Alkitab Mobile SABDA
[VER] : [SIMALUNGUN]     [PL]  [PB] 
 <<  Lukas 14 >> 

Ipamalum Jesus Sada Halak na Busungon bani Ari Sabat

1Jadi masa ma, sanggah na masuk Ia hu rumah ni sada halak sintua ni Parisei bani ari Sabat, laho mangan domma ijai sidea manggompangi-Si.

2Jadi adong ma ijai, i lobei-Ni, sada halak na busungon.

3Jadi nini Jesus ma manungkun sibotoh titah ampa Parisei ai, “Ai bulih do pamalumon naborit bani ari Sabat atap lang?”

4Tapi sip do anggo sidea. Jadi ijamah ma halak ai, ipamalum ma, lanjar isuruh ma mulak.

5Anjaha nini ma hubani sidea, “Ise humbani nasiam, anggo tarrobung hubagas parigi halode atap lombu nasiam, ai lang mintor itarik nasiam do ai hu atas, age bani ari Sabat?”

6Tapi seng tarbalosi sidea hata-Ni ai.

Porlu ni Toruh ni Uhur ampa Uhur na Maidop

7Dob ai ihatahon ma sada limbaga bani na nidilo ai, halani ididah mamilihi ianan situnggungan sidea. Nini ma dompak sidea,

8“Anggo idilo ham hu pesta parunjukan, ulang ma hundul ham bani hundulan ianan sisangapan, atap adong niontangni sangapan hun bamu,

9gabe roh holi suhut ai, na mangontang ham ampa ia, mangkatahon bamu, ʻBani ma ianan in!ʼ Jadi maila ma ham hundul bani ianan sitoruhan.

10Tapi anggo hona ontang ham, laho anjaha hundul ma ham bani ianan sitoruhan, ase anggo roh na mangontang ham ai, mangkatahon bamu, ʻHu ataskon ma ham hundul!ʼ Jadi sangap ma ham idahon ni ganup hasomanmu na niontang ai.

11Ai sagala na pagijang dirini, patoruhon do, tapi na patoruh dirini, sipagijangon do.”

12Ihatahon ma homa hubani na mangontang-Si ai, “Anggo ibahen ham pesta-pesta sanggah arian atap bodari, ulang ma dilo ham huan-huan atap saninamu, hade-hade atap parhutamu na bayak-bayak, ase ulang idilo sidea use ham, gabe ibalas ai use bamu.

13Tapi anggo mambahen pesta-pesta ham, dilo ham ma na masombuh, na marsining, na repat ampa na mapitung.

14Gabe martuah ma ham, ai seng tarbalos sidea ai bamu, tapi marbalos do ai bamu bani parpuhoon ni halak parpintor.”

Limbaga Pasal Pesta Banggal

15Sada humbani na mangan ai, dob ibogei ai, nini ma hu Bani, “Martuah ma na mangan i Harajaon ni Naibata!”

16Jadi nini Jesus ma mambalosi, “Adong ma sada halak na marpesta banggal; buei do iontang hujai.

17Jadi bani mata ni pesta ai isuruh ma juakjuakni mangkatahon bani na dob niontangni ai, ʻRoh ma nasiam, ai domma sirsir haganup!ʼ

18Tapi adong bei do sidalian ni sidea haganup. Nini na parlobei ai ma hu bani, ʻBaru mamboli juma do ahu, maningon laho do ahu manorih ai. Ulang pala sonaha uhurmu!ʼ

19Na legan mangkatahon, ʻBaru mamboli horbou do ahu lima pasang; laho ma ahu mamareksa ai. Ulang pala sonaha uhurmu!ʼ

20Na legan use mangkatahon, ʻBaru mambuat boru ope ahu, halani ai seng tarbahen ahu roh.ʼ

21Dob mulak juakjuak ai, ipatugah ma ai bani tuanni ai. Jadi marah ma tuan ai, ihatahon ma bani juakjuakni ai, ʻLaho ma ho podas hu pasar ampa hu dalan na i huta on, arahkon ma halak na masombuh, na marsining, na mapitung ampa na repat.ʼ

22Jadi, dob mulak, nini juakjuak ai ma, ʻDomma saud na hinatahonmu ai, ale tuannami, tapi lumbang ope.ʼ

23Jadi ihatahon tuan ai ma bani juakjuak ai, ʻLaho ma ho hu darat bani dalan na bolon ampa topi ni dalan, gogohkon ma sidea masuk ase gok rumahku!ʼ

24Tapi huhatahon ma bennima, ʻSahalak pe lang humbani na niontang hinan bulih mandai sipanganon na hupasirsir in.ʼ”

Na Porlu Laho Mangirikkon Jesus

25Sahali sanggah buei jolma mardalan mangirikkon-Si, jadi marhusor ma Ia mandompakkon sidea, lanjar nini ma,

26“Barang ise na roh hu Bangku, seng tarbahensi gabe susian-Ku, anggo seng sogam uhurni bani bapani, inangni, parinangonni, niombahni, saninani, botouni ronsi hosahni sandiri.

27Seng tarbahen gabe susian-Ku halak na so mamorsan silangni, laho mangirikkon Ahu!

28Ise ma humbani nasiam na sihol pajongjong sada menara, na so hundul lobei mangetong na porlu hujai, atap na sungkup do laho mandobkon horja ai?

29Ase ulang holi, anggo domma ipauli onjolanni, hape seng tuk gogohni mandobkon, gabe igora-gora halak na mangidah ai ia.

30Nini sidea hu bani, ʻIpungkah halak on do pajongjongkon, hape seng tardobkonsi.ʼ

31Atap raja ja ma, na laho marporang pakon raja na legan, na so parlobei hundul marpingkir-pingkir, atap na tardompakkonsi do marhasoman salaksa tentara imbangni ai, na roh mandorabsi marhasoman dua laksa?

32Tapi anggo seng tarbahensi, tontu suruhonni do suruhan mangindo pardameian, sanggah daoh ope munsuh ai.

33Nasiam pe, seng tarbahen atap ise pe humbani nasiam gabe susian-Ku, anggo seng tartadingkonsi haganup na dong bani.

34Na marguna do garam, tapi anggo mambar daini, aha ma bahenon paporadkon ai?

35Seng marguna ai hu juma atap bahen napu, siambukkonon mando ai. Barang ise na marpinggol, na marpanangar, itangihon ma ai.”


  Share Facebook  |  Share Twitter

 <<  Lukas 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel