Dual PanelPanrajaion ni Raja na Pintor
1Humbani si Daud. Sada Psalm. Sihol do dodingkononku pasal habujuron ampa uhum; Bamu, ale Jahowa, sihol do ahu mamuji-muji.
2Sihol paruhurhononku do parlahou na sintong. Antigan do Ham roh marayak ahu? Sihol do marparlahou na sintong ahu i tongah ni jabungku.
3Seng ra ahu mannahkon na masambor i lobei ni matangku; magigi do ahu bani horja panlanggaron, seng dais sisonai bangku.
4Daoh do humbangku uhur hagedukon, na masambor seng hutanda.
5Halak na marhata tundal bani hasomanni, hupasip do, halak parmata na epes ampa sigijang uhur, seng huharosuhkon.
6Sai mangkawah do matangku dompak sibujur uhur ni nagori in, ase marianan sidea rapkon ahu; halak na mardalan bani hadaulaton, ai do siparugas bangku.
7Seng bulih marianan i rumahku sihorjahon panipuon; halak sihatahon ladung, seng boi jongjong i lobei ni panonggorhu.
8Siap sogod do husiapkon parjahat na i nagori in, laho mamboiskon hun huta ni Jahowa sagala sihorjahon hajahaton.