Alkitab Mobile SABDA
[VER] : [SIMALUNGUN]     [PL]  [PB] 
 <<  Markus 1 >> 

Parbangkit ni si Johannes Pandidi

1On ma mula ni Ambilan Na Madear pasal Jesus Kristus.

2Songon na tarsurat bani Nabi Jesayas, “Tonggor ma, Husuruh ma suruhan-Ku parlobei-Mu, sipatorsa dalan-Mu!

3Sora ni na mardilo-dilo i halimisan, pasirsir ma dalan ni Tuhan in, pintor ma bahen sidalanan-Ni.”

4I halimisan do si Johannes mandidihon anjaha mangambilankon pandidion hamubahon ni uhur bahen hasasapan ni dousa.

5Jadi roh ma hubani haganup parnagori Judea pakon par Jerusalem, gabe ipadidihon sidea ma dirini hu bani i Bah Jordan, dob isopotkon bei dousani.

6Anggo si Johannes, ambulu ni unta do hiouni, hulingkuling gonditni anjaha sipanganonni balang pakon manisan ni lobah.

7On do ambilanni, “Roh ma hun pudingku sigogohan hun bangku, seng talup ahu paunduk diringku mangkarhari tali ni sipatu-Ni.

8Ia ahu, bah do hudidihon bani nasiam, tapi anggo Ia, Tonduy Na Pansing do didihonon-Ni bani nasiam.”

Ididi si Johannes Tuhan Jesus

9Bani panorang ai roh ma Jesus hun Nasaret na i Galilea, jadi tardidi ma Ia i Bah Jordan, ididi si Johannes.

10Mandarat honsi Ia hun bah ai, ididah ma buha langit, anjaha sogop ma Tonduy ai hu Bani marrupahon asas.

11Anjaha tarbogei ma sora hun nagori atas, “Ho do Anak na hinaholongan ni uhur-Hu, rosuh do uhur-Hu Bam.”

Tuhan Jesus i Parlajouan

12Dob ai mintor ijuljul Tonduy ai ma Ia hu halimisan.

13Ase i halimisan ma Ia ompat puluh ari dokahni ilajou sibolis, rap pakon binatang do Ia ijai, tapi malekat do marugas Bani.

Mamungkah Marhorja Tuhan Jesus

14Dob tartutup si Johannes, roh ma Jesus hu Galilea mangambilankon Ambilan Na Madear ni Naibata,

15“Domma jumpah panorangni, domma dohor Harajaon ni Naibata. Paubah nasiam ma uhur nasiam anjaha haporsayai nasiam ma Ambilan Na Madear in!”

Idilo Susian-Ni

16Sanggah mardalan Ia i topi ni Tao Galilea, ididah ma si Simon pakon si Andreas, sanina ni si Simon ai mangamburhon jala ni sidea, ai panjala do sidea.

17Jadi nini Jesus ma dompak sidea, “Eta, ihutkon nasiam ma Ahu, Hubahen pe nasiam sijala jolma!”

18Jadi mintor itadingkon sidea ma jala ai anjaha iirikkon ma Ia.

19Dob idalani hundaoh otik, ididah ma si Jakobus, anak ni si Sebedeus, ampa si Johannes, saninani ai, ibagas parau do sidea paturei-tureihon jala ni sidea.

20Jadi mintor idilo ma sidea, anjaha itadingkon sidea ma bapa ni sidea, si Sebedeus, ibagas parau ai rap pakon halak upahan ni sidea, lanjar laho ma sidea mangihutkon-Si.

Jesus Marambilan i Kapernaum; Ipamalum Sada Halak na Setanon

21Jadi laho ma sidea hu huta Kapernaum, mintor masuk ma Ia hu rumah parguruan sanggah ari Sabat laho mangajari.

22Longang ma uhur ni halak mambogei pangajaran-Ni, ai marhidorat do pangajaran-Ni, sedo songon sibotoh surat.

23Adong ma i rumah parguruan ai sada halak na siniaran ni tonduy na mabutak, mardilo ma ia,

24nini, “Mangaha Ham roh bannami, Ham Jesus par-Nasaret? Roh do Ham hape laho mangagou hanami. Hubotoh do ise Ham, Na Pansing ni Naibata.”

25Jadi isorgang Jesus ma ia, nini ma, “Sip ma ho, mandarat ma ho hun bani!”

26Jadi isarad tonduy na mabutak ai ma ia, anjaha marsora na gogoh luar ma ia hun bani.

27Jadi longang ma sidea haganupan, pala marsisungkunan samah sidea, nini, “Aha do on? Pangajaran na baru do on anjaha na marjumbalang, ipaksa do tonduy na butak, gabe ibalosi do Ia.”

28Jadi mintor sar ma barita-Ni inggot nagori Galilea.

Ipamalum Jesus Anturang ni si Petrus pakon na Boritan na Legan

29Dob kaluar hun rumah parguruan ai, mintor laho ma Ia hu rumah ni si Simon pakon si Andreas rap pakon si Jakobus ampa si Johannes.

30Tibal do anturang ni si Simon, pane-paneon, jadi mintor ipatugah sidea ma ai Bani.

31Idohori ma ia, ijamah ma tanganni laho pajongjongkonsi, jadi itadingkon pane-pane ai ma ia, lanjar marugas ma ia bani sidea.

32Tapi dob bod ari dob sundut mata ni ari, ipamboan halak ma hubani na boritan pakon na setanon.

33Haganup parhuta ai marhumpul do i lobei ni labah ai.

34Jadi buei do na boritan, na marbagei-bagei naboritni, ipamalum, anjaha buei do setan-setan iusir, anjaha seng ilopas setan-setan mansahapkon, na dob itanda sidea Ia.

Jesus Marambilani i Galilea; Ipamalum Sada Halak na Gadamon

35Girah sogod, golap-golap ope, puho ma Ia, lanjar luar misir bani ianan na lungun laho martonggo.

36Jadi iirikkon si Simon pakon hasomanni ai ma Ia.

37Dob jumpah sidea Ia, nini sidea ma dompak-Si, “Haganup halak mangindahi Ham!”

38Tapi ihatahon ma bani sidea, “Laho ma hita bani ianan na legan, hu dusun-dusun na dohor an, ase dihut ijai Ahu marambilan, ai halani ai do, ase roh Ahu.”

39Jadi laho ma Ia marambilan bani parguruan ni sidea, bani sab nagori Galilea, anjaha iusir do setan-setan.

40Jadi roh ma hubani sada halak na gadamon, ielek-elek ma Ia anjaha isombah lanjar ihatahon, “Anggo ra Ham, tarpasusi Ham do ahu!”

41Jadi maidop ma uhur-Ni, isurdukkon ma tangan-Ni, ijamah ma ia lanjar nini ma hu bani, “Ra do Ahu, susi ma ham!”

42Jadi mintor tanggal ma gadam ai hun bani, gabe susi ma ia.

43Ipaingat ma ia pangkei-pangkei, dob ai mintor isuruh ma ia laho,

44lanjar ihatahon ma hu bani, “Jaga ham, ulang das ipatugah-tugah ham in age bani ise! Tapi laho ma ham patidakkon dirimu bani malim, galangkon ham ma na tinitahkon ni si Musa, paboa na dob susi ham, gabe hasaksian bani sidea.”

45Tapi ai pe ia luar, ipungkah ma mambaritahon ampa pasarhon na masa ai, gabe seng tarbahen Jesus be masuk hu huta bani na talar, tapi idarat bani ianan na lungun mando Ia, anjaha marrohan do halak hubani hunja-hunja pe.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran