Dual PanelLimbaga Pasal Sisewa Pohon Anggur
1Dob ai marsahap ma Ia marhitei limbaga bani sidea, nini ma, “Adong ma sada halak na manombei pohon anggur, ihondor ma ai inggot, ihurak ma pangilangan, anjaha ipaturei ma sada manara. Ipasewahon ma pohon ai hubani parjuma-juma, dob ai laho ma ia hu nagori na legan.
2Jadi bani panorangni isuruh ma juakjuakni marayak parjuma-juma ai, ase ijalo humbani sidea deba humbani buah ni pohon anggur ai.
3Hape itangkap sidea do ia, ibogbogi, lanjar isuruh mulak sonin, mangambei.
4Isuruh ma use bani sidea juakjuak na legan, tapi ibogbogi sidea ma ai anjaha ipahiri.
5Dob ai isuruh ma use na legan, tapi ibunuh sidea ma age ai. Buei ope na legan isuruh, ibogbogi do ai deba, na deba nari ibunuh.
6Adong ope anakni sada hinaholongan ni uhurni. Ai ma parpudi isuruh bani sidea, ai ninuhurni, ʻTontu malang do uhur ni sidea mangidah anakkon.ʼ
7Tapi nini parjuma-juma ai ma samah sidea, ʻOn do panean ai! Eta, bunuh hita ma ia, ase banta siteanonni in!ʼ
8Jadi itangkap sidea ma ia, ibunuh ma, anjaha iambukkon hu darat ni pohon anggur ai.
9Aha ma bahenon ni tuan simada pohon anggur ai? Roh ma ia, boiskononni ma parjuma-juma ai, anjaha ondoskononni ma pohon anggur ai bani halak na legan.
10Ai seng ongga ibasa nasiam hata na tarsurat on, ʻBatu, na niambukkon ni tukang rumah, ai do gabe batu palas parsuhi.
11Tuhan do na mambahen ai, anjaha halongangan do ai bani matanta.ʼ”
12Jadi ipindahi sidea ma dalan laho manangkap-Si, tapi mabiar do sidea bani halak na mabuei ai. Ai ibotoh, sidea do tinuju ni limbaga nongkan. Jadi laho ma sidea, itadingkon ma Ia.
Sungkun-sungkun ni Parisei Pasal na Mambere Balasting bani Kesar
13Dob ai isuruh sidea ma deba humbani halak Parisei ampa humbani juakjuak ni si Herodes, laho manangkap-Si marhitei parsahap-Ni.
14Jadi roh ma sidea mangkatahon hu Bani, “Ham Guru, ibotoh hanami, pintor do Ham, seng mabiar age bani ise, ai seng sitonggor jumbak Ham, anjaha sintong-sintong do ipodahkon Ham dalan ni Naibata. Ai patut do bereon balasting bani kesar atap lang?”
15Tapi ibotoh Jesus do sipakulah-kulah ni sidea ai, gabe nini ma dompak sidea, “Mase ma ilajou nasiam Ahu? Bere nasiam ma Bangku dinar sada, ase Huidah!”
16Jadi iboan sidea ma. Nini ma hubani sidea, “Gombaran pakon surat ni ise do on?” Jadi nini sidea ma hu Bani, “Gombaran ni kesar do!”
17Jadi nini Jesus ma hubani sidea, “Bere ma bani kesar na humbani kesar, anjaha na humbani Naibata bani Naibata.” Jadi longang ma sidea pasal-Si.
Pasal Parpuhoon humbani na Matei
18Dob ai roh ma hu Bani halak Sadukei, na so marhatongonkon, adong parpuhoon humbani na matei, jadi isungkun sidea ma Ia, nini ma,
19“Ham Guru! Isuratkon si Musa do banta, ʻAnggo matei sada halak, itadingkon parinangonni lang mardakdanak, maningon pagodangon ni anggini do naboru ai, laho pajongjong ginompar bani abangni ai.ʼ
20Ase adong ma pitu halak na marsanina, mambuat boru ma sikahanan ai, jadi matei ma ia, lang martinading.
21Jadi ibuat na paduahon ai ma naboru ai, lanjar matei ma ai, lang martinading. Patoluhon ai pe sonai do.
22Sonai do sidea hapitusi, seng martinading. I pudi ni ganupan ai, matei ma homa naboru ai.
23Bani ari parpuhoon ai, ise do sidea simada naboru ai? Ai ganup do na pitu ai ongga marjolmahonsi.”
24Nini Jesus ma hubani sidea, “Ai lang na kahou ma nasiam in, halani seng iarusi nasiam Surat in, age hagogohon ni Naibata?
25Ai anggo puho ma sidea humbani na matei, seng be mompo atap laho sidea, tapi songon malekat na i nagori atas ai ma sidea.
26Anjaha pasal parpuhoon ni halak na dob matei, ai seng ongga ibasa nasiam ibagas buku ni si Musa, ibagas barita pasal naporon ai, na hinatahon ni Naibata hubani si Musa, ʻAhu do Naibata ni si Abraham, si Isak ampa si Jakob?ʼ
27Sedo Naibata ni na matei Ia, Naibata ni na manggoluh do. Kahou tumang do nasiam.”
Titah Sibanggalan
28Jadi roh ma sada halak humbani Parisei ai, na dob mambogei parsualan ai, anjaha na mangahapkon tongon ni pambalosi-Ni ai bani sidea, nini ma manungkun-Si, “Na ija do sibanggalan humbani titah in ganupan?”
29Ibalosi Jesus ma, “On do sibanggalan: Bogei ma, ale Israel, Tuhan, Naibatanta, sahalak-Si do Tuhan.
30Anjaha maningon haholonganmu do Tuhan Naibatamu humbani gok ni atei-ateimu, humbani gok ni hosahmu, humbani gok ni uhurmu ampa humbani gok ni gogohmu!
31Na paduahon, ai ma: Maningon haholonganmu do hasomanmu doskon dirimu. Seng dong be titah na legan sibanggalan hunjon.”
32Jadi nini sibotoh surat ai ma hu Bani, “Tongon do Guru, domu hu hasintongan do na hinatahon-Mu ai, ai ma, sada do Naibata, anjaha seng dong na legan sobali-Si.
33Anjaha mangkaholongi-Si humbani gok ni atei-atei, humbani gok ni uhur ampa humbani gok ni gogoh anjaha mangkaholongi hasoman doskon diri, banggalan do ai humbani ganup galangan situtungon age galangan na legan pe.”
34Dob ibogei Jesus pandeini ai marbalos, nini ma hu bani, “Seng sadiha daoh nari be ham hun Harajaon ni Naibata!” Anjaha ise pe lang be, na pag marsungkun-sungkun hu Bani.
Sungkun-sungkun Pasal Anak ni Ise do Jesus
35Sanggah mangajari Jesus ibagas rumah panumbahan ai, nini ma hubani sidea, “Mase ma ihatahon sibotoh surat, Anak ni si Daud do Kristus in?
36Si Daud sandiri do mangkatahon marhitei Tonduy Na Pansing, ʻNini Tuhan in do dompak Tuhanku, hundul ma ho hu siamunkon, paima hubahen sagala munsuhmu sidogeian ni naheimu.ʼ
37Si Daud sandiri do manggoransi Tuhan, sonaha ma ia anakni?” Marosuh do halak na mabuei ai manangar hata-Ni.
Lumba-lumba ase Marjaga-jaga dompak Sibotoh Surat
38Lanjar ihatahon do ibagas pangajaran-Ni ai, “Jaga ma nasiam dompak sibotoh surat, na marosuh mardalani marbaju ganjang, na mangkarosuhkon, ase itabi halak i tiga,
39na mangkarosuhkon hundulan parlobei i rumah parguruan, ampa hundulan na sangap i parpestaan,
40halak na mambondut rumah ni na mabalu, anjaha na marsipahulah-hulah marhitei tonggo na ganjang. Uhum siboratan do jaloon ni sidea.”
Sibere-bere ni na Mabalu
41Jadi sanggah na hundul Ia tontang ni poti idop ni uhur ai, ikawahkon ma pambahen ni halak na mabuei ai mandabuhkon duitni hubagas poti ai, anjaha buei do halak na bayak mandabuhkon buei-buei.
42Anjaha roh do sada naboru na mabalu, na miskin, idabuhkon ma hujai dua rimis, ai ma sasen.
43Jadi idilo Jesus ma susian-Ni, nini ma hubani sidea, “Sintong do na Huhatahon on bannima, buenan do na nidabuhkon ni na mabalu na miskin an, hubagas poti idop ni uhur in, marimbang haganup na mandabuhkon ai.
44Ai humbani lobih-lobihni do idabuhkon sidea bei, tapi anggo naboru an, ibagas hahuranganni idabuhkon do haganup na dong bani, haganup hagoluhanni.”