Naibata do Raja ni Ganup Tanoh on
1Bani pambobai koor. Humbani ginompar ni si Korah. Sada Psalm. (47-2) Nasiam sagala bangsa, martopap-topap ma nasiam; puji nasiam ma Naibata marhitei doding olob-olob.
2(47-3) Ia Jahowa, na timbul na majombut in, Ia do Raja Bolon bani sab dunia on.
3(47-4) Ipatunduk do bangsa-bangsa hubagas kuasanta, ampa suku ni bangsa hutoruh ni naheita.
4(47-5) Ipilih do banta na gabe siteanonta, hatimbulon bani si Jakob, na hinaholongan-Ni in. Sela.
5(47-6) Domma naik Naibata marhasoman olob-olob, Jahowa marhasoman sora ni tarompit.
6(47-7) Dodingkon nasiam ma Naibata, dodingkon ma; dodingkon nasiam ma Rajanta in, dodingkon ma!
7(47-8) Ai Naibata do Raja ni sab tanoh on, dodingkon nasiam ma doding puji-pujian.
8(47-9) Raja do Naibata bani bangsa-bangsa, hundul do Naibata i atas paratas-Ni na pansing in.
9(47-10) Martumpu do na sangap-sangap ni sagala bangsa songon bangsa ni Naibata ni si Abraham, Naibata do simada gantar ni tanoh on, timbul tumang do Ia.