Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 40 >> 

Tonggo Tarima Kasih ampa Pangindoan

1Bani pambobai koor. Humbani si Daud. Sada Psalm. (40-2) Marpangarapan tumang do uhur hubani Jahowa; jadi ipaeleng do diri-Ni hu bangku, anjaha itangihon do dilo-dilongku.

2(40-3) Idokdok do ahu humbani godung hamagouan, humbani hubang na malhot; ipajongjong do naheihu hu atas ni dolog batu, ipatotap do langkahku.

3(40-4) Ibere do doding na bayu hubagas pamanganku, doding puji-pujian bani Naibatanta. Idahon ni buei halak ma ai, gabe mabiar anjaha martenger ni uhur bani Jahowa.

4(40-5) Martuah ma halak na mambahen Jahowa hatengeran ni uhurni, na so ra marbalik mangirikkon sigijang uhur, atap hubani sihorjahon ladung.

5(40-6) Buei do halongangan ampa ranggian-Mu, na dob binahen-Mu bennami, Ham Jahowa Naibatangku; seng adong na songon Ham. Porini sihol ambilankononku atap baritahononku ai, seng targorani ibahen bueini.

6(40-7) Seng marosuh uhur-Mu bani galangan sisayaton ampa bani galangan sipanganon, tapi domma ibere Ham bangku pinggol na buha. Galangan situtungon pakon galangan pardousaon seng ipindo uhur-Mu.

7(40-8) Jadi ningku ma, “Tongon, roh ma ahu, bani buku na ginulung in do tarsurat pasal sibahenonku.”

8(40-9) Mangkorjahon rosuh-Mu ai do na huharosuhkon, Ham Naibatangku, anjaha ibagas uhurhu do titah-Mu.

9(40-10) Domma huambilankon hapintoron-Mu bani humpulan banggal, tongon, seng tutup bibirhu, Ham Jahowa, ibotoh Ham do ai.

10(40-11) Seng huponopkon hapintoron-Mu ibagas uhurhu, hupatugah-tugah do habujuron-Mu pakon pangurupion-Mu, seng huporsou idop ni uhur-Mu pakon hasintongan-Mu bani humpulan banggal.

11(40-12) Ham Jahowa, sai ulang ma buat Ham parontou ni uhur-Mu humbangku, dear layak-Mu pakon hasintongan-Mu ma manramotkon ahu tongtong.

12(40-13) Ai hasunsahan do na manlioti ahu, seng tarbilangi bueini; domma idorab salahku ahu, gabe seng boi ahu marpangidah, bueinan do ai ase jambulan ni ulungku, gabe jut ma uhurhu.

13(40-14) Sai ra ma Ham Jahowa, paluahkon ahu, oloskon Ham ma, Jahowa, mangurupi ahu.

14(40-15) Sai maila anjaha tarbador ma bahen Ham, sidea na manguhurhon hosahku, sai surut ma hu pudi anjaha tarbador, sidea na mangkarosuhkon hamagouanku.

15(40-16) Sai hirjat-hirjaton ma sidea anjaha tarbador, sagala na manggorahon bangku, “Eee, eee!”

16(40-17) Sai marolob-olob anjaha marmegah-megah ma ibagas Ham, sagala na mangindahi Ham; sai tongtong ma ihatahon sagala na mangkasiholi pangurupion-Mu, “Banggal do Jahowa!”

17(40-18) Madoyuk anjaha masombuh do ahu, tapi idingat Tuhan do ahu. Ham do pangurupi ampa sipaluah bangku; Ham Naibatangku, ulang ma padokah-dokah Ham.


  Share Facebook  |  Share Twitter

 <<  Mazmur 40 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel