Dual PanelIapiti Jesus Susian-Ni na Mamutiki Gandum Sanggah Ari Sabat
1Bani sada ari Sabat, sanggah na mamontas Ia hun juma, ipamputikkon susian-Ni ma buyur-buyur ni gandum, ipuyu-puyu ma ai, lanjar ipangan ma.
2Jadi dong ma deba halak Parisei na mangkatahon, “Mase ma ihorjahon nasiam na so patut bani ari Sabat?”
3Nini Jesus ma mambalosi sidea, “Seng ongga ibasa nasiam aha ibahen si Daud sanggah loheian ia, ia ampa hasomanni saodoran?
4Masuk do ia hu rumah ni Naibata, ibuat anjaha ipangan do ruti galangan, ai ma na so bulih panganon ni atap ise sobali malim, anjaha ibere do deba ai bani hasomanni.”
5Lanjar ihatahon ma bani sidea, “Tuhan ni ari Sabat do homa Anak ni Jolma in.”
Ipamalum Jesus Partangan na Matei Salopah Sanggah Ari Sabat
6Bani ari Sabat na legan masuk ma Jesus hu rumah parguruan laho mangajari. Adong do ijai sada halak, matei tangan siamunni.
7Ionggopi sibotoh surat ampa Parisei ai do Ia, ai ma atap ra do Ia pamalum naborit sanggah ari Sabat, ase adong dalan ni sidea mangaduhon-Si.
8Tapi ibotoh Jesus do pingkiran ni sidea ai, jadi nini ma dompak partangan na matei ai, “Jongjong ma ho hu tongah-tongah on!” Jadi jongjong ma ia hujai.
9Jadi nini Jesus ma dompak sidea, “Aha do na patut horjahonon sanggah ari Sabat, mambahen na madear do atap mambahen na jahat, pagoluhkon hosah do atap parsedahon ai?”
10Jadi sanggah na kinawahkon-Ni ai sidea haganup inggot, nini ma dompak halak ai, “Pagostong ma tanganmin!” Ibahen ma sonai, gabe malum ma tanganni ai.
11Marah tumang ma sidea, lanjar manriah ma sidea atap aha do sibahenon dompak Jesus.
Ipilih Jesus Apostel na Sapuluh Dua ai
12Bani panorang ai tangkog ma Jesus hu dolog laho martonggo; layur saborngin ai martonggo Ia hubani Naibata.
13Anjaha dob siang ari, idilo ma susian-Ni ai, anjaha ipilih ma sapuluh dua humbani sidea, anjaha igoran ma sidea apostel,
14ai ma: si Simon, na ginoran si Petrus, ampa si Andreas saninani ai; si Jakobus ampa si Johannes; si Pilippus ampa si Bartolomeus;
15si Mateus ampa si Tomas; si Jakobus anak ni si Alpeus ampa si Simon, na margoran Zelot;
16si Judas anak ni si Jakobus, ampa si Judas Iskariot, na gabe sipartahi-tahi ai.
Ipamalum Jesus Sagala na Boritan na Roh hu Bani
17Jadi tuad ma Ia pakon sidea, lanjar jongjong ma Ia bani sada ianan hanopan, rap pakon buei susian-Ni ampa buei halak hun sab Judea ampa Jerusalem, hun topi laut ni Tirus ampa Sidon,
18na marrohan, laho manangar hata-Ni ampa ase ipamalum sidea humbani naborit ni sidea; ipamalum do age na niodar-odar ni setan.
19Haganup na mabuei ai sihol manggiut-Si, ai luar do gogoh hun Bani, na pamalum haganup.
Parambilanon ni Jesus bani Halak na Mabuei; Hata Parhatuahon ampa Papa-papa
20Jadi sanggah na kinawahkon-Ni ai susian-Ni ai, nini ma, “Martuah ma hanima na masombuh, ai bannima do Harajaon ni Naibata!
21Martuah ma hanima na loheian nuan, ai sipabosuron do hanima! Martuah ma hanima na tangis nuan, ai tartawa do hanima use!
22Martuah ma hanima anggo ihasogamkon anjaha itulak halak hanima, anggo irisai hanima anjaha iambukkon gorannima, halani sambor ninuhurni, halani Anak ni Jolma in.
23Malas ma uhurnima bani panorang ai anjaha marolob-olob, ai tonggor ma, banggal do upahnima i nagori atas, ai sonai do ibahen bapa ni sidea bani nabi-nabi.
24Tapi bursik ma hanima na bayak, ai domma ijalo hanima apoh-apoh na bannima.
25Bursik ma hanima na marbosur-bosur nuan, ai loheian ma hanima use. Bursik ma hanima na tartawa nuan, ai tangis anjaha doruh-doruh ma hanima use.
26Bursik ma hanima, anggo haganup halak mamuji-muji hanima, ai sonai do ibahen bapa ni sidea bani nabi sipakulah-kulah ai.”
Titah Holong ni Uhur na Baru
27“Tapi Huhatahon ma bani nasiam sipanangi-nangi: Haholongi nasiam ma munsuh nasiam, na madear ma bahen nasiam bani na marsogam ni uhur bani nasiam.
28Pasu-pasu nasiam ma na mamurai nasiam, tonggohon nasiam ma na mandoruni nasiam.
29Anggo adong na mamastap huyummu, tarehon ma na salopah nari; anjaha anggo ibuat hioumu, ulang engkar age baju-bajumu.
30Sagala na mangindo hun bamu, bere; anjaha halak na dob mambuat barangmu, ulang tunggu ai hun bani.
31Songon na pinindo nasiam bahenon ni halak bani nasiam, sonai ma bahen nasiam bani sidea.
32Ai anggo ihaholongi nasiam na marholong ni uhur bani nasiam, aha ma ulih nasiam ijai? Ai age pardousa ihaholongi do na marholong ni uhur bani sidea.
33Anjaha anggo ibahen nasiam na madear hubani sibahen na madear bani nasiam, aha ma ulih nasiam ijai? Ai age pardousa sonai do ibahen.
34Anjaha anggo papinjamkon nasiam bani halak, laho mangarapkon balas hun bani, aha ma ulih nasiam ijai? Ai halak sipardousa pe painjamkon do hubani hasomanni pardousa, anjaha ijalo do use ulak ni duitni.
35Tapi haholongi nasiam ma munsuh nasiam, bahen nasiam ma na madear, anjaha papinjamkon nasiam ma, ulang pala mangarapkon balos. Jadi banggal ma upah nasiam, gabe anak ni Sitimbulan in ma nasiam; ai layak do Ia, age bani halak, na so mambotoh martarima kasih ampa bani halak parjahat.
36Gabe paridop ni uhur ma nasiam, songon Bapa nasiam, paridop ni uhur in.”
Ulang Manguhum-uhumi ampa Patorih-torih Salah ni Halak na Legan
37“Ulang ma nasiam manguhum-uhumi, ase ulang hona uhum nasiam! Ulang ma nasiam mamapai, ase ulang hona papa nasiam! Paluah nasiam, ase ipaluah nasiam!
38Bere nasiam ma, ase ibere bani nasiam! Parsuhatan na madear, na nionjat, na nidugur anjaha na pinajunjun bereonni bani abingan nasiam; ai parsuhatan, na sinuhatkon nasiam do, suhatkonon bani nasiam.”
39Ihatahon do homa limbaga on bani sidea, “Mintor tartogu na mapitung ma hasomanni na mapitung? Ai lang rap tarrobung ma sidea haduasi?
40Seng lobih susian marimbang guruni; tapi ganup, anggo gok ma parguruanni, dos ma ia songon guruni.
41Mase ma pala patorih-torihanmu silbak-silbak na bani mata ni hasomanmu, hape tiang na bani matamu lang ididah ho?
42Mase ma hatahononmu bani hasomanmu: Mahua huumpat lobei silbak-silbak na bani matamin, ambia, hape tiang na bani matamin lang ididah ho? Ee ho sipakulah-kulah, parlobei ma umpat tiang na bani matamin, dob ai pe, ase ididah ho torang sonaha pangumpatmu bani silbak-silbak na bani mata ni hasomanmu.”
Sonaha Hayu, Sonai do Buahni
43“Seng dong hayu na madear marbuahkon na bajan, barang hayu na bajan marbuahkon na madear.
44Ai humbani buahni do tartandai ganup hayu. Ai seng tarbuat jambu humbani tatada, anjaha seng tarbuat buah anggur humbani rimbang.
45Halak sidear uhur padaratkon na madear humbagas arta na madear na ibagas uhurni; anjaha halak na jahat padaratkon na jahat humbagas arta na jahat na ibagas uhurni. Ai in na manggoki uhur, ai do iluarhon pamangan.
46Mase ma ihatahon nasiam Bangku, ʻTuhan, Tuhan! hape lang ihorjahon nasiam na Huhatahon?ʼ”
Limbaga Pasal Rumah na Pinajonam bani Batu Gingging
47“Sagala na roh hu Bangku, anggo ibogei hatang-Kin anjaha ihorjahon, Hupatugah ma bani nasiam usihanni ai:
48Usih do ia ai bani sada halak na pajongjong rumah, na mangkurak bagas anjaha na pajonamkon ai bani batu gingging. Marbanggal pe bah, anjaha idorab pe rumah ai, tapi seng tardugursi, halani toguh do ipajonam.
49Tapi na mambogei hatang-Kai, tapi seng idalankon, usih ma ai bani halak na pajongjong rumah bani tanoh, na seng maronjolan bani batu; idorab bah ai ma ai, gabe mintor marumbak ma, anjaha jangin do parrumbak ni rumah ai.”