Dual PanelTenger ni Uhur bani Naibata Ibagas Hasosakan
1Bani pambobai koor. Inggouni: Asas bani hayu Teberinta na madaoh. Humbani si Daud, sanggah itangkap halak Palistim ia i huta Gat. (56-2) Maidop ma uhur-Mu bangku, Ham Naibata, ai sihol atahon ni jolma do ahu, ganup ari iporang anjaha isosak sidea do ahu.
2(56-3) Sihol atahon ni imbangku do ahu ganup ari, buei do sidea na mangimbang ahu.
3(56-4) Sanggah mabiar ahu, sai hu Bamu do ahu martenger ni uhur.
4(56-5) Mangunsagahkon Naibata sai pujionku do hata-Ni, Naibata do huajamkon, seng mabiar ahu, mintor kahuaon ni jolma ma ahu?
5(56-6) Ari-ari do ipabalik sidea hatangku; sagala pingkiran ni sidea dompak ahu sihol pasamborhon do.
6(56-7) Martumpu-tumpu do sidea manggompangi, ipardiatei do langkah-langkahku laho manguhurhon hosahku.
7(56-8) Seng anjai maluah sidea halani hajahatonni na buei in. Sampakkon Ham ma bangsa-bangsa in ibagas ringis-Mu, Ham Naibata!
8(56-9) Domma isuratkon Ham parawat-awatanku, domma ipatumpu Ham iluhku hubagas tatabu-Mu; ai lang domma ibukuhon Ham ai?
9(56-10) Maningon surut do hu pudi sagala munsuhku anggo dilo-dilo ahu; tangkas do hubotoh paboa Naibata do mangkasomani ahu.
10(56-11) Mangunsagahkon Naibata, pujionku do hata-Ni, mangunsagahkon Jahowa pujionku do hata-Ni.
11(56-12) Marhatengeran bani Naibata do ahu, seng mabiar ahu, mintor kahuanon ni jolma ma ahu?
12(56-13) Ham Naibata, marutang bagah-bagah do ahu Bamu, sai galaronku do galangan banggal ni uhurhu hu Bamu,
13(56-14) ai domma ipaluah Ham hosahku humbani hamatean, sonai homa naheihu pe humbani partolsuan, gabe boi mardalan ahu i lobei ni Naibata, ibagas sondang hagoluhan.