Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 10 >> 

Pardilo ni Tuhan Jesus bani Apostel-Ni na Sapuluh Dua ai

1Jadi idilo ma susian-Ni na sapuluh dua ai hu lobei-Ni, anjaha ibere ma bani sidea kuasa dompak tonduy na mabutak, laho mangusir ai, sonai pamalum sagala naborit ampa sagala na niarou ni sidea.

2Ia goran ni apostel na sapuluh dua ai, on ma: Na parlobei, si Simon, na ginoran homa si Petrus, ampa saninani si Andreas, dob ai si Jakobus ampa si Johannes saninani ai, ai ma anak ni si Sebedeus,

3dob ai si Pilippus ampa si Bartolomeus, si Tomas pakon si Mateus, sijalo sohei ai, dob ai si Jakobus anak ni Alpeus ampa si Tadeus,

4dob ai si Simon, halak Kana ai, pakon si Judas Iskariot, na mantahihon-Si ai.

Parsuruh ni Tuhan Jesus bani Susian-Ni

5Na sapuluh dua ai ma isuruh Tuhan Jesus, ipodahi ma sidea, “Ulang ma laho hanima hu tanoh ni halak parbegu, anjaha ulang ma masuki hanima huta-huta ni Samaria,

6tapi pitah hubani biribiri na magou humbani Israel ma lah hanima laho.

7Laho ma hanima mangambilankon, paboa domma dohor Harajaon nagori atas in.

8Pamalum hanima ma naborit ni na boritan, pagoluh na matei, pamalum na gadamon, usir setan-setan! Silayak-layak do in bennima, ase layak-layakkon hanima ma!

9Ulang pala pasirsir hanima bennima omas barang pirak barang duit ibagas gonditnima,

10barang bohal i pardalanan barang hiou dua, sonai sipatu atap tungkot pe, ai patut do dapotan bohal siparhorja.

11Anggo masuk hanima hubagas sada huta atap dusun pe, pindahi hanima ma ijai na talup tondokannima, anjaha ijai ma hanima ronsi misir use.

12Hatahon hanima ma tabinima, laho masuk hu rumah ai.

13Jadi sogop ma dameinima bani rumah ai, anggo na talup do sidea manjalosi, tapi anggo lang, mulak ma bennima dameinima ai.

14Anggo seng ijalo sidea hanima barang seng ra sidea manangihon hanima, tadingkon hanima ma rumah ampa huta ni sidea ai, anjaha pirpirhon hanima ma dompak sidea orbuk na longkot bani naheinima.

15Na sintong do hatang-Kon bennima, hampungan do sitaronon ni Sodom pakon Gomora bani ari paruhuman magira marimbang huta ai.”

Podah Sanggah Panorang Pangarsik-arsikon

16“Husuruh do hanima songon biribiri hu tongah-tongah ni begu, halani ai maruhur ma hanima songon ulog, anjaha bujur songon asas.

17Jaga ma hanima dompak jolma, ai ondoskononni do hanima hu paruhuman, anjaha lonsingonni do hanima bani parguruan ni sidea.

18Toguon ni sidea do hanima hu lobei ni pamarentah pakon raja halani Ahu, gabe hasaksian bani sidea age bani sipajuh begu-begu.

19Tapi anggo iondoskon sidea hanima, ulang ma pala holsohkon hanima pasal sihatahononnima, ai bereon-Ni do bennima bani panorang ai hata sihatahononnima.

20Ase, sedo hanima na marsahap ijai, tapi Tonduy ni Bapanima do na marsahap ibagas hanima.

21Ondoskonon ni sanina do saninani hu hamatean, sonai bapa dompak anakni. Manlawan do anak dompak orang tuani, laho mamunuhsi.

22Domdoman ni haganup jolma do hanima halani goran-Ku, tapi na tahan das hu ujungni, ai do paluahon-Ni.

23Anggo iparburu hanima bani sada huta, laho ma hanima hu huta na legan, ai na sintong do hatang-Kon bennima, seng ope ganup isiari hanima huta ni Israel, roh ma Anak ni Jolma in.

24Seng lobihan susian humbani guruni atap lobihan jabolon humbani tuanni.

25Dear ma sada susian anggo dos ia songon guruni, sonai jabolon dos pakon tuanni. Anggo igoran tuan rumah Beelsebul, samintolah parrumahni ai ma lang?”

Ojur-ojur Ulang Mabiar Manaksihon

26“Halani ai ulang ma mabiar hanima mangidah sidea, ai seng dong na rungkub, na so tarbuka use, anjaha seng dong na ponop, na so tarbotoh use.

27Na Hupatugah bannima bani na golap, hatahon hanima ma in bani na lihar, na Huhusipkon bani pinggolnima, baritahon hanima ma in hun atas tayub.

28Ulang ma pala mabiar hanima mangidah sibunuh daging, na so boi mamunuh tonduy; tapi na markuasa mangagou angkula pakon tonduy hu naraka, ai do sihabiarannima.

29Ai lang ijual halak do dua dingis sasen? Tapi seng madabuh ai age sada hu tanoh, anggo seng ibagas botoh ni Bapanima.

30Anggo bennima, gari haganup jambulan na bani ulunima in, domma ibilangi.

31Halani ai, ulang ma hanima mabiar, ai harganan ope hanima humbani buei dingis.

32Ai sagala na manaksihon Ahu i lobei ni jolma, saksihonon-Ku do ia i lobei ni Bapa na i nagori atas ai,

33tapi sagala, na marnalang Ahu i lobei ni jolma, parnalangon-Ku do ia i lobei ni Bapa na i nagori atas ai.

34Ulang ma ninuhurnima, na roh Ahu, laho mamboan damei hu tanoh on. Seng na roh Ahu mamboan damei, tapi podang do.

35Na roh do Ahu tongon, paingorhon anak dompak bapani, boru dompak inangni, parumaen dompak simatuani,

36anjaha hasomanni sarumah do gabe munsuh bani Jolma in.

37Barang ise na mangkaholongi bapani barang inangni lobih hun Bangku, seng talup ai Bangku, anjaha barang ise na mangkaholongi anakni atap boruni lobih hun Bangku, seng talup ai Bangku.

38Anjaha barang ise na so mamorsan silangni anjaha iirikkon Ahu, seng talup ai Bangku.

39Na mangkargahon hosahni, ai do na magouan hosah, tapi na magouan hosah halani Ahu, ai do na jumpahan.”

Upah ni Sagala Pambahenan halani Goran ni Jesus

40“Na manjalo hanima, Ahu do jinaloni ai, anjaha na manjalo Ahu, na marsuruh Ahu do jinaloni ijai.

41Na manjalo sada nabi, halani nabi ia, jaloonni do upah ni nabi, anjaha na manjalo sada halak parpintor, halani halak parpintor ia, jaloonni do upah ni halak parpintor.

42Anjaha barang ise na mamberehon bah borgoh sasangkir gelah hubani sahalak na etek-etek on, halani susian-Ku ia, na sintong do hatang-Kon bennima, seng anjai magou upahni.”


  Share Facebook  |  Share Twitter

 <<  Matius 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran