Dual PanelTonggo bani Panorang Hasosakan
1Bani pambobai koor. Marhasoman husapi. Domu hubani na paualuhkon. Psalm ni si Daud. (6-2) Ham Jahowa, ulang uhum Ham ahu ibagas ringis-Mu, ulang bogbog Ham ahu ibagas gila-Mu.
2(6-3) Maidop ma uhur-Mu bangku, Ham Jahowa, halani hagalekonku; pamalum Ham ma ahu Jahowa, ai hitir-hitir do holi-holingku.
3(6-4) Rusak tumang do tonduyhu ibagas, tapi Ham Jahowa, sadiha dokah nari do?
4(6-5) Marulak-ulakan ma uhur-Mu, Ham Jahowa, paluah Ham ma tonduyhu, sai paluah Ham ma ahu, halani idop ni uhur-Mu.
5(6-6) Halani bani hamatean seng dong halak na mardingat Ham, i nagori toruh, ise ma na mamuji Ham?
6(6-7) Loja do huahap ibahen hoih-hoihku, siap borngin do bonsot podomanku hubahen, marhitei iluhku marbah do tilamku hubahen.
7(6-8) Solong do matangku halani pusok ni uhurhu, roh galekni do ai halani halak na manosak ahu.
8(6-9) Surut ma nasiam humbangku, sagala sihorjahon hajahaton, ai itangihon Jahowa do sora ni tangis-tangisku.
9(6-10) Domma itangihon Jahowa hoihku; ijalo Jahowa do tonggongku.
10(6-11) Sai tarbador anjaha tarsonggot tumang do sagala munsuhku; tarolos do sidea surut, tarmela sompong.