Dual PanelSahap ni si Paulus i Lobei ni Raja Agrippa
1Dob ai ihatahon si Agrippa ma hubani si Paulus, “Dear ma marsahap ho pasal dirimu!” Jadi iangkat si Paulus ma tanganni, lanjar marsahap ma ia mangapiti dirini:
2“Na martuah do ahu huahap, ham Raja Agrippa, halani boi ahu sadari on mambahen pangapition pasal diringku dompak sagala pangaduan ni Jahudi,
3halani botoh tumang do ham pasal adat ampa parsalisihan ni halak Jahudi; halani ai mangindo ma ahu bamu, sabar ma ham manangihon hatangku!
4Ibotoh halak Jahudi do ganup parlahouhu humbani haetek-etekonku nari i tongah-tongah ni bangsangku i Jerusalem.
5Tongon domma dokah itandai sidea ahu, anjaha ambit ra sidea, tarsaksihon sidea do, paboa na huirikkon do golongan Parisei, ai ma situlimatan pasal ugamanta.
6Anjaha sonari jongjong do ahu i paruhuman, halani pangarapan ni uhur bani bagah-bagah, na binere ni Naibata bani ompungta.
7Sihol das hujai do na niarapkon ni bangsanta na sapuluh dua morga in, mambahen na ibalosi sidea Naibata arian pakon borngin humbani bois ni gogoh ni sidea. Halani pangarapan ai do, ale Rajanami, mambahen na iaduhon halak Jahudi ahu.
8Sonaha ma, ase adong i tongah-tongah nasiam na so mangkaporsayai, paboa pagoluhon ni Naibata do na matei?
9Ahu sandiri huagan do lobei, maningon patut do lawanon goran ni Jesus na hun Nasaret in sagogoh-gogohni.
10Anjaha sonai do hubahen i Jerusalem. Seng pitah hupatutupkon buei humbani halak na mapansing ai, marhitei kuasa na humbani sintua ni malim, tapi anggo tarbunuh sidea, huhadearhon do ai.
11Gati do huarsik sidea bani haganup Rumah Parguruan, andohar ra sidea manrisai; halani gila ni uhurhu, huparburu do sidea ronsi huta sidaohan.
12Sonai homa laho do ahu hu Damaskus marhitei kuasa ampa parpaingkat ni sintua ni malim.
13Tapi sanggah i tongah dalan, ham Rajanami, sanggah tongah arian, huidah ma sinalsal na liharan marimbang mata ni ari roh hun langit, manondangi ahu inggot ampa hasomanku saodoran.
14Jadi martompasan ma hanami haganup hu tanoh, anjaha hutangar ma sada sora ibagas hata Heber, ʻSaul, Saul! Mase pardakdakonmu Ahu? Sunsah ma ho manandaki suga-suga!ʼ
15Tapi ningku ma, ʻIse do Ham, Tuhan?ʼ Jadi nini Tuhan in ma, ʻJesus do Ahu, na pinardakdakmin!
16Tapi jongjong ma ho! Ase Hupataridahkon pe diring-Ku bam, on do sura-surang-Ku, ai ma pabangkit ho gabe juakjuak ampa saksing-Ku, laho manaksihon na dob nididahmu ampa na sihol pataridahon-Ku ope bam!
17Hupaluah pe ho humbani bangsa on ampa humbani bangsa sipajuh begu-begu, ai hubani sidea do ho suruhon-Ku,
18laho mambuka mata ni sidea, ase mulak sidea humbani hagolapan hubani haliharon, anjaha humbani kuasa ni sibolis hubani Naibata, ase ijalo sidea hasasapan ni dousa ampa rupei rap pakon halak na pansing, halani haporsayaon Bangku.ʼ
19Halani ai, ale Raja Agrippa, seng mangengkar ahu bani panonggoran na hun nagori atas ai,
20gabe huambilankon ma parlobei bani halak na i Damaskus, dob ai bani na i Jerusalem, sonai homa bani haganup na i Judea ampa halak sipajuh begu-begu, ase ipaubah uhur ni sidea anjaha mulak bani Naibata, anjaha iparlahouhon na patut domu bani uhur na dob mubah.
21Halani ai do ase itangkap Jahudi ahu i rumah panumbahan, anjaha domma sihol bunuhon ni sidea ahu.
22Tapi iurupi Naibata do ahu ronsi sadari on, mambahen boi ahu jongjong marambilan bani na etek-etek ampa na magodang, anjaha seng dong na huhatahon na so domu hubani na jinahaan ni nabi-nabi ampa si Musa,
23paboa na maningon manaron do Kristus, anjaha Ia parlobei puho humbani na matei, laho mamaritahon haliharon bani bangsa in ampa bani bangsa sipajuh begu-begu.”
24Halani sonai pangkatahonni mambela dirini, nini si Festus ma marsora na gogoh, “Na podoan do ho Paulus! Parbinotohanmu na buei in do mambahen podoan ho.”
25Nini si Paulus ma, “Seng na podoan ahu, ham Festus, na pinarsangapan, tapi hata na tongon anjaha na torang do na huhatahon.
26Halani torang do in ibotoh raja in, mambahen na hinsah uhurhu mansahapkon ai bamu; ai tenger do uhurhu seng adong age sada hunjai na lingod i lobeimu, ai seng masa ai bani na ponop.
27Ham Raja Agrippa, porsaya do ham bani nabi? Hubotoh na porsaya do ham!”
28Jadi nini si Agrippa ma hubani si Paulus, “Tongkin nari mando ase gabe Kristen ahu ibahen ho.”
29Jadi nini si Paulus ma, “Ipangindo uhurhu humbani Naibata, tongkin atap dokah, seng pitah ham, tapi haganup halak na adong ijon na mambogei hatangku, gabe songon ahu on ma namin sobali gari on.”
30Jadi jongjong ma raja ai ampa gubernur ai ampa si Bernike ampa hasoman ni sidea,
31anjaha dob holang sidea, nini sidea ma samah sidea, “Seng dong ihorjahon ia, na mambahen marutang hosah ia barang tartutup pe.”
32Lanjar nini si Agrippa ma hubani si Festus, “Na boi do namin maluah halak ai, ambit lang apel ia bani Kesar.”