Dual PanelSonang i Lambung ni Naibata
1Bani pambobai koor. Hubani si Jedutun. Psalm humbani si Daud. (62-2) Pitah mangkawah bani Naibata tumang do mambahen marhasonangan tonduyhu, humbani do roh haluahonku.
2(62-3) Pitah Ia do dolog batu pakon hatuahon bangku, Ia do batar-batar bangku, seng anjai tompas ahu.
3(62-4) Piga dokah nari do sai dorab-dorab hanima bani sada halak, sihol manrumbakkonsi, ee hanima haganup, songon bani dingding na sihol jomba, bani tembok na sihol tompas?
4(62-5) Manriahi do sidea laho manjulakkonsi humbani hagijangonni, rosuh do sidea bani ladung; marhitei pamanganni mamasu-masu sidea, hape mamapai do sidea ibagas uhurni. Sela.
5(62-6) Pitah bani Naibata do ho marhasonangan, ale tonduyhu, ai hun Bani do roh pangarapanku.
6(62-7) Pitah Ia do dolog batu pakon hatuahon bangku, Ia do batar-batarhu, seng anjai tompas ahu.
7(62-8) Bani Naibata do maronjolan hatuahonku pakon hamuliaonku, batu gingging hagogohon bangku, ianan parlingodanku, ai ma Naibata.
8(62-9) Sai hu Bani ma nasiam martenger ni uhur, ale jolma, lungkari ma uhur nasiam i lobei-Ni, Naibata do haporusan banta. Sela.
9(62-10) Hosah tumang do anak ni jolma, sipaoto-oto anak ni manisia, ibagas timbangan mintor do sidea bonggal hu atas, hampungan do sidea humbani hosah tene.
10(62-11) Ulang ma nasiam marpangajaman bani kuasa, ulang homa mangenjeng bani barang rampasan! Martambah-tambah pe habayakon, ulang ma dompak jai uhurmu!
11(62-12) Sahali marhata Naibata, dua pahara na tartangar ahu: Gok bani Naibata do hagogohon,
12(62-13) anjaha gok Bamu do Tuhan, idop ni uhur: Ham do mambalaskon bani pambahenanni.