Dual PanelDoding Puji-pujian halani Pangurupion ampa Haluahon na humbani Jahowa
1Puji ma Jahowa, ai pardear layak do Ia, tongon ronsi sadokah ni dokahni do idop ni uhur-Ni!
2Sai ihatahon Israel ma, “Tongon, ronsi sadokah ni dokahni do idop ni uhur-Ni.”
3Sai ihatahon ginompar ni si Aron ma, “Tongon, ronsi sadokah ni dokahni do idop ni uhur-Ni.”
4Sai ihatahon sihabiari Jahowa ma, “Tongon, ronsi sadokah ni dokahni do idop ni uhur-Ni.”
5Humbani hasosakanku do ahu dilo-dilo bani Jahowa; itangihon Jahowa do ahu anjaha ipalumbang.
6Jahowa do mangkasomani ahu, seng mabiar ahu Tor aha ma bahenon ni jolma bangku?
7Jahowa do hasomanku, Sipangurupi bangku, ai do ase boi ahu mangkawah bani na mandomdomi ahu.
8Dearan do marhaporusan bani Jahowa, ase martenger ni uhur bani jolma.
9Dearan do marhaporusan bani Jahowa, ase martenger ni uhur bani halak na sangap-sangap.
10Sagala parbegu manginggoti ahu; mangunsagahkon goran ni Jahowa, siap do sidea hubahen.
11Iinggoti sidea do ahu, tongon iinggoti sidea do ahu; mangunsagahkon goran ni Jahowa; siap do sidea hubahen.
12Iinggoti sidea do ahu songon huramah; gajag do sidea songon apuy bani duri-duri; mangunsagahkon goran ni Jahowa siap do sidea hubahen.
13Ijullakkon, ijullakkon sidea do ahu ase targompang, tapi Jahowa do na mangurupi ahu.
14Gogohku pakon dodingku ai ma Jahowa; Ia do na paluahkon ahu.
15Sora olob-olob pakon hatuahon do maraloling bani lampolampo ni halak parpintor. Siamun ni Jahowa do sibahen hamonangan.
16Siamun ni Jahowa do na timbul, siamun ni Jahowa do sibahen hamonangan.
17Seng anjai matei ahu, tapi manggoluh do, ase hubaritahon pambahenan ni Jahowa.
18Iajar, iajar Jahowa do ahu tongon, tapi seng iondoskon bani hamatean.
19Ungkab nasiam ma bangku labah ni hapintoron, sihol masukanku do ai, sihol do pujionku Jahowa,
20On do horbangan marayak Jahowa, halak parpintor do na masuk hujai.
21Hupuji ma Ham halani ibalosi Ham do ahu, anjaha Ham do gabe haluahon bangku.
22Batu na niambukkon ni tuhang, ai do gabe palas parsuhi.
23Marhitei Jahowa do masa ai, halongangan do ai bani matanta.
24Ari on do na jinadihon ni Jahowa. marolob-olob anjaha marmalas ni uhur ma hita halani ai.
25Ham Jahowa, urupi Ham ma! Ham Jahowa, sai manumpak ma Ham!
26Pinasu-pasu ma na roh marhitei goran ni Jahowa. Ipasu-pasu hanami ma nasiam hun rumah ni Jahowa.
27Jahowa do Naibata, Ia do na manondangi hita. Atur nasiam ma galangan pesta das hu tanduk ni anjapanjap!
28Naibatangku do Ham, Ham do sipujionku. Ham Naibatangku, Ham do sipatimbulonku.
29Puji ma Jahowa, ai pardear layak do Ia, tongon ronsi sadokah ni dokahni do idop ni uhur-Ni.