Alkitab Mobile SABDA
[VER] : [SIMALUNGUN]     [PL]  [PB] 
 <<  Markus 9 >> 

Marsangap Jesus i Atas Dolog

1Lanjar nini ma dompak sidea, “Na sintong do hatang-Kon bani nasiam, adong do deba humbani na jongjong ijon, na so mandagei hamatean, anggo lape ididah sidea roh Harajaon ni Naibata ibagas hagogohon.”

2Dob salpu onom ari iarahkon Jesus ma si Petrus, si Jakobus ampa si Johannes, iboan ma sidea pulig hu atas dolog na gijang. Mubah ma rupa-Ni ididah sidea.

3Marlinang-linang ma pakeian-Ni, putih sahalian, seng dong sipanusi na boi mambahen sonai lopakni i atas tanoh on.

4Dob ai taridah ma bani sidea si Elias ampa si Musa, marsahapi pakon Jesus.

5Jadi nini si Petrus ma marsahapkon Jesus, “Guru, dear ni in hita ijon. Ipauli hanami ma ijon tolu sopou, sada Bamu, sada bani si Musa, anjaha sada bani si Elias.”

6Ai seng ibotoh aha sihatahononni, ai mabiar tumang do sidea.

7Roh ma sada hombun manlinggomi sidea, anjaha tarbogei ma sada sora humbagas hombun ai, na mangkatahon, “On do Anak-Ku haholongan ni uhur-Hu, tangihon ma Ia!”

8Anjaha sanggah na mangkawah sidea inggot, ise pe lang adong ididah sidea sobali Jesus rap pakon sidea.

9Jadi sanggah susur sidea hun dolog ai, ipalumba ma sidea, ase ulang ipatugah na nididah ni sidea bani halak, anggo seng ope puho Anak ni Jolma in humbani na matei.

10Iparimbagaskon sidea do hata ai, anjaha marsisungkunan do sidea pasal arti ni hata “na puho humbani na matei ai.”

11Jadi isungkun sidea ma Jesus, “Mase ihatahon sibotoh surat, maningon parlobei roh do si Elias?”

12Nini ma mambalosi sidea, “Tongon, maningon roh do lobei si Elias patorsahon haganup. Tapi sonaha do tarsurat pasal Anak ni Jolma in? Ai lang maningon buei do Ia manaron anjaha maningon apason do Ia?”

13Tapi Huhatahon ma bannima, “Domma roh si Elias, jadi uhur-uhur ni sidea do ibahen hu bani, songon na dob tarsurat hinan pasalsi.”

Ipamahum Jesus Sada Dakdanak na Setanon

14Sanggah na das ai sidea hubani susian na legan ai, ididah sidea ma buei halak manginggoti sidea, anjaha sibotoh surat marsual pakon sidea.

15Dob ididah halak na mabuei ai roh Jesus, longang ma sidea manjumpahkon-Si laho manabi-Si.

16Jadi isungkun ma sidea, “Aha do na sinahapkon nasiam pakon sidea?”

17Jadi marbalos ma hu Bani sada humbani halak na mabuei ai, “Guru, huboan do anakkon Bamu, ai isiari setan silongah do ia.

18Anggo siar ma setan ai bani, anjaha isontak-sontakkon ma ia, gabe marguboh ma pamanganni, derek-derek iponni anjaha jorgong angkulani. Domma hupindo namin bani susian-Mu, ase iusir setan ai, tapi seng mangasup sidea.”

19Tapi nini ma mambalosi sidea, “Bangsa na so porsaya! Sadiha dokah nari Ahu pakon nasiam? Sadiha dokah nari paanju-anjuon-Ku nasiam? Boan nasiam ma ia hu Bangku!”

20Jadi iboan sidea ma ia hu Bani. Ijin ididah setan ai Jesus, mintor ipantompaskon ma ia, gabe dabuh ma hu tanoh, marguling-guling anjaha marguboh babahni.

21Isungkun Jesus ma bapani ai, “Domma sadiha dokah mangonai on bani?” Balos ni bapani ai, “Hun bani sietek-etekonni nari.

22Domma gati igulangkon ia hubagas apuy ampa bah, sihol mambunuhsi. Tapi anggo dong do kuasa-Mu, holong ma uhur-Mu, urupi Ham ma hanami.”

23Jadi ibalosi Jesus ma ia, “Ihatahon ho, anggo adong do kuasa-Mu. Haganup do boi bani na porsaya.”

24Mintor idilohon bapa ni dakdanak ai ma gogoh, “Porsaya do ahu! Urupi Ham ma ahu na so marhaporsayaon on.”

25Dob ididah Jesus lambin marurup roh halak na mabuei ai, isorgang ma setan ai, nini ma, “Ale setan silongah anjaha sinengel, Ahu mangkatahon bam, luar ma ho hun bani, anjaha ulang be masuk ho hu bani!”

26Gabe mandoruh ma setan ai, ipantompaskon ma dakdanak ai lanjar luar ma. Hira bangkei mando dakdanak ai, pala buei halak na mangkatahon, “Domma matei ia.”

27Tapi itangkap Jesus ma tanganni, itogu ma ia laho pajongjongkonsi.

28Dob masuk Ia hubagas sada rumah, isungkun susian-Ni ai ma Ia pulig, “Mase ma lang mangasup hanami mangusirsi?”

29Jadi nini ma dompak sidea, “Anggo tonduy na samasam on, seng tarusir, anggo lang marhitei tonggo ampa parpuasaon.”

Ilumbahon Jesus Paduahalihon Pasal Sitaronon-Ni

30Dob bingkat sidea hunjai, ibontas sidea ma nagori Galilea. Tapi seng marosuh Jesus, ibotoh halak pasal ai,

31ai na mangajari susian-Ni ai do Ia, anjaha nini ma dompak sidea, “Ondoskononkon do Anak ni Jolma in hu tangan ni halak, anjaha bunuhon ni sidea ma Ia; tapi dob ibunuh, puho do Ia use, dob salpu tolu ari.”

32Tapi seng iarusi sidea na hinatahon-Ni ai, anjaha mabiar do sidea manungkun hu Bani.

Paruhuran na Patut bani Siirikkon Jesus

33Dob ai das ma sidea hu huta Kapernaum, anjaha dob das sidea i rumah, isungkun ma sidea, “Aha do na sinahapkon nasiam i tongah dalan ai?”

34Tapi sip do sidea, ai isahapkon sidea do i dalan ai, barang ise sidea sibanggalan.

35Jadi hundul ma Jesus, idilo ma na sapuluh dua ai, ihatahon ma bani sidea, “Barang ise na sihol parlobei, parpudi ma ia bani haganup anjaha juakjuak bani haganup halak.”

36Jadi idilo ma sada dakdanak, ipajongjong ma ia i tongah-tongah ni sidea anjaha ialehon, lanjar nini ma bani sidea,

37“Barang ise na manjalo sada dakdanak na sonon halani goran-Ku, Ahu do na jinaloni ijai, anjaha barang ise na manjalo Ahu, sedo Ahu jinaloni ijai, na marsuruh Ahu do.”

Ulang Sompit Paruhuran

38Nini si Johannes ma hubani Jesus, “Guru, ididah hanami do sada halak na so mangirikkon hita mangusir setan marhitei goran-Mu, jadi ilarang hanami ma ia halani na so hita ai iirikkon.”

39Jadi nini Jesus ma, “Ulang ma larang hanima ia, ai halak na mambahen horja hagogohon marhitei goran-Ku, seng tumaram pahirionni Ahu.

40Ai na so manlawan hita, hasomanta do ai.

41Na sintong do hatang-Kon bannima, na mambere hanima bah inumon sasangkir ibagas goran-Ku, halani Kristus simada hanima, seng na magou upahni ai.”

Pasal na Mambahen Parsangsian

42Tapi barang ise na mambahen sangsi sada humbani na etek-etek on, na porsaya Bangku, dearan ma igantungkon losung batu bani borgokni, laho mangunobkonsi hubagas laut.

43Anggo sangsi ho halani tanganmu, rotap ma in. Ai dearan do marsada tangan ho masuk hu hagoluhan, humbani na mardua tangan masuk hu naraka, hubagas apuy na so ra miloh,

44bani ianan, na so ra matei gilokni, anjaha na so ra miloh apuyni.

45Anggo sangsi ho halani naheimu, rotap ma in. Ai dearan do tempang ho masuk hu hagoluhan, humbani na marnahei dua iambukkon ho hubagas naraka,

46bani ianan na so ra matei gilokni, anjaha na so ra mintop apuyni.

47Anggo sangsi ho ibahen matamu, pulsitkon ma in. Ai dearan do marmata salopah ho masuk hu Harajaon ni Naibata, ulang mardua mata ho iambukkon hu naraka,

48bani ianan na so ra matei gilokni anjaha na so ra miloh apuyni.

49Ai maningon garamon do haganup marhitei apuy.

50Na marguna do garam ai, tapi anggo mambar daini, aha ma bahenon paporadkon ai? Sai margaram ma hanima, anjaha mardamei samah hanima.


  Share Facebook  |  Share Twitter

 <<  Markus 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran