sibahenonmu hubani suhi-ni na ompat ai, dua pinggol-pinggol hu na salopah, dua pinggol-pinggol hubani na salopah nari.

13Pauli ma lanja-lanja humbani hayu nangka, anjaha lampis ma ai bani omas.

14Anjaha surukkon ma lanja-lanja ai hubagas pinggol-pinggol na longkot bani poti ai laho mangusung poti ai.

15Tapi maningon paturutonmu do lanja-lanja ai ibagas pinggol-pinggol ni poti ai, seng bulih buaton hunjai.

16Anjaha maningon pamasukonmu do hubagas poti ai surat hasaksian na sihol berehonon-Ku bam.

17Maningon paulionmu homa sada langkob pardearan humbani omas pitah; tongah tolu asta ganjangni anjaha tongah dua asta bolagni.

18Anjaha maningon paulionmu dua herub humbani omas, humbani omas na tinopa paulionmu ai, hubani na dua tampakan ni langkob pardearan ai.

19Nahkon ma sada herub hu tampakan na sada anjaha sada herub hu tampakan na sada nari; marsada rap pakon langkob pardearan ai paulionmu herub ai bani tampakan na dua ai.

20Paherbangon ni herub ai ma habongni dompak datas laho manrongkob langkob pardearan ai marhitei habong ni sidea, anjaha padompak sidea; maningon dompak langkob pardearan ai bohi ni herub ai.

21Anjaha nahkononmu ma langkob pardearan ai hu atas ni poti ai, anjaha pamasuk ma hubagas poti ai surat hasaksian siberehonon-Ku bam.

22Ijai ma parayakon-Ku ho, anjaha marsahap Ahu pakon ho hun datas ni langkob pardearan ai, hun holangkolang ni herub na dua ai, na i babou ni poti parpadanan ai, pasal haganup sitonahkonon-Ku hubam, sipatugahonmu hubani halak Israel.”

Meja Hatibalan ni Ruti

23“Maningon paulionmu do sada meja humbani hayu nangka, dua asta ganjangni, saasta bolagni anjaha tongah dua asta gijangni.

24Lampisonmu ma ai pakon omas pitah, anjaha bahenonmu martopi omas inggot.

25Anjaha bahen ma topini santopap bolagni inggot, ampa laisni humbani omas inggot.

26Tuang ma ompat pinggol-pinggol omas, sibahenonmu hubani suhini na ompat ai, na bani naheini na ompat ai.

27Maningon dohor i toruh ni lais ai bahenonmu pinggol-pinggol ai bahen panurukan ni lanja-lanja laho mangusung meja ai.

28Humbani hayu nangka ma lanja-lanja ai paulionmu anjaha lampis ma ai pakon omas anjaha ai ma ipakei mangusung meja ai.

29Anjaha bahen ma pinggan bolakni, pingganni, batilni pakon mangkukni bahen panguseian ni galangan siinumon; maningon humbani omas pitah do paulionmu ai.

30Anjaha maningon nahkononmu tongtong i lobei-Hu bani meja ai ruti sigalangonkon.

Parsuluhan

31“Anjaha maningon paulionmu sada parsuluhan humbani omas pitah; sangkimpal parsuluhan ai topaonmu ampa badanni, dangkahni, boltokni, tungkulni pakon bungani.

32Maningon onom dangkahni luar hun lambungni, tolu dangkah hun salopah ni parsuluhan ai, anjaha tolu dangkah humbani na salopah nari;

33martolu boltok songon bunga ni buah pala ganup dangkahni ai bahenonmu martungkul anjaha marbunga, anjaha martolu boltok songon bunga ni buah pala ganup dangkah ai bahenonmu, martungkul anjaha marbunga; sonai ma bahenonmu dangkah na onom ai na luar hun parsuluhan ai.

34Tapi bani parsuluhan ai maningon ompat do bahenonmu boltokni, songon bunga ni buah pala marhasoman tungkul pakon bunga,

35anjaha santungkul i toruh ni dua dangkah na luar hunjai, santungkul use i toruh ni dua dangkah na luar hunjai anjaha santungkul nari use i toruh ni dua dangkah na luar hunjai; ase bani na onom dangkah, na luar hunjai ai.

36Ai maningon luar hunjai do tungkulni pakon dangkahni; ganupan ai ipauli humbani sangkimpal omas pitah.

37Anjaha bahenonmu do pitu suluhni, sibahenon hu atasni ase marsinalsal ai dompak lobeini.

38Panurturini pakon pangintopini maningon humbani omas pitah do.

39Humbani satalenta omas pitah do paulionmu ganupan ai, ronsi parugasni ganup.

40Anjaha ingat ma mambahensi usih hubani usihan na nididahmu i dolog ai.”


  Share Facebook  |  Share Twitter

 <<  Keluaran 25 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran