Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 73 >> 

Uhur na Sungkun-sungkun Pasal Hadoharon ni Halak Parjahat

1Psalm ni si Asap. Tongon, mardear layak do Naibata bani Israel, bani halak na borsih maruhur.

2Tapi anggo ahu, narus do jiris naheihu, narus do ahu targompang.

3Ai simburu do uhur hubani sigijang uhur, mangidah marhasonangan halak parjahat.

4Seng borit-boritan sidea, jorgit anjaha tambos do angkula ni sidea.

5Seng mangonai bani sidea sunsah ni hajolmaon, anjaha seng ihonai na marsik sidea songon halak na legan.

6Halani ai marsinongkok gijang ni uhur do sidea, anjaha marhiouhon panipuon.

7Halani hamomburonni marsual-sual do hajahaton humbani sidea, linir do na masambor humbani uhur ni sidea.

8Manrisai do sidea, anjaha mansahap-sahapkon hajahaton, marhasoman pangenjengon idalankon ondam-ondam.

9Ipatanggak sidea do babahni das hu langit, anjaha maor-aor do dilahni i tanoh on.

10Halani ai marbalik do bangsa in mangirikkon sidea, anjaha isobur hata ni sidea ai songon bah.

11Sai ihatahon sidea do, “Sonaha ma pambotoh ni Naibata? Ai dong habotohon ni Na Timbul in?”

12Tonggor ma, sonai do halak parjahat, marsonang-sonang lalab, lambin junjun habayakonni.

13Jadi soya-soya do hape hupaborsih uhurhu, huburihi tanganku tanda lang marpipot.

14Ai marsitaronon do ahu ari-ari, anjaha hona pinsang ahu siap sogod.

15Porini ningku, “Songon sidea ma parsahapku, tonggor ma, ginompar ni anakmu do na hutahihon ijai.”

16Tapi sanggah marpingkir-pingkir ahu, laho mangarusi ai, gabe naborit do ai bani panonggorhu,

17paima masuk ahu hubani ianan ni Naibata na pansing in, laho manangkas-nangkasi ujung ni sidea.

18Tongon, bani ianan na landit do ipajongjong Ham sidea, ipaturut Ham do sidea madabuh hubagas hakahouon.

19Ibagas sangkidop mata do sidea magou, bois anjaha masab do sidea, majangin tumang.

20Masab do sidea songon nipi sanggah puho, anjaha lupa do halak bani rupani.

21Sanggah marmongot-mongot uhurhu, anjaha songon na itobak-tobak piah-piahku,

22maoto do ahu anjaha seng marpangarusion, songon na so maruhur do ahu i lobei-Mu.

23Tapi sai tongtong do ahu rapat pakon Ham, ijolom Ham do tanganku siamun.

24Itogu Ham do ahu marhitei sura-sura-Mu, anjaha jaloon-Mu do ahu hu hasangapon.

25Ise ma hasomanku i nagori atas? Sobali Ham seng dong iharosuhkon uhurhu i tanoh.

26Age pe lambin melus badanku pakon uhurhu, batar-batar bani uhurhu ampa rupeihu, ai ma Naibata sadokah ni dokahni.

27Tongon, sai na magou do na paganggang dirini hun Bamu, sai boiskonon-Mu do sagala na marbalik hun Bamu.

28Tapi anggo ahu, hatuahon do bangku na dohor ai bani Naibata; Jahowa do hubahen hatengeran ni uhurhu, sai baritahononku do pambahenan-Ni ganup.


  Share Facebook  |  Share Twitter

 <<  Mazmur 73 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel